Ihz kyaam piamz Yesuhz
(Markus 14:1-2, Lukas 22:1-2, Yohn 11:45-53)
26
Meuz Yesuhz a wa daz an keu diz ne lao teu paez Daehz keui nahz, 2 “Pehz mas boh pawiz lawt phez ne lo thaengz taw aarz seu ngihz pan. Kuanz Kingz Ihz ne ngaz talz ihz aapz Daehz, tawkz piamz kaai lakz klawngz klaengz”3 Meuz phangz an diz beunz caangz keui, ihz mawh tuhz ihz keui teur cuhz daehz tuhz hawz Kaiaphas an naeh ceu beunz. 4 Keuh teur lao daehz aez rah mat Yesuhz rae piamz Hnhz. 5 Keuh daz, “Yak maat cih kaai seu ngihz pawiz, doz ihz ronyz.”
Nam man hawm thawkz sapz kingz Yesuhz a pruh Bethani
(Markus 14:3-11, Yohn 12:1-8)
6 Meuz Yesuhz naeh pruh Bethani a kaang keuh Simon ihz tut ne, 7 maang keun nyah hawkz truz cu Hnhz, keun nyah an diz leh nam man hawm langz mawh seu teur dawngz reu aangz keun ra rae thawkz sapz kingz Hnhz meuz Hnhz yeung suamz. 8 Meuz teu paez Hnhz keui awlz an diz ne sunz ca rae daz, “Cih naehz cih aez thengz maat a?” 9 Saz nam man hawm an langz mawh an diz rae aez ihz phaanz keui nahz luz.
10 Keuiz daz Yesuhz mas lawng an ni rae daz, “Cih naehz lah pehz ya phawmz ceum keun nyah an ni a? Hnhz a wa cih rak kaai Ohz. 11 Kawp daz ihz phaanz keui naeh kawmz pehz se se, Ohz samz nam naeh kawmz pehz se se. 12 An keun nyah an ni thawkz nam man hawm kaai toz Ohz ne naeh an raenz mok ngaz saangz keo Ohz. 13 Ohz daz mawn pehz nahz, meuz khahz krai reu oiz rak tuhz prih keu tehz klawhz ti ne ngaz bawnz krai tang reung cih keun nyah an ni aez naeh ta seum tang a hnhz.”
14 Meuz phangz an diz Yudas Iskariot an naeh tuhz teu paez seu kawlz aarz ne lan cu beunz caangz keui 15 rae daz, “Beuk ohz aapz Yesuhz a pehz ne pehz ngaz aez ohz nahz seu naeh?” Keuh dawkz aez hnhz nahz paekz ron waiz kawlz. 16 Tae leh seu ngihz an diz Yudas khahz kraao aapz Yesuhz.
Yesuhz suamz kawmz teu paez Daehz kaaiz pawiz lawt phez
17 Meuz kaai seu ngihz seun teungz pawiz kaaiz mun nam maang ceu ne teu paez keui truz cu Yesuhz maanyz daz, “Sunz aez ehz raenz Mih nahz ti suamz kaaiz pawiz lawt phez a naez?”
18 Yesuhz mial daz, “Pehz lan cu ihz hawkz tuhz weng rae daz hnhz nahz, ‘Tahz sra ehz daz, kraao Ohz a wa thatz, Ohz ngaz suamz kaaiz pawiz lawt phez tang teu paez Ohz a kaang pehz.’”
19 Teu paez keui kaw cih tawiz ceun Yesuhz lao rae raenz pawiz lawt phez a diz.
20 Meuz teuk borz ne Yesuhz keu dez suamz kawmz teu paez Daehz seu kawlz aarz a pheunz. 21 Meuz keuh yeung suamz boh ne Yesuhz daz, “Ohz daz mawn pehz nahz, Tuhz pehz ne maang hawkz ngaz saz kokz Ohz.”
22 Keuh teur aacz daehz phawmz kyehz baaiz rae teur aacz daehz maanyz Hnhz daz, “Tahz, naeh ohz haz?”
23 Yesuhz mial daz, “Ihz an nyuh kawmz Ohz tuhz sroz ne ngaz saz kokz Ohz. 24 Kuanz Kingz Ihz ne ngaz bawnz lan ceun taemz mok lawng Hnhz tuhz kyaamz lik. Keuiz daz ihz an saz kokz Kuanz Kingz Ihz ne bawnz an nam rak. Ihz an diz khanz nam keut baaiz rak.”
25 Yudas an ngaz saz kokz Hnhz kaw maanyz, “Tahz, naeh ohz haz?” Yesuhz kaw daz hnhz nahz, “Naeh ceun mih daz ne.”
Pawiz Caoh
(Markus 14:22-26, Lukas 22:14-20, 1 Korin 11:23-25)
26 Meuz keuh yeung suamz boh ne Yesuhz leh kaaiz mun, taang kez cuz Phraz rae pekz aez teu paez Daehz keui nahz, Hnhz daz, “Teur aacz daehz leh suamz raez, kaaiz mun an ni naeh toz Ohz.”
