Leh Yesuhz lan cu Khunz Pilat
(Markus 15:1, Lukas 23:1-2, Yohn 18:28-32)
27
Meuz teuk ngup cao cao ne beunz caangz boh ihz mawh keui teur lao aez daehz caang piamz Yesuhz. 2 Keuh mat Yesuhz lan aapz a Pilat, an naeh khunz Rom, an upz peungz prih Yio.Yudas seuk ruat daehz yam
3 Meuz Yudas an saz kokz Yesuhz ne ngarz Yesuhz talz taam yam kaw caanz daehz cih pleung, hnhz leh paekz ron waiz kawlz, lan aez mial tawz beunz caangz boh ihz mawh. 4 Hnhz daz, “Ohz a wa cih pleung kawp ohz saz kokz aez ihz piamz ihz nam maang reung dengz kawi naehz.” Keuh mial daz, “Nam an thaz ehz, an diz naeh thaz mih eu.”
5 Meuz ceun diz Yudas wiurz teuk klaez paekz tuhz wat kaw lae lan. Hnhz kaw lan aarz diz rae seuk ruat daehz yam.
6 Beunz caangz keui leh paekz an diz rae daz, “Paekz an ni naeh langz naamz, sapz tuhz teuk paekz lu tuhz wat ne nam tawiz traz ehz.” 7 Keuh kaw teur lao daehz yal ti sraakz ihz mawz cih klohz, aez naeh ti peun lu ihz tang kheuz keui nahz. 8 Kawp ceun diz ihz keui raak sraakz an diz naeh Keu Tehz Naamz taw phraeoz seu ngihz meu ni.
9 An ni aez keunyz mony reu ma ihz taangz phraz Yeremiah daz, “Keuh leh paekz ron waiz kawlz, an kheuz Israel keui phyaat langz Hnhz ne 10 yal sraakz ihz mawz cih klohz, ceun Phraz Cen Cen lao mok ohz.”
Khunz Pilat caetz Yesuhz
(Markus 15:2-5, Lukas 23:3-5, Yohn 18:33-38)
11 Meuz Yesuhz ceng boh aacz ngaai khunz Pilat ne khunz maanyz Hnhz,
“Mih naeh Khunz Yio haz?” Yesuhz mial daz, “Naeh ceun mih daz ne.” 12 Meuz beunz caangz boh ihz mawh keui maap Hnhz ne Hnhz nam tawpz naehz.
13 Khunz Pilat kaw maanyz Hnhz, “Mih nam ngarz ihz keu ni maap upz khatz Mih hiuz?”
14 Keuiz daz Yesuhz nam thaw hawkz hawkz. Khunz kaw sangz mawn baaiz.
Yesuhz talz taam yam
(Markus 15:6-15, Lukas 23:13-25, Yohn 18:39, 19:16)
15 Tuhz pawiz lawt phez an diz khunz tomz plawiz aez ihz klaez khawk hawkz ceun ihz maanyz. 16 Meuz phangz an diz maang ihz klaez khawk an reu oiz lae hawkz, mus hnhz daz Barapbas. 17 Kawp ceun diz meuz wungz ihz keui teur cuhz daehz ne Khunz Pilat maanyz keuh daz, “Sunz aez ohz plawiz pehz nahz ihz an nae? Barapbas haz, nam anz kaw Yesuhz an raak Khris haz?” 18 Kawp daz hnhz mas keuh seuk ke rae keuh aapz Yesuhz.
19 Meuz Khunz Pilat keu dez kaai plaang tatz traz ne, yah hnhz cao ihz truz lao hnhz daz, “Yak cih naehz kaai ihz nam maang reung dengz kawi. Kawp daz seum wawh ohz awlz Hnhz tuhz yaetz reu muh rae kinz phawmz baaiz.”
20 Keuiz daz beunz caangz boh ihz mawh keui srawz srawz wungz ihz maanyz aez khunz plawiz Barapbas rae aez piamz Yesuhz. 21 Khunz kaw maanyz thaengz, “Kaar keu ni sunz aez ohz plawiz pehz nahz an nae?”
Keuh tawpz daz, “Barapbas.”
