Lao teuk aacz lawng wat yaatz
24
Meuz Yesuhz lae truz thaz teu laangz wat ne teu paez keui truz cu rae plaez Hnhz nahz kaang an naeh tuhz teu laangz wat. 2 Hnhz daz keuh nahz, “Pehz awlz boh an keu ni nam anz haz? Ohz daz mawn pehz nahz, reu aangz keu ni nam baetz hawkz kaai hawkz leui, talz ya thengz hacz aamz.”An peur teuk boh an ihz pae suamz
3 Meuz Hnhz keu dez kaai rang Olip ne teu paez keui pan truz cu Hnhz. Keuh daz Hnhz nahz, “Lao ehz luz, an keu diz ngaz penz meu naeh, meuz Tahz ehz truz mial rae kam pha ngaz lawng ne maang an laak laaiz naehz?”
4 Yesuhz mial daz, “Seu tih yak aez ihz kaoz bawnz pehz. 5 Kawp daz ihz keui ngaz truz kaai mus Ohz, daz daehz naeh Khris rae kaoz suamz ihz heungz baaiz. 6 Pehz ngaz ngarz reu oiz tiukz siukz ti thatz boh ti yaan, keuiz daz pehz yak ngaat. Kawp daz an keu diz ne bawnz naeh boh, keuiz daz maat phraeoz ti dutz. 7 Ihz seu kheuz boh seu kheuz, seu prih boh seu prih kaw ngaz teur tiukz. Ngaz naeh an coh nguat boh reu yung keui ngaz kruhz klawhz ti. 8 An keu ni naeh seun teungz tukz khahz peur teuk.
9 Ihz ngaz aap pehz pae suamz pehz boh piamz pehz. Kheuz ihz hacz aamz keui ngaz ceuh pehz kawp Ohz. 10 Meuz ceun diz ihz tang heungz keui ngaz pleung reung dengz yum daehz rae ngaz teur saz kokz, ngaz teur ceuh. 11 Samz thaengz ihz taangz phraz plawmz an heungz keui kaw paw truz rae ngaz kaoz ihz heungz baaiz. 12 An meukz keui ngaz heungz truz, an rak yaw keui ngaz lany lan. 13 Keuiz daz ihz yum klakz taw dutz ne ngaz bawnz reung dengz khyawt. 14 Reu oiz rak prih Phraz Pen Caoh kaw aez penz saak se kaai ihz hacz aamz ne ngaz rawz sirz tuhz prih keu tehz ne caang kai naeh an dutz.”
Phez mawh longz
15 “Pehz ngaz awlz an peuk ceuh ceng boh ti seu ngamz, ceun ihz taangz phraz Daniel rawz mok. Aez ihz rawz lik keui loz phawmz. 16 Meuz ceun diz, aez ihz naeh tuhz prih Yio keui aez tiunz rawz kaai rang. 17 Aez ihz an naeh lang yaal keui yak aez kut leh phrihz phrahz tuhz kaang. 18 Ihz naeh tawiz sraakz maar keui yak aez weng leh kreung kap daehz. 19 Kaai seu ngihz keu diz kreuk baaiz ta keun nyah keun meur boh keun nyah maang kuanz buhz! 20 Pehz suz tawngz aez kraao an pehz tiunz ne yak aez maen kaai kiarz katz boh seu ngihz sinz. 21 Kawp daz ngaz naeh phez mawh longz awh, kaanz prih keu tehz tae taw seu ni ne nam ti maang phez mawh longz ceun diz, waaiz an diz kaw ngaz nam naeh thaengz leui. 22 Beuk nam cih aez kraao an diz patz kaw nam maang ihz lawt. Kawp daz ta ihz ras keui nahz rae cih aez kraao an diz patz.
23 Meuz ceun diz beuk ihz daz pehz nahz, ‘Yawt, Khris naeh a niz, naeh a tui,’ daz kaw yak yum. 24 Kawp daz Khris plawmz boh ihz taangz phraz plawmz keui ngaz plaez an laak laaiz an mawh boh rak seum sangz ne beuk caang kaw aez daehz kaoz bawnz tang ihz an peun ras keui. 25 Teuk ngarz raez, Ohz lao teuk aacz pehz nahz.
26 Beuk ihz daz, ‘Yawt, Khris naeh tuhz ruk,’ daz kaw yak lan. ‘Yawt, Khris naeh tuhz lukz,’ daz kaw yak yum. 27 Kawp daz meuz Kuanz Kingz Ihz ngaz truz ne naeh ceun laak lawk thaangz thaz reu lae taw thaz reu keutz.
