Yak nae ihz
7
“Yak nae ihz, beuk cih ceun diz Phraz Pen Caoh kaw nam nae pehz. 2 Kawp daz seu pehz nae ihz ne pehz kaw talz seu diz, pehz tuang aez ihz nahz seu naeh kaw pehz ngaz bawnz seu diz. 3 Nam awlz hikz khaehz tuhz ngaai daehz samz awlz mun tuhz ngaai kuanz mai daehz seu naez? 4 Mih lao kuanz mai daehz nahz ceun nae, ‘Aez ohz leh thengz mun tuhz ngaai mih naz,’ samz nam yawt hikz khaehz tuhz ngaai daehz cih naehz? 5 Ihz seuk cih aez, leh thengz aacz hikz khaehz tuhz ngaai daehz raez, waaiz an diz mih caang awlz caem caem mun tuhz ngaai kuanz mai daehz eu.6 Yak aez sohz keui nahz an seu ngamz. Yak seum patz aez lek keui nahz saengz plaez. Beuk mih cih ceun diz keuh leh cawng paenz teuk nac rae truz kak pehz.”
Maanyz, khahz, khrakz
7 “Maanyz raez, ngaz bawnz. Khahz raez, ngaz awlz. Khrakz keur wah raez, ngaz lawk aez boh pehz nahz. 8 Ihz maanyz keui bawnz, ihz khahz keui awlz, ihz khrakz keur wah kaw ngaz lawk aez boh. 9 Tuhz pehz ne maang yaeh, beuk kuanz hnhz maanyz kaaiz mun samz leh aez reu aangz? 10 Beuk maanyz kahz ne anz maang paz an leh aez heunyz? 11 Pehz naeh ihz nam rak kaw mas boh leh aez kuanz daehz nahz an rak, Paz pehz an naeh lang kaang raaoz tui baaiz aez ihz maanyz Hnhz keui nahz an rak.
12 Pehz sunz aez ihz cih daehz ceun nae kaw cih kaai ihz ceun diz. An ni naeh ti wa kyaamz sinz Moses boh kyaamz ihz taangz phraz keui hacz aamz.”
Keur wah seuk ngiak boh keur wah waas
13 “Kut tuhz keur wah seuk ngiak raez. Kawp daz keur wah lan ti luh ne waas, reung dengz kaw yoh, ihz kut tuhz keur wah an diz kaw heungz. 14 Keur wah kut tuhz an phawmz imz ne seuk ngiak, reung dengz kaw kreuk. Ihz awlz rae kut ne lany.”
Teungz boh plaehz
15 “Seu tih ihz taangz phraz plawmz keui raez, keuh truz cu pehz raang naeh ceun soz, keuiz daz tuhz nao keuh naeh ceun sohz prawk raai. 16 Yawt leh plaehz keuh kaw mas teungz. Cing seur keutz nam plaehz plaehz seu pit. Teungz seur keutz nam plaehz plaehz laangz wah. 17 Teungz rak kaw plaehz rak, teungz nam rak kaw plaehz nam rak. 18 Teungz rak nam caang plaehz plaehz an nam rak, teungz nam rak kaw nam caang plaehz plaehz an rak. 19 Teungz an plaehz nam rak keui ngaz teunyz sapz tuhz ngal. 20 Kawp ceun diz yawt leh plaehz keuh kaw mas keuh.”
Ohz nam ti mas pehz
21 “Ihz an raak Ohz, ‘Tahz, Tahz,’ keui ngaz nam bawnz kut tuhz prih kaang raaoz klawhz ihz, keuiz daz ihz cih tawiz reung dawhz Paz Ohz an naeh lang kaang raaoz pan bawnz kut a. 22 Kaai seu ngihz an diz ihz heungz baaiz ngaz truz lao Ohz daz, ‘Tahz, Tahz, ehz leh mus Mih a wa rawz, a wa wah thengz phiz, a wa plaez an laak laaiz.’ 23 Meuz ceun diz Ohz ngaz lao keuh nahz keu sangz, ‘Ohz nam ti mas pehz, ihz cih meukz keui, tiunz yaan yaan Ohz raez.’”
Ihz cih kaang keu aarz
24 “Kawp ceun diz ihz ngarz mony reu ma Ohz rae cih tawiz ne naeh ceun ihz maang pinya cih kaang tam kaai reu aangz. 25 Cung klaez, omz lus, kurz pat kaang an diz kaw kawp daz tam kaai reu aangz rae nam yaatz.
26 Ihz ngarz mony reu ma Ohz rae nam cih tawiz ne naeh ceun ihz kleuhz klahz cih kaang tam kaai macz. 27 Cung klaez, omz lus, kurz pat kaang an diz ne yaatz. An yaatz an diz na baaiz.”
A na Yesuhz