MAHENDO
ya Ntumi
Ndwahiyo
Hichi ni chuo cha pfii chorejwecho ni Luka chima cha mwaka wa 65 ḅaad̯a ya kudza kwa Ḅwana Yesu. Chuo chakwe cha d̯ura oreyecho ni hichi chichonahanwa Injili dza yorejwevyo ni Luka.
Hichi hichi chuo cha Mahendo ya Ntumi kigija kusumwiiya namuna ya hawa wanafund̯i wa Yesu waḍabviyevyo kuihenda hi kazi ya Yesu awayatsiiyeyo waihende lumwenguni. Koro asidzapfaa yuwinguni, Yesu ewa kawaḍama kawamba wende lumwenguni kwonse wakasumwiiye haya Maagu Mema na kuwahendeza wantu kuwa wanafund̯i wakwe (Mat. 28:18-20). Na pia ewa kawamba, “Munawa mashaahiḍi wangu hangu Yerusalemi, nsi yonse ya Yud̯aya na Samaria, na hat̯a yukungo jwa lumwengu.” (1:8) Ndookomu hichi hichi chuo chakusumwiiyani namuna yehii kazi iḍabviyevyo na namuna ya Ukirist̯o ud̯achaiyevyo kuntu garagara. Chakusumwiiyani dzuu ya mad̯ina ya hawa wanafund̯i wakuntiyeyo wepfowakiihenda hi hii kazi na namuna ya Muungu evyokuwa pfamodza nao. Hichi chuo kiḍabva na kusumwiiya dzuu ya kudza kwa Ruhu Mudheru, adziyeakiwadzaza nguvu hawa wanafund̯i. Chuo chonse kiyanga wazi namuna ya nguvu za Ruhu Mudheru zihendeyevyo kazi kuchiiya na kwa hawa wanafund̯i. Humu chuoni, Luka kasumwiiya namuna ya hichi chuuwo cha Muungu kiwafikiiyevyo wantu hat̯uwa kwa hat̯uwa. Kwa mufaano:
1. Namuna ya tsanganiko ḍiḍabviyevyo Yerusalemi (dhango ḍya 1-2)
2. Injili isumwiijwa Yerusalemi na Yud̯aya yonse (dhango ḍya 3-7)
3. Injili isumwiijwa kwa Wasamaria na wantu wa vyeet̯i vingine (dhango ḍya 8-12)
4. Injili isumwiijwa sehemu zingine za lumwengu (dhango ḍya 13-28)
Ḅaad̯a ya Yesu kuhwajwa kwenda mbinguni, ḍiwa dzambo dzumu kwa wanafund̯iwe kumuhwaa muntu asikwaa Muyahud̯i dza muntu jwa Muungu. Wenji wekit̯ara kwamba Yesu ekudzia Wayahud̯i t̯u. Ela kuzimuni mwa hichi chuo cha Mahendo ya Ntumi, huyu Ruhu Mudheru kaviyanga tswee kwamba Yesu kadzia kupfonya hangu weo Wayahud̯i na hat̯a wasikwaa Wayahud̯i. Cha Muungu echonatsaka ni kwamba wantu wonse, wa kula kyeet̯i na kaḅila wawe wantuwe.
Saḅaḅu ingine ya Luka kwora hichi chuo ni kuyanga kwamba ntaku kiḍechonse chichonaweza kuvingira kud̯achaa kwa haya Maagu dzuu ya Kirist̯o. Yowa 28:30-31.
Yeyo humu chuoni kwa ufufi kwa ufufi
Yesu kapfaa Mbinguni 1:1-11
Kudza kwa Ruhu Mudheru 1:12-2:13
Maagu Mema yasumwiijwa Yerusalemi 2:14-7:60
Maagu Mema yafika Yud̯aya na Samaria 8:1-12:25
Charo cha d̯ura cha Paulo cha kwenda na kusumwiiya 13:1-14:28
Kikao cha Yerusalemi 15:1-35
Charo cha pfii cha Paulo cha kwenda na kusumwiiya 15:36-18:22
Charo cha hahu cha Paulo cha kwenda na kusumwiiya 18:23-21:16
Paulo kagijwa Yerusalemi 21:17-23:22
Paulo kapfiikwa Kaisaria 23:23-26:32
Paulo kapfiikwa d̯ubini Rumi 27:1-28:31