27 Hnhz kaw leh thaengz tang klakz, taang kez cuz Phraz rae aez keuh nahz, Hnhz daz, “Teur aacz daehz tiangz an ni raez. 28 Kawp daz an ni naeh naamz Ohz, an cih peuk klakz traz an prawm teun mehz Phraz Pen Caoh, an lae ta plawiz lawt reung dengz kawi ihz heungz keui nahz. 29 Ohz lao pehz, co Ohz maat tiangz kawmz pehz omz seu pit teun meh tuhz Prih Paz Ohz tui, Ohz nam tiangz thaengz omz plaehz seu pit leui.”
30 Keuh kaw ngawk lae lan cu rang Olip.
Yesuhz lao teuk aacz Petros tiunz thengz Daehz
(Markus 14:27-31, Lukas 22:31-34, Yohn 13:36-38)
31 Meuz diz Yesuhz daz keuh nahz, “Borz meu ni pehz hacz aamz ngaz tiunz thengz Ohz ceun taemz mok tuhz kyaamz lik daz, ‘Ohz ngaz tiz piamz ihz damz soz rae wungz soz keui ngaz baak beuz.’ 32 Keuiz daz waaiz Ohz meu rae imz tui Ohz ngaz lan aacz pehz prih Kalile.”
33 Petros mial daz, “Sangz daz keuh tiunz thengz hacz aamz kaw ohz nam tiunz thengz Mih laz laz.”
34 Yesuhz daz Petros nahz, “Ohz daz mawn mih nahz, borz meu ni co yaerz maat keu dawrz ne mih ngaz daz daehz nam mas Ohz waiz laehz.”
35 Petros mial daz, “Sangz daz ohz bawnz yam kawmz Mih kaw ohz nam daz daehz nam mas Mih.” Teu paez keui hacz aamz kaw teur aacz daehz daz ceun diz.
Yesuhz suz tawngz tuhz sraakz Ketsemane
36 Meuz Yesuhz boh teu paez keui lan phraeoz a sraakz Ketsemane ne Hnhz daz teu paez Daehz nahz, “Meuz Ohz lan suz tawngz a tui ne keu dez ngawm a niz raez.” 37 Hnhz raak Petros boh kuanz Sebede keu aarz tawiz Daehz. Hnhz phawmz kyehz rae kinz phawmz. 38 Hnhz daz keuh nahz, “Phawmz Ohz peur teuk baaiz paw raenz yam. Keu dez a niz rae pao yawt ohz raez.”
39 Hnhz lan thaz ngaai teur nyaenz rae suz tawngz daz, “Oz Paz, beuk caang kaw kraai klakz peur teuk an ni thaz Ohz, keuiz daz yak aez naeh ceun Ohz sunz, aez naeh ceun Mih sunz.”
40 Hnhz kaw mial truz cu teu paez Daehz keu waiz ne awlz keuh yaetz reuk ngeut rae daz Petros nahz, “Taw seu na ri kaw pehz nam ngawm bawnz Ohz haz? 41 Yak aez pehz klaez tuhz reung dengz kyaam ya ne suz tawngz rae pao yawt raez. Khuanz phawmz ne sunz cih boh kaw toz ne caang onz onz.”
42 Hnhz mial lan thaengz seu laehz rae suz tawngz daz, “Oz Paz, beuk caang kaw yak aez Ohz bawnz tiangz klakz an ni, aez peun thengz Ohz lah, keuiz daz yak aez naeh ceun Ohz sunz, aez naeh ceun Mih sunz.” 43 Hnhz mial truz thaengz kaw awlz teu paez keui yaetz reuk ngeut boh, kawp daz keuh nam pae plaakz ngaai daehz.
44 Kaai waiz laehz ne Hnhz lan suz tawngz thaengz ceun Daehz suz tawngz laehz aacz ne leun. 45 Hnhz kaw mial truz cu teu paez Daehz rae daz keuh nahz, “Pehz yeung yaetz preumz boh haz? Yawt, kraao Kuanz Kingz Ihz talz aapz tuhz tihz ihz raai ne a wa phraeoz. 46 Rawi lah, ehz lan leuk lah! Ihz saz kokz Ohz a wa phraeoz.”
Ihz cawpz Yesuhz
(Markus 14:43-50, Lukas 22:47-53, Yohn 18:3-12)
47 Meuz Hnhz yeung daz boh ne Yudas an naeh tuhz seu kawlz aarz kaw phraeoz truz tawiz wungz ihz an beunz caangz boh ihz mawh cao truz ne khaenz tang waac tang kawn. 48 Ihz an saz kokz Hnhz lao mok keuh nahz ti peun tang daz, “Ihz an ohz kuny ne naeh Hnhz keuiz, mat Hnhz lah.”