22 Khunz Pilat kaw maanyz, “Ohz ngaz cih seu naez kaai Yesuhz an raak Khris ne hoh?” Keuh hacz aamz daz, “Tawkz piamz Hnhz kaai lakz klawngz klaengz raez!” 23 Khunz Pilat kaw maanyz thaengz, “Kawp naehz? Hnhz cih pleung naehz?”
Keuiz daz keuh baaiz raak usz daz, “Tawkz piamz Hnhz kaai lakz klawngz klaengz raez!”
24 Meuz Khunz Pilat mas daehz nam lao bawnz, naeh ti rawhz ronyz peun wany rae leh omz khez tihz daehz aacz ngaai keuh, hnhz daz, “Ihz an ni yam ne nam anz thaz ohz, naeh thaz pehz eu.”
25 Ihz hacz aamz kaw tawpz daz, “Reung dengz kawi an piamz Hnhz ne aez naeh kaai ehz boh kaai kuanz ehz.”
26 Hnhz kaw plawiz aez keuh nahz Barapbas. Samz cao ihz rotz Yesuhz rae aez ihz tawkz piamz kaai lakz klawngz klaengz.
Siukz cih peuk pyaak Yesuhz
(Markus 15:16-20, Yohn 19:2-3)
27 Meuz ceun diz siukz khunz keui raak Yesuhz kut tuhz teu laangz hawz rae siukz tang tap keui truz wit wit Yesuhz. 28 Keuh pucz kreung Hnhz, aez kap cung cui rong eurz. 29 Keuh leh seur keutz taanyz cih paanz kumz rae supz sapz kingz Hnhz. Aez Hnhz tawnz kawn teur law thaz takz kaaiz, keuh seuk deumz aacz ngaai Hnhz rae cih peuk pyaak Hnhz daz, “Heuiz, Khunz Yio ne aez naeh an rak se kamz.” 30 Keuh teuk chuz sapz Hnhz nahz omz nyaangz rae leh kawn teur law tiz kingz Hnhz. 31 Waaiz keuh a wa cih peuk pyaak ne keuh pucz cung cui, kap aez mial kreung Hnhz rae leh Hnhz ngaz lan tawkz piamz kaai lakz klawngz klaengz.
Tawkz Yesuhz kaai lakz klawngz klaengz
(Markus 15:21-32, Lukas 23:26-43, Yohn 19:17-27)
32 Meuz keuh lae lan ne keuh awlz ihz weng Siren hawkz, mus hnhz daz Simon, keuh peun pae aez hnhz baekz lakz klawngz klaengz Yesuhz. 33 Meuz keuh phraeoz ti Kolkotha, an loz daz ti klakz kingz ne, 34 keuh aez Hnhz nahz omz seu pit an seuk rah mok an cangz. Hnhz cim yawt keuiz daz nam tiangz.
35 Keuh leh Hnhz tawkz kaai lakz klawngz klaengz rae pohz ceu kawk leh kreung Hnhz. 36 Keuh kaw keu dez pao yawt Hnhz a diz. 37 Leh lik maap an taemz mok daz, “Yesuhz, an naeh Khunz Yio,” ne tawkz lang kol kingz Hnhz. 38 Maang conz keu aarz tawkz mok kaai lakz klawngz klaengz kawmz Hnhz, takz kaaiz Hnhz seu lakz, takz dahz Hnhz lakz.
39 Ihz datz lan keui krasz kingz daehz, saehz Hnhz daz, 40 “Ihz an ya thengz wat rae moh waiz seu ngihz cih mial ne aez, beuk Mih naeh mawn Kuanz Phraz Pen Caoh kaw khyawt toz daehz rae cur thaz lakz klawngz klaengz raez.”
41 Beunz caangz, ihz mawz kyaamz boh ihz mawh keui kaw cih peuk pyaak tang daehz ceun diz. 42 Keuh saehz daz, “Hnhz khyawt bawnz ihz, keuiz daz Hnhz nam khyawt bawnz toz daehz! Beuk Hnhz naeh Khunz Israel kaw aez cur thaz lakz klawngz klaengz seu ni luat, ehz kaw ngaz yum Hnhz. 43 Hnhz a wa yum Phraz Pen Caoh, beuk Phraz Pen Caoh sunz khyawt kaw aez khyawt leh Hnhz. Kawp Hnhz a wa daz, ‘Ohz naeh Kuanz Phraz Pen Caoh.’”