28 Toz yam naeh a naez kaw klaangz ta waet a diz.”
Lawng Kuanz Kingz Ihz truz
29 “Meuz seu ngihz peur teuk a wa hacz ne seu ngihz ngaz bimz, kiarz kaw ngaz nam aez an thaangz. Seuk muny lang plengz keui ngaz kur, taanz khoz lang plengz keui ngaz keusz. 30 Meuz phangz an diz an laak laaiz Kuanz Kingz Ihz ne ngaz naeh lang plengz. Meuz ihz tuhz prih keu tehz keui awlz Kuanz Kingz Ihz tumz truz peu eumz, tawiz taanz khoz boh bunz mawh ne keuh ngaz yaam lengz lengz. 31 Kuanz Kingz Ihz kaw ngaz cao teu maan kaang raaoz Daehz putz piz usz usz seu klawhz plaakz, aez ihz an peun ras keui teur cuhz daehz seu dukz prih taw seu dukz prih.”
Pung taek teungz laangz wah
32 “Yawt teungz laangz wah ne sawnz leh lah, meuz kaakz hnhz lae, lahz hnhz run ne pehz mas boh a wa thatz kiarz kawcz. 33 Naeh ceun khuz an diz meuz pehz awlz an keu ni hacz aamz ne pehz lo mas Kuanz Kingz Ihz a wa thatz rim keur wah. 34 Ohz daz mawn pehz nahz, co kheuz ihz seu ni maat dutz ne ngaz naeh an keu ni hacz aamz. 35 Kaang raaoz boh keu tehz ngaz bilz, keuiz daz mony reu ma Ohz nam bilz.”
Yaeh nam mas kraao boh seu ngihz an diz
36 “Yaeh nam mas seu ngihz an diz boh kraao an ngaz naeh ceun diz. Teu maan kaang raaoz keui kaw nam mas, Kuanz kaw nam mas. Naeh taw Paz pan mas a. 37 Meuz Kuanz Kingz Ihz truz ne naeh ceun co Noah. 38 Kawp daz taw seu ngihz omz maat lumz ne ihz keui teur aacz daehz suamz suamz tiangz tiangz, leh tahz leh yah, thonz taw seu ngihz Noah kut tuhz ceun luang longz. 39 Thonz taw seu ngihz omz lumz thengz keuh ne keuh nam mas ngaz naeh ceun nae. Meuz Kuanz Kingz Ihz truz kaw ngaz naeh ceun diz. 40 Ihz keu aarz an naeh tuhz maar ne ngaz leh hawkz kiutz hawkz. 41 Keun nyah keu aarz leui ngohz kaw leh hawkz kiutz hawkz. 42 Kawp ceun diz rae seu tih pao raez, kawp daz pehz nam mas Tahz daehz ngaz truz peuk naeh. 43 Keuiz daz pehz mas leh an ni, beuk tahz kaang mas kraao peun rah truz rah ne pao yak aez peun rah ya kut bawnz tuhz kaang daehz. 44 Pehz peun tan mok raez, kawp daz Kuanz Kingz Ihz ngaz truz meuz pehz nam thaang.”
Kuanz leng an maang saetz ca boh an meukz
45 “Kuanz leng an maang saet ca boh maang pinya ne naeh yaeh? Hnhz an diz naeh kuanz leng an tahz daehz khaanz mok, meuz kraao maen ne hnhz mawz phraez aez kuanz leng keu diz nahz seum suamz. 46 Meuz tahz paz leng truz awlz kuanz leng cih ceun diz ne bawnz an rak. 47 Ohz daz mawn pehz nahz, tahz hnhz aapz aez hnhz nahz aez naeh ta khriungz phrihz phrahz daehz hacz aamz. 48 Keuiz daz kuanz leng an meukz samz daz tuhz phawmz daehz, ‘Tahz ohz yeung hinz truz.’ 49 Hnhz tiz kuanz leng daehz teur deuiz, suamz kawmz tiangz kawmz boh ihz cawc, 50 tahz hnhz ngaz weng truz seu ngihz an hnhz nam thaang ne, 51 ngaz mak hnhz penz patz, aez hnhz nahz taam teur kawmz ihz seuk cih daehz naeh ihz rak, a diz bawnz yaam teur kak raangz.”