49 Hnhz truz cu luat Yesuhz rae daz, “Heuiz Tahz.” Daz kaw kuny Hnhz. 50 Yesuhz mial daz, “Raen, rip cih an mih lo truz cih raez.” Meuz ceun diz ihz keui truz cu Yesuhz rae mat leh. 51 Meuz diz luat ihz hawkz an naeh kawmz Yesuhz ne truatz waac daehz, mak peur cao ceu beunz, keu tiakz hnhz seu plaakz paw teutz. 52 Yesuhz daz hnhz nahz, “Leh waac sapz mok tuhz kaang daehz raez, kawp daz ihz tawnz waac ne yam kawp waac leun. 53 Seu ni mih thaang Ohz nam maanyz bawnz a Paz Daehz, aez Hnhz plawiz truz luat tap mawh teu maan kaang raaoz seu kawlz aarz tap leuz haz? 54 Beuk naeh ceun diz an taemz mok ceun tuhz kyaamz lik daz ngaz bawnz naeh ceun ni ne ngaz cih seu naez keunyz?”
55 Meuz phangz an diz Yesuhz daz wung ihz keui nahz, “Pehz khaenz waac, khaenz kawn truz mat Ohz ceun conz haz? Ohz keu dez sawnz aez a wat klawhz seu ngihz ne pehz nam mat Ohz. 56 Keuiz daz an ni ngaz bawnz naeh hacz, aez keunyz kyaamz ihz taangz phraz keui.” Teu paez Hnhz keui kaw tiunz thengz Hnhz hacz aamz.
Yesuhz phraeoz a rumz
57 Ihz mat Yesuhz keui leh lan cu Kaiaphas an naeh ceu beunz. Ihz mawz kyaamz boh ihz mawh keui a wa teur cuhz boh a diz. 58 Petros kaw lan tawiz Hnhz nam thatz nam yaan, taw phraeoz tuhz teun laangz hawz ceu beunz. Hnhz kut tuhz teun leukz, keu dez kawmz siukz an pao rae ngawm yawt ngaz naeh ceun nae. 59 Beunz caangz boh ihz tuhz rumz hacz aamz keui khahz ihz khaam saak se an pleung rae aez caang piamz Yesuhz. 60 Sangz daz ihz tang heungz keui khaam saak se an pleung kaw keuh nam awlz ti pleung. Maang ihz keu aarz truz thaz puatz ne 61 daz, “Hnhz an ni daz, ‘Daehz ngaz ya thengz wat Phraz Pen Caoh rae cih mial tuhz waiz seu ngihz.’”
62 Ceu beunz ceng maanyz Yesuhz daz, “Mih nam tawpz naehz leui haz? Ihz keu ni upz khatz Mih nahz naehz?” 63 Keuiz daz Yesuhz moh pras pras. Ceu beunz kaw daz Hnhz nahz, “Ohz teung kaao kaai Phraz Pen Caoh an phawmz imz ne daz, anz Mih anz Khris, Kuanz Phraz Pen Caoh hoh?”
64 Yesuhz mial daz, “Naeh ceun mih daz ne. Ohz lao pehz nahz waaiz an ni pehz ngaz awlz Kuanz Kingz Ihz keu dez plaakz takz kaaiz Tahz taanz khoz mawh rae tumz truz peu eumz.”
65 Ceu beunz kaw siarz thengz cung cui daehz rae daz, “Hnhz a wa upz pleung Phraz Pen Caoh! Ehz lo thaengz saak se naehz leui? 66 Pehz thaang ceun nae?”
Keuh tawpz daz, “Hnhz a wa trohz yam.”
67 Meuz phangz an diz keuh teuk chuz sapz omz nyaangz tawz ngaai Hnhz, leh keu neumz tihz phak Hnhz. Teur ka kaw paapz Hnhz 68 rae daz Hnhz nahz, “Tak yawt luz Khris, yaeh tiz Mih?”
Petros thiangz thengz Yesuhz
(Markus 14:66-72, Lukas 22:56-62, Yohn 18:15-18,25-27)
69 Meuz Petros keu dez thaz nawk ihz tuhz teun leukz ceu beunz ne maang keun nyah kyehz an naeh peur cao ceu beunz hawkz truz daz hnhz nahz, “Mih kaw naeh kawmz Yesuhz an naeh ihz prih Kalile.”
70 Keuiz daz Petros thiangz thengz aacz ngaai keuh hacz aamz daz, “Ohz nam mas mih daz naehz?” 71 Meuz hnhz lan cu keur wah sraakz ne maang keun nyah thaengz hawkz awlz hnhz rae daz ihz an naeh a diz keui nahz, “Hnhz an ni naeh kawmz Yesuhz ihz weng Nasaret.”
72 Petros teung kaao rae thiangz thengz thaengz daz, “Ohz nam mas ihz an diz!”
73 Moh thaengz seu co, ihz an ceng boh a diz ne truz cu thatz Petros rae daz, “Mih kaw naeh mawn cumz keuh, kawp daz teuk ngarz mih upz kaw mas boh.”
74 Petros kaw teung kaao rae daz, “Ohz nam mas ihz an diz.”