Maanyz an laak laaiz
16
Pharise boh Saduse keui sunz caam yawt Yesuhz rae truz maanyz aez cih plaez an laak laaiz kaang raaoz. 2 Yesuhz mial daz, “Meuz teuk borz ne pehz teuk soz awlz peu eumz rong kaw pehz daz, ‘Prih omz ne ngaz plaangz.’ 3 Meuz teuk ngup ne pehz teuk soz awlz peu eumz rong kaw pehz daz, ‘Ngaz maang cung longz kurz longz.’ Pehz leh ngaai yawt plengz ne mawz tak boh, keuiz daz pehz yawt an laak laaiz an Ohz cih kraao seu ni ne pehz nam mawz tak. 4 Naeh kheuz ihz meukz raai boh ihz nam maang keu tih ceun pehz ne maanyz yawt an laak laaiz, neuz lak an laak laaiz Yonah ne nam plaez an laak laaiz naehz.”Waaiz an diz Yesuhz kaw praasz keuh lan aarz diz boh.
Wiar ceu Pharise boh ceu Saduse
5 Meuz keuh yeung lo omz ne teu paez keui teur wil leh kaaiz mun. 6 Yesuhz daz keuh nahz, “Mok seu tih! Pehz wiar thengz ceu Pharise boh ceu Saduse raez.”
7 Keuh teur deuiz teur daz daehz nahz, “Kawp ehz nam leh truz kaaiz mun keuiz.”
8 Yesuhz kaw mas rae daz keuh nahz, “Ihz reung dengz yum lany keui aez, kawp naehz teur daz daehz nahz nam maang kaaiz mun a? 9 Maat tuhz lawh haz? Anz pehz nam tang meuz kaaiz mun khanz damz ihz hanz rengz ne seutz an leuz seu naeh piat? 10 Meuz leh kaaiz mun teu pulz damz ihz ponz rengz ne seutz an leuz seu naeh yol? 11 Cih naehz pehz nam loz phawmz an Ohz lao nam anz lawng kaaiz mun? Mok seu tih ceu Pharise boh ceu Saduse raez.”
12 Keuh kaw loz phawmz daz, Hnhz nam lao keuh nahz lawng ceu kaaiz mun keuiz daz lao mony sawnz Pharise boh Saduse keui.
Petros daz Yesuhz naeh Khris
13 Meuz Yesuhz lan eungz Kaesare Philippi ne Hnhz maanyz teu paez Daehz, “Ihz keui daz Kuanz Kingz Ihz naeh yaeh?”
14 Keuh mial daz, “Teur ka daz naeh Yohn tahz teuk sruz, teur ka daz naeh Eliyas, teur ka daz naeh Yeremiah nam anz kaw ihz taangz phraz seu hawkz hawkz.”
15 Yesuhz maanyz keuh, “Pehz samz daz Ohz naeh yaeh hoh?”
16 Simon Petros kaw daz, “Mih naeh Khris, naeh Kuanz Phraz Pen Caoh an phawmz imz.”
17 Yesuhz mial daz, “Simon, kuanz Yonah aez, mih bawnz an rak kawp daz ihz lao plaez mih nam anz, naeh Paz Ohz kaang raaoz lao plaez mih nahz. 18 Ohz lao mih, mih naeh Petros loz daz reu aangz, Ohz ngaz tae cumz caoh kaai reu aangz an ni, taanz khoz ngal raai keui nam pae bawnz cumz caoh an ni. 19 Ohz ngaz aez mih nahz sawz prih kaang raaoz keui, an mih mat tuhz prih keu tehz ne ngaz mat mok lang kaang raaoz, an mih khawz mok tuhz prih keu tehz kaw ngaz khawz mok lang kaang raaoz.”
20 Yesuhz lao teu paez Daehz keui nahz yak aez keuh lao ihz nahz Daehz naeh Khris.
Yesuhz lao teuk aacz an Daehz ngaz yam
21 Tae leh kaanz diz Yesuhz lao plaez teu paez Daehz keui nahz loz loz, Daehz ngaz lan weng Yerusalem rae talz suhz peur teuk kaai tihz ihz mawh keui, beunz caangz keui boh ihz mawz kyaamz keui. Daehz talz ihz piamz, keuiz daz moh waiz seu ngihz meu rae imz boh.
22 Petros kaw nap Yesuhz lae thaz nawk keuh rae nae Hnhz daz, “Aez Phraz Pen Caoh kan se kamz lah Tahz. Yak aez naeh kaai Mih hawkz hawkz.”
23 Yesuhz waaiz yawt Petros daz, “Tiunz Ohz yaan yaan, Satan, mih naeh seum keun doz aez Ohz taz, mih nam wonz ceun Phraz, samz wonz ceun ihz.”
24 Yesuhz daz teu paez Daehz keui nahz, “Beuk yaeh sunz tawiz Ohz kaw bawnz thiangz thengz toz daehz, baekz lakz klawngz klaengz daehz rae tawiz Ohz. 25 Ihz an sunz khyawt phawmz daehz ne ngaz luh sumz, ihz luh sumz phawmz kawp Ohz ne ngaz bawnz phawmz cen cen. 26 Ihz hawkz an diz peung tang prih keu tehz hacz aamz kaw beuk khuanz phawmz hnhz luh sumz ne maang a keoz naehz? Leh naehz teur yal bawnz khuanz phawmz ihz? 27 Meuz Kuanz Kingz Ihz ngaz truz pa tang bunz Paz Daehz boh teu maan kaang raaoz Daehz ne phrawz aez klawhz ihz nahz an rak an raai ceun keuh cih. 28 Ohz daz mawn pehz nahz, ihz an naeh a niz teur ka keui beuk keuh maat awlz Kuanz Kingz Ihz penz khunz tuhz prih Daehz truz ne keuh maat bawnz yam.”