Injili dza yorejwevyo ni
YOHANA
Ndwahiyo
Hi hii injili yoregwa ni mwanafund̯i jwa Yesu eyeakihanwa Yohana. Huyu ewa ndiye huyu mwanafund̯i jwa Yesu amutsakiye muno (13:23).
Kuzimuni mwa hichi chuo Yohana kahuyanga kwamba Yesu ni ga. Koro kamba Yesu ni Chuuwo cha Muungu na ni Muungu (1:1). Kula kintu kiumbwa kuchiiya nae na kwa dzamboḍye (1:3). Kisa Yesu ndiye huyu Mwana Mbuzi jwa Muungu jwa kunuya nabvise za lumwengu (1:29).
Humu chuoni Yohana kora dzuu ya mafara mafungahe ya kumakisa ya Yesu ahendeyeyo. Hii inayanga kwamba Yohana kakuhuimusyani kwamba Yesu ni Mwana jwa Muungu ḍugha. Haya haya mafara mafungahe ni kwamba:
1. Yesu kapfyehuza madzi kuwa mvinyo (2:1-12)
2. Yesu kapfonya mwana jwa mukuu mumodza (4:43-54)
3. Yesu kapfonya muntu kihewi geri ya bwola ḍya Betiseḍa (5:1-15)
4. Yesu kaisa wantu zaid̯i ya elefu nsano (6:1-15)
5. Yesu kenenda dzuu ya madzi (6:16-21)
6. Yesu kapfonya muntu eyekuwa ntumbu matso hangu kuvyajwani (9:1-41)
7. Yesu kamufufuya Lazaro (11:1-44)
Lengo ḍya Yohana ḍya kwora hichi chuo, ni kuwahendeza wantu wahikize kwamba, Yesu ni Mwana jwa Muungu na ndiye huyu Masiya. Na kwa kumuhikiza jeje huweze kupata maisha ya kuunga na yuungo (20:31). Kakuhuyangani wazi tswee kwamba, Yesu ndiye hi njia ya kwendea kwa Muungu (14:6). Koro Muungu kajutsaka lumwengu hat̯a kamuyavya Mwanawe madiani, ili kula amuhikiziye atsekwaara, ela awe na maisha ya kuunga na yuungo (3:16).
Yeyo humu chuoni kwa ufufi kwa ufufi
Yesu ndiye Chuuwo cha Muungu 1:1-18
Mayongweezo ya Yohana Mut̯opya 1:19-34
Yesu katsana wanafund̯iwe wa d̯ura 1:35-51
Mafara ya kumakisa ya Yesu ahendeyeyo 2:1-12:50
Ḍyuma ya mwiso ya Yesu - Hukumu yakwe na kufwakwe 13:1-19:42
Kufufuka kwa Yesu 20:1-10
Yesu kawat̯upukia wanafund̯iwe 20:11-21:25