44 Conz an tawkz mok kaai lakz klawngz klaengz kaar diz kaw saehz Hnhz ceun diz laai.
Lawng Yesuhz yam
(Markus 15:33-41, Lukas 23:44-49, Yohn 19:28-30)
45 Kraao seu ngihz keun cang taw waiz na ri teuk borz ne an bimz reupz lan tang prih. 46 Kraao teuk borz waiz na ri ne Yesuhz raak reus usz usz daz, “Eli, Eli, lama sabacthani?” An loz daz, “Phraz Ohz, Phraz Ohz, kawp naehz Mih caang daz plawiz thengz Ohz a?”
47 Meuz ihz teur ka an ceng boh a diz keui ngarz an diz ne daz, “Hnhz raak Eliyas.” 48 Tuhz keuh ne maang hawkz rip lan leh seuk pawhz nyuh sapz tuhz omz seu pit praang, mok a cawkz kawn teur law rae leh aez Hnhz, aez Hnhz nyuak.
49 Ihz teur ka samz daz, “Teungz mah raez, ehz pao yawt anz Eliyas ngaz truz khyawt Hnhz.” 50 Yesuhz raak reus usz usz thaengz rae plotz phawmz Daehz.
51 Meuz phangz an diz pahz kangz tuhz wat plaakz waak lae aarz plaakz thaz kol taw thaz wa. Reu yung kruhz rae reu aangz mawh keui haakz. 52 Peun lu keui seuk lawk rae toz yam ihz seu ngamz keui meu rae imz. 53 Waaiz Yesuhz meu rae imz ne keuh lae truz thaz peun lu rae kut tuhz weng seu ngamz, plaez ihz keui nahz toz daehz.
54 Meuz ihz mawh siukz an upz seu peur ya boh siukz an pao Yesuhz keui, awlz reu yung kruhz boh awlz an naeh keu diz ne doz baaiz. Keuh daz, “Hnhz an ni naeh mawn Kuanz Phraz Pen Caoh eu.” 55 Keun nyah an heungz a diz keui moh teun yaan yawt. Keun nyah keu diz truz tawiz Yesuhz thaz prih Kalile, an tawiz cih damz Hnhz. 56 Tuhz keuh ne pa Mari Makdalen, Mari mah keuh Yakop boh Yosep, boh yah Sebede.
Saangz keo Yesuhz
(Markus 15:42-47, Lukas 23:50-56, Yohn 19:38-42)
57 Meuz teuk borz ne maang ihz maang hawkz phraeoz truz, mus hnhz daz Yosep, ihz weng Arimathea, teu paez Yesuhz kaw anz. 58 Hnhz lan cu khunz Pilat maanyz toz yam Yesuhz. Khunz Pilat kaw lao aez hnhz leh toz yam. 59 Yosep leh toz yam, leh banz aamz an rak ne wian toz Hnhz, 60 mok tuhz peun lu tham reu aangz teun mehz, an daehz kawngz mok. Hnhz kling reu aangz mawh hawkz bitz tuhz peun lu kaw lae lan. 61 Mari Makdalen boh Mari thaengz hawkz keu dez waaiz ngaai cu peun lu.
Siukz an pao tawz peun lu
62 Ceun kap siz, kaai seu ngihz sinz ne beunz caangz boh Pharise keui lan cu khunz Pilat, 63 keuh daz, “Ehz tang mony reu ma ihz kaoz an diz meuz Hnhz yeung naeh ne daz, ‘Moh waiz seu ngihz Ohz ngaz meu rae imz boh,’ da. 64 Kawp ceun diz lao aez pao peun lu thonz taw waiz seu ngihz. Doz teu paez Hnhz keui truz rah leh toz yam Hnhz mok yaan yaan rae daz ihz nahz, ‘Hnhz a wa meu rae imz thaz reung dengz yam.’ Kawp ceun diz an kaoz thaz puatz ne ngaz na lak laehz aacz boh.”
65 Khunz Pilat mial daz, “Pehz maang boh siukz pao seu cumz, seu pehz penz bawnz ne lan pao peun lu raez.”
66 Keuh kaw lan pao peun lu, maaiz mok tang reu aangz aez daehz mas ihz kling nam kling rae aez siukz keui pao.