Seu tih ihz mawz kyaamz boh Pharise
23
Meuz diz Yesuhz lao wungz ihz boh teu paez Daehz keui nahz, 2 “Ihz mawz kyaamz boh Pharise keui naeh ihz an maang a na lao plaez kyaamz sinz traz Moses. 3 Kawp ceun diz pehz teuk ngarz an keuh lao rae cih tawiz lah. Keuiz daz yak cih yeung ceun keuh cih, kawp daz keuh lao boh kaw nam cih tawiz daehz eunz. 4 Keuh raenz lam an keu can baekz kreuk ne sapz kaai cawkz pahz ihz, keuiz daz keuh samz nam sunz leh tang kuanz tihz daehz kraai an keu diz. 5 An keuh cih klawhz meoz ne cih aez ihz awlz. Yawt seu kiz hurz kyehz an keuh mar sapz lik traz, mat seu takz a daalz boh plaehz tihz daehz ne mawh thanz teur nae boh kap kreung cih aez caam caai hanz hanz. 6 Keuh song ti keu dez an trawng lak ihz tawiz pawiz tawiz crawp, 7 keuh song ihz tak daehz tawiz teur laas, aez ihz raak daehz ‘Tahz Sra.’ 8 Keuiz daz pehz samz yak aez ihz raak daehz naeh Sra, kawp daz Sra pehz naeh taw hawkz pan, pehz hacz aamz naeh kuanz mai. 9 Yak raak yaeh tuhz prih keu tehz naeh Paz, kawp daz Paz pehz naeh taw hawkz pan, an naeh lang kaang raaoz. 10 Yak aez ihz raak daehz naeh Tahz, kawp daz Tahz pehz naeh Khris taw Daehz pan. 11 Ihz an mawh lak ihz peur lah pehz ne lo naeh peur cao ihz. 12 Ihz mok seuk mawh toz daehz ne ngaz klaez daelz, ihz mok daelz toz daehz samz ngaz moh trawng.”Yesuhz nae ihz mawz kyaamz boh Pharise
13 “Ihz mawz kyaamz boh Pharise keui aez, pehz seuk cih daehz naeh ihz rak, pehz bawnz an nam rak! Pehz dapz keur wah prih kaang raaoz aacz ngaai ihz. Pehz kaw nam kut, ihz sunz kut keui nahz kaw pehz nam aez kut. 14 Ihz mawz kyaamz boh Pharise keui aez, pehz seuk cih daehz naeh ihz rak, pehz bawnz an nam rak! Kawp daz pehz rimz leh kreung kaang yah keu maaiz rae suz tawngz hanz hanz. Pehz ngaz talz taam an keu can leuz boh.
15 Ihz mawz kyaamz boh Pharise keui aez, pehz seuk cih daehz naeh ihz rak, pehz bawnz an nam rak! Pehz lo tawiz omz, lan tawiz pukz keui rae cih aez ihz kut tawiz pha sa daehz. Meuz ihz kut tawiz pehz ne pehz cih aez hnhz naeh ceun pehz, aez keuh penz ihz prih ngal raai leuz pehz aarz pun.
16 Ihz ngaai bimz an plaez reung dengz keui aez, pehz bawnz an nam rak! Pehz daz beuk ihz teung kaao kaai wat ne nam kut, keuiz daz beuk teung khamz a wat ne kut boh. 17 Ihz meukz ngaai bimz keui aez, an nae mawh myaat a? Naeh khamz haz, nam anz kaw naeh wat an cih aez khamz seu ngamz haz? 18 Pehz daz tang beuk ihz teung khrengz ne nam kut, keuiz daz beuk teung kreung lu kaai khrengz pukz caw samz kut boh. 19 Ihz ngaai bimz keui aez, an nae mawh myaat a? Naeh kreung lu haz, naeh khrengz pukz caw an cih aez kreung lu seu ngamz haz? 20 Kawp ceun diz ihz teung khrengz kaw teung kaai khrengz pukz caw boh teung tang an naeh kaai khrengz hacz aamz. 21 Naeh ceun diz, ihz teung wat kaw teung wat boh teung tang Tahz an moh tuhz wat. 22 Ihz teung kaang raaoz kaw teung plaang Phraz Pen Caoh boh teung tang Tahz an keu dez kaai plaang.
