Pung taek pawiz kopz ku
22
Yesuhz lao thaengz keuh nahz mony pung taek daz, 2 “Prih kaang raaoz ne naeh ceun ni. Maang khunz hawkz raenz aez kuanz keur meh daehz nahz pawiz kopz ku. 3 Hnhz cao peur cao daehz khahz raak khaekz an paangz mok keui truz kaw keuh nam kai. 4 Hnhz cao thaengz peur cao daehz teur ka keui rae seumz tang keuh, aez lao khaekz daehz daz, ‘Ohz a wa raenz seum suamz, tangz meuk boh toz satz an keu buiz keui, a wa peun tan mok keunyz, truz kut tuhz pawiz raez.’ 5 Keuiz daz khaekz keu diz nam kut phawmz, hawkz lan maar, thaengz hawkz samz lan khahz ka. 6 Teur ka samz cawpz peur cao khunz keu diz rae tiz keuh, piamz thengz keuh. 7 Khunz kaw sunz ca rae cao siukz daehz phreoz thengz ihz piamz phawmz keu diz kaw tucz thengz weng keuh. 8 Hnhz lao peur cao daehz keui nahz, ‘Sangz daz pawiz ne a wa peun tan mok boh kaw khaekz an paangz mok keui nam theukz kut. 9 Lan tawiz reung dengz rae raak truz ihz an pehz awlz.’ 10 Peur cao keui kaw lan tawiz reung dengz, raak truz ihz rak ihz raai an daehz awlz keui rae pawiz an diz neuk taw khaekz.11 Meuz khunz truz dawmz yawt khaekz daehz ne awlz ihz hawkz nam kap kreung kut pawiz kopz ku rae, 12 hnhz daz ihz an diz nahz, ‘Raen, nam kap kreung kut pawiz samz kut tuhz pawiz ceun nae?’ Keuiz daz ihz an diz nam rawhz. 13 Meuz ceun diz khunz lao ihz daehz keui nahz, ‘Mat tihz cawng hnhz, wiurz plaez an bimz thaz nawk, a diz bawnz yaam boh teur kak raangz.’”
14 Yesuhz kaw daz keuh nahz, “Kawp daz ihz an talz paangz keui heungz kaw ihz an talz ras keui lany.”
Lawng thaamz khawn
15 Pharise keui lae lan rae teur lao daehz ceu dakz khahz mony reu ma Hnhz. 16 Keuh cao teu paez daehz tang ihz khunz Herot lan cu Hnhz, keuh lao daz, “Tahz sra, Mih naeh ihz keu sangz, sawnz aez traz Phraz Pen Caoh tawiz traz an anz. Mih nam doz ihz daz Daehz, Mih nam yawt ngaai yaeh. 17 Lao ehz nahz luz, Mih thaang ceun nae? An thaamz khawn khunz longz Kaesar ne anz tawiz traz haz nam tawiz haz?”
18 Keuiz daz Yesuhz mas keuh kyaam meukz rae daz, “Pehz seuk cih daehz naeh ihz rak, cih naehz lah pehz kyaam ceu dakz Ohz a? 19 Plaez Ohz nahz paekz thaamz khawn seu pyaz luz.” Keuh kaw leh truz aez Hnhz nahz paekz Rom seu pyaz. 20 Hnhz maanyz keuh, “An ni naeh mus yaeh? Naeh raang yaeh?”
21 Keuh mial daz, “Khunz longz Kaesar.” Yesuhz daz keuh nahz, “Khangz khunz kaw aez mial khunz, khangz Phraz kaw aez mial Phraz.” 22 Meuz keuh ngarz an diz ne sangz. Keuh kaw lae lan thaz Hnhz.
Meu rae imz
23 Kaai seu ngihz an diz Saduse, an nam yum meu rae imz keui truz cu Yesuhz maanyz daz, 24 “Tahz sra, Moses seumz mok ehz nahz, beuk ihz hawkz leh yah maat maang kuanz yam lan ne seum bohz hnhz bawnz leh mawm daehz, aez maang ceu kheuz mai daehz da. 25 Maang kuanz mai teu pulz tuhz ehz. An mawh lak ihz ne leh yah maat maang kuanz samz a wa yam rae hnhz mok aez seum bohz daehz nahz yah. 26 Kaai keu aarz, keu waiz keuh teu pulz hawkz wa hawkz leh keun nyah an diz, nam maang kuanz rae yam hacz aamz. 27 Thaz puatz dutz keun nyah an diz kaw yam. 28 Beuk naeh ceun diz kraao meu rae imz tui keun nyah an diz ngaz naeh yah yaeh? Kawp keuh teu pulz ne a wa leh keun nyah an diz klawhz ihz.”
29 Yesuhz mial daz, “Pehz a wa pleung kawp daz pehz nam mas kyaamz lik boh taanz khoz Phraz Pen Caoh. 30 Meuz kraao meu rae imz tui ihz keui nam teur leh daehz leui, naeh ceun teu maan kaang raaoz. 31 Kraao ihz yam meu rae imz tui pehz nam ti bawnz rawz an Phraz Pen Caoh daz pehz nahz haz? 32 Hnhz daz, ‘Ohz naeh Phraz Abraham, Phraz Isaac boh Phraz Yakop.’ Hnhz nam anz Phraz ihz yam, naeh Phraz ihz imz.”
33 Meuz wungz ihz keui ngarz ne teur aacz daehz sangz an Hnhz sawnz.
Sinz an myaat lak ihz
34 Meuz Pharise keui ngarz Yesuhz tawpz Saduse, aez keuh pras ne teur cuhz daehz truz cu Hnhz. 35 Ihz mawz kyaamz hawkz an naeh tuhz keuh ne sunz caam yawt Hnhz rae maanyz daz, 36 “Tahz sra, tuhz kyaamz sinz traz ne sinz an nae myaat lak ihz?”
37 Yesuhz mial daz, “‘Rak Phraz Cen Cen, Phraz Pen Caoh daehz kingz keu nuasz hacz aamz, phawmz hacz aamz, nyaan hacz aamz.’ 38 An ni naeh sinz kaai hawkz boh an myaat lak ihz. 39 Thaengz hawkz kaw naeh ceun diz, ‘Rak ihz rim daehz ceun mih rak toz daehz.’ 40 Kyaamz sinz Moses boh kyaamz ihz taangz phraz keui hacz aamzi tae mok kaai sinz kaar ni.”
Khris naeh kuanz yaeh?
41 Meuz Pharise keui yeung teur cuhz boh ne, Yesuhz maanyz keuh, 42 “Pehz thaang lawng Khris ceun nae? Hnhz naeh kuanz yaeh?” Keuh mial daz, “Hnhz naeh kuanz khunz Dawit.”
43 Hnhz daz keuh nahz, “Kawp naeh khunz Dawit raak Hnhz naeh Tahz tawiz Khuanz a?” 44 Khunz Dawit daz, “Phraz Cen Cen daz, Tahz ohz nahz, ‘Keu dez thaz takz kaaiz Ohz raez, thonz taw Ohz leh raan su Mih keui mok tuhz keutz cawng Mih.’ 45 Beuk khunz Dawit raak Khris naeh Tahz kaw cih seu naez caang naeh kuanz hnhz?”
46 Nam maang yaeh tawpz bawnz mony reu ma Hnhz, tae leh seu ngihz an diz yaeh nam yaak maanyz naehz a Hnhz leui.