Pung taek trawsz teuk rac seu kawlz
25
“Prih kaang raaoz ne ngaz naeh ceun ni. Maang trawsz teuk rac seu kawlz, tawnz tang ngal ngawiz peun kleoz daehz rae lae saanyz tahz seu naaoz. 2 Tuhz keuh ne khanz naeh ihz kleuhz klahz, khanz naeh ihz maang pinya. 3 An kleuhz klahz khanz keui khaenz ngal ngawiz keuiz daz nam khaenz teur dawngz nam man tawiz daehz. 4 An maang pinya keui samz khaenz ngal ngawiz boh teur dawngz an maang nam man. 5 Meuz tahz seu naaoz hinz phraeoz ne keuh seum ceuk rae yaetz reuk ngeut hacz aamz.6 Meuz khinz sawmz ne maang reus hawkz daz, ‘Yawt, tahz seu naaoz a wa phraeoz, lae saanyz hnhz lah! 7 Trawsz hacz aamz kaw rawi wiak ngal ngawiz daehz. 8 Trawsz an kleuhz klahz keu diz daz an maang pinya keui nahz, ‘Aez ehz nahz nam man pehz teur nyaenz luz, ngal ngawiz ehz ngaz ngat.’ 9 Keuiz daz trawsz an maang pinya keui mial daz, ‘Nam aez, beuk cih ceun diz nam kumz ta ehz boh ta pehz leui. Khahz yal tawiz ti ihz saz nam man tui ta pehz nahz lah.’ 10 Meuz keuh yeung khahz yal ne tahz seu naaoz phraeoz truz, tang trawsz an peun tan keui kut tuhz pawiz kopz ku teur tawiz daehz rae dapz thengz keur wah.
11 Trawsz an kleuhz klahz keu diz kaw phraeoz truz maanyz lawk keur wah daz, ‘Tahz, tahz, lawk ehz nahz keur wah luz!’ 12 Keuiz daz tahz seu naaoz mial daz, ‘Ohz daz mawn pehz nahz, ohz nam mas pehz.’”
13 Yesuhz kaw daz, “Kawp ceun diz rae seu tih pao raez. Kawp daz pehz nam mas kraao seu ngihz an diz.”
Pung taek kuanz leng keu waiz
14 “Samz thaengz prih kaang raaoz ngaz naeh ceun ni. Maang ihz hawkz ngaz lae reung dengz rae raak kuanz leng daehz aapz aez keuh nahz phrihz phrahz daehz. 15 Aapz aez keuh nahz tawiz reung dengz kyahz keuh, aez hawkz nahz paekz khamz hanz cawi, hawkz nahz seu komz, thaengz hawkz nahz seu cawi rae hnhz lae reung dengz. 16 Kuanz leng an bawnz hanz cawi ne lan ka luat daehz eunz rae myaat thaengz hanz cawi. 17 Naeh ceun diz kuanz leng an bawnz seu komz kaw ka rae myaat thaengz seu komz. 18 Keuiz daz kuanz leng an bawnz seu cawi ne kawngz lu rae unz mok khamz tahz daehz tuhz keu tehz.
19 Meuz a wa ceu nawhz baaiz ne tahz keuh weng truz nap craangz keuh. 20 Meuz ceun diz kuanz leng an bawnz kham hanz cawi ne truz aez tahz daehz nahz rae daz, ‘Tahz, mih aapz aez ohz nahz hanz cawi, ohz myaat thaengz hanz cawi.’ 21 Tahz hnhz mial daz, ‘Kyahz, kuanz leng an rak boh an maang saet ca aez, mih a wa cih tawz boh kaai an kyehz. Ohz ngaz aez mih khriungz kaai an heungz. Seuz tawiz tahz daehz raez.’ 22 Kuanz leng an bawnz seu komz kaw truz aez tahz daehz nahz rae daz, ‘Tahz, mih aez ohz nahz seu komz, ohz myaat thaengz seu komz.’ 23 Tahz hnhz mial daz, ‘Kyahz, kuanz leng an rak boh an maang saet ca aez, mih a wa cih tawz boh kaai an kyehz. Ohz ngaz aez mih khriungz kaai an heungz. Seuz tawiz tahz daehz raez.’ 24 Kuanz leng an bawnz seu cawi kaw truz cu tahz daehz nahz rae daz, ‘Tahz, ohz mas mih naeh ihz cih kreuk, woc leh ti daehz nam plihz, rawmz leh ti daehz nam peuk seumz. 25 Kawp ceun diz ohz doz rae lan unz mok khamz mih tuhz keu tehz. An ni naeh paekz mih.’ 26 Tahz hnhz kaw daz kuanz leng an diz nahz, ‘Kuanz leng meukz rae raang laac aez, mih mas boh ohz woc leh an daehz nam plihz, rawmz leh an daehz nam peuk seumz haz? 27 Kawp ceun diz mih taan leh khamz ohz plawiz yangz. Beuk cih ceun diz meuz ohz phraeoz ne bawnz tang toz tang yangz. 28 Leh khamz seu cawi kaai hnhz rae aez an maang seu kawlz cawi nahz. 29 Kawp daz kaai ihz maang ne ngaz aez thaengz, kaai ihz nam maang samz truatz leh tang an hnhz maang. 30 Wah thengz kuanz leng nam taap lan an bimz thaz nawk raez. A diz hnhz bawnz yaam boh teur kak raangz.”