23 Ihz mawz kyaamz boh Pharise keui aez, pehz seuk cih daehz naeh ihz rak, pehz bawnz an nam rak! Pehz leh phakz kiz, mul khaez, imz krim aez seu kawlz pun seu pun. Keuiz daz pehz nam nap suamz sinz traz an mawh an naeh an cih phrengz, an teur yawng boh an cih yoz keui. Pehz lo cih an keu ni, an daz aacz keu diz kaw nam lo plawiz thengz. 24 Ihz ngaai bimz an plaez reung dengz keui aez, pehz caet omz yak aez mah phrihz kut, keuiz daz pehz muang tang meu rang maang soz.
25 Ihz mawz kyaamz boh Pharise keui aez, pehz seuk cih daehz naeh ihz rak, pehz bawnz an nam rak! Pehz khez thaz nawk klakz boh sroz, keuiz daz tuhz nao samz neuk taw lawphahz boh an mawr suamz keui. 26 Pharise ngaai bimz keui aez, khez aacz tuhz nao klakz boh sroz keui raez, beuk cih ceun diz thaz nawk kaw caangz daehz ne.
27 Ihz mawz kyaamz boh Pharise keui aez, pehz seuk cih daehz naeh ihz rak, pehz bawnz an nam rak! Pehz naeh ceun thunz thukz tawiz peun lu keui. Yawt thaz nawk tae aatz baaiz, keuiz daz tuhz nao samz neuk taw ceun aangz ihz yam boh an woi klawhz meoz keui. 28 Naeh ceun khuz an diz pehz kiungz naeh ihz keu sangz aacz ngaai ihz, keuiz daz tuhz nao pehz samz neuk taw an seuk cih daehz naeh ihz rak boh an nam phrengz keui.”
Yesuhz lao teuk aacz lawng taam an keuh ngaz talz
29 “Ihz mawz kyaamz boh Pharise keui aez, pehz seuk cih daehz naeh ihz rak, pehz bawnz an nam rak! Pehz cih peun lu ihz taangz phraz boh seuk laep peun lu ihz keu sangz keui. 30 Pehz daz, ‘Khanz daz ehz penz ihz co ihz keu daehz keu daepz ehz kaw ehz nam kut tuhz cumz piamz ihz taangz phraz. 31 Teur deuiz tang pehz daz daehz naeh kheuz ihz piamz ihz taangz phraz. 32 Cih teuk neuk reung dengz kawi ihz keu daehz keu daepz pehz cih truz raez. 33 Pehz naeh heunyz, pehz naeh kheuz heunyz raai! Pehz ngaz cih seu naez tiunz lawt thaz taam ngal raai? 34 Kawp ceun diz ohz phuhz aez pehz nahz ihz taangz phraz, ihz maang pinya boh ihz mawz kyaamz keui. Teur ka pehz ngaz piamz, teur ka pehz ngaz tawkz piamz kaai lakz klawngz klaengz, teur ka pehz ngaz rotz tawiz crawp rawz traz rae wah thengz keuh kut seu weng lae seu weng. 35 Kawp ceun diz naamz ihz keu sangz an klaez tuhz keu tehz kaanz Abel taw phraeoz Sekhariah an naeh kuanz Berekiah, an pehz piamz peur lah wat boh khrengz pukz caw ne ngaz naeh kaai pehz. 36 Ohz daz mawn pehz nahz taam an keu diz ngaz klaez kaai pehz kap seu ni.”
Yesuhz rak weng Yerusalem
37 “Oz weng Yerusalem, Yerusalem, mih naeh ihz piamz ihz taangz phraz, leh kawnz reu aangz wiurz piamz ihz an plawiz lan cu mih. Ohz sunz aez mih leh kuanz daehz ceun mah yaerz tum leh kuanz daehz tuhz keutz piangz ne thanz teur nae. Keuiz daz mih nam kai. 38 Yawt, kaang pehz kaw ngaz raam rae pras. 39 Ohz lao pehz nahz, thonz taw pehz maat daz, ‘Tahz an truz tawiz mus Phraz Cen Cen ne naeh an rak,’ ne pehz nam bawnz awlz thaengz Ohz leui.”