Soz boh paehz
31 “Meuz Kuanz Kingz Ihz truz pa tang bunz Daehz boh tawiz teu maan kaang raaoz Daehz ne Hnhz ngaz keu dez kaai plaang maang bunz. 32 Kheuz ihz hacz aamz keui ngaz teur cuhz aacz ngaai Hnhz. Hnhz ngaz teur phraez keuh ceun ihz damz soz teur phraez soz boh paehz. 33 Hnhz ngaz mok soz keui aez naeh thaz takz kaaiz daehz, paehz keui aez naeh thaz takz dahz daehz. 34 Meuz diz Khunz ngaz lao ihz an naeh thaz takz kaaiz Daehz keui nahz, ‘Pehz an bawnz an rak Paz Ohz keui aez, truz caam a moi prih an raenz mok pehz nahz thaz meuz prih keu tehz tae ne raez. 35 Kawp daz meuz Ohz coh seum suamz ne pehz aez Ohz nahz seum suamz, meuz Ohz coh omz kaw pehz aez Ohz nahz omz tiangz. Meuz Ohz penz ihz seuk laek kaw pehz damz Ohz. 36 Meuz Ohz nam maang kreung kaw pehz aez Ohz nahz kreung kap. Meuz Ohz penz kaw pehz lum la Ohz. Meuz Ohz klaez thang kaw pehz truz yawt Ohz.’ 37 Meuz daz ceun diz ne ihz keu sangz keui ngaz maanyz Khunz daz, ‘Tahz, ehz Mih coh rae ehz damz Mih nahz meu naeh? Ehz awlz Tahz ehz coh omz rae ehz aez omz tiangz meu naeh? 38 Ehz awlz Tahz ehz penz ihz seuk laek rae ehz damz meu naeh? Nam maang kreung rae aez kreung meu naeh? 39 Ehz awlz Mih nam penz rae ehz lum la meu naeh? Ehz awlz Mih klaez thang rae ehz lan yawt meu naeh?’ 40 Khunz kaw mial daz, ‘Ohz daz mawn pehz nahz, an pehz cih kaai kuanz mai an kyehz lak ihz ne a wa cih kaai Ohz.’
41 Samz lao ihz an naeh thaz takz dahz keui nahz, ‘Ihz an talz kin keui aez, praasz Ohz rae lan cu tuhz ngal raai cen cen an raenz mok aez Manaat boh phiz hnhz keui nahz. 42 Kawp daz meuz Ohz coh ne pehz nam aez Ohz nahz seum suamz, meuz Ohz coh omz kaw pehz nam aez Ohz nahz omz tiangz. 43 Meuz Ohz penz ihz seuk laek kaw pehz nam damz Ohz, meuz Ohz nam maang kreung kaw pehz nam aez Ohz nahz kreung kap. Meuz Ohz penz, meuz Ohz naeh tuhz thang kaw pehz nam truz yawt Ohz.’ 44 Meuz ceun diz keuh ngaz maanyz Hnhz, ‘Tahz, ehz awlz Mih ehz coh seum suamz seum tiangz, awlz Mih penz ihz seuk laek, awlz Mih nam maang kreung, awlz Mih penz, awlz Mih klaez thang rae ehz nam truz yawt Mih meu naeh?’ 45 Hnhz mial daz, ‘Ohz daz mawn pehz nahz, an pehz nam cih kaai an kyehz lak ihz keu ni ne nam cih kaai Ohz.’ 46 Keuh kaw bawnz lan ti talz taam cen cen, keuiz daz ihz keu sangz keui samz bawnz lan ti imz cen cen.”