Yohana 1

Injili dza yorejwevyo ni

YOHANA

Yesu ndiye Chuuwo cha maisha

1 Hangu hapfaḍe ḍabvu lumwengu jusidzaumbwa, huyu eyeakihanwa Chuuwo ewa yupfo. Jeje ewa pfamodza na Muungu na ewa ni Muungu. 2 Hangu pfapfaḍe ḍabvu, huyu huyu eyeakihanwa Chuuwo ewa pfamodza na Muungu. 3 Kuchiiya na kwakwe jeje, Muungu kaumba kula kintu. Ntaku chiumbijwecho pfasipfo jeje. 4 Jeje ndiḍyo sina ḍya maisha yonse. Na haya haya maisha yamumpa mwanaad̯amu muyanga we hachi. 5 Hu muyanga wakuyangaani humu kizani na wala hichi kiza ntachidzaweza kuumiya hu muyanga.

6 Kwiwa muntu eyeakihanwa Yohana, ahumijwe ni Muungu 7 kudzashuhuḍia wantu dzuu ya hu muyanga. Kahumwa kudzashuhuḍia ili wantu wapate kuhikiza haya maagu. 8 Yohana mwenye ewa siye hu muyanga. Jeje ewa kadza t̯u kudzashuhuḍia dzuu ya hu muyanga. 9 Hu muyanga wa ḍugha wa kudzayangaiya wantu wonse, wiwa wakudzani lumwenguni.

10 Huyu eyeakihanwa Chuuwo kadza lumwenguni, na ingawa huju lumwengu juumbwa kuchiiya na kwakwe jeje, hawa wantu wa huju lumwengu ntawakumuhambuya. 11 Kadza nsini mwao, ela wantuwe wao wenye ntawakumupfokea. 12 Ela hawaḍe wonse wamupfokeeyeo, yani hawaḍe wamuhikiziyeo, kawapfa hachi ya kuwa wana wa Muungu. 13 Ntawakuwa wana wa Muungu kwa kuvyajwa wanaad̯amu ambu kwa njia ya kumanyana kimwii wala kwa mupango uḍewonse wa kiwanaad̯amu. Ela Muungu mwenye ndiye awahendezeye kuwa wanawe.

14 Huyu eyeakihanwa Chuuwo kawa mwanaad̯amu na kaishi kahi yehu. Huuona uwezowe mukuu, yani uwezo eo nao dza Mwana jeje heket̯u jwa huyu Baba. Kahuyanga winji wa matsakoye kwehu na kahupfa kumanya kula kintu dzuu ya Muungu.

15 Yohana kashuhuḍia hi ya hachi dzuuye epfolalabva akyamba, “Huyu ndiye nyambiye kakudzani nyuma yangu ela ni mukuu kunichia mimi, maanaye ewapfo hangu nisidzavyajwa.” 16 Na kuyawana na winji wa matsakoye kwehu, hwonse kahuhendea wema mwinji na mwinji. 17 Muungu kaiyavya hi *Sharia kuchiiya na kwa Musa, ela matsakoye na kula kintu dzuuye kachiyanga kuchiiya na kwa Yesu *Kirist̯o. 18 Ntaku amuoneye Muungu lamud̯a huyu Mwana jwa Muungu jeje heket̯u ambaye jeje mwenye ni Muungu. Jeje na huyu Baba wana uhusiano wa hafufi muno, na ndiye amuhendezeye huyu Baba amanyikane aivyo.

Yohana Mut̯opya kawaimusya Wayahud̯i kwamba jeje ni ga

19 Wakuu wa Kiyahud̯i wa mudzi wa Yerusalemi wamuhumia Yohana wakohani na *Walawi wenda wamuuza wamwamba, “Wewe u ga?” 20 Yohana nkakuwafitsa kintu, kawambia wazi tswee kawamba, “Mimi simi huyu *Masiya.” 21 Nao wamuuza wamwamba, “D̯ubva u ga? U Eliya?” Jeje kawambukuya kawamba, “Moro, sikwaa Eliya hat̯a!” Nao wamuuza kawii wamwamba, “Mani d̯ubva ndiwe ayu nabii hwiyekuindiiyani?” Nae kawambukuya kawii kawamba, “Mimi sikwaa huyu *nabii mwiyekuindiiyani hat̯a!” 22 Ndookomu wamuuza wamwamba, “Mani d̯ubva wewe u ga? Hwambie ili hupate ḍyiḅu ḍya kuwapfiikia hawa wahuhumiyeo.” 23 Yohana kawambukuya na hivi vyuuwo vya nabii Isaya kawamba,

“Mimi ni huyuḍe muntu eyekulalabvani yuwandani akyamba,

‘Irongaaryeni njia ya Ḅwana.’ ”

24 Wangine wa hawa wantu weohumwa kwa Yohana wewa ni *Mafarisayo. 25 Nao wamuuza wamwamba, “Ikwaakwamba wewe siwe ayu Masiya, wala siwe Eliya ambu huyu nabii, kut̯i d̯ubva kwakut̯opyani wantu?”

26 Yohana kawambukuya kawamba, “Mimi nyakut̯opyani wantu na madzi, ela kahi yenu kuna musiyemumanya kwamba ni ga. 27 Jeje kakudzani nyuma yangu, ela sinamala hat̯a kufunguya milao ya viyahuvye.”

28 Haya haya yonse yahendeka mudzi wa Betania. Yahendeka ḍanda ya muyao dzuwa ya tsana ya Yorod̯ani, huku kwa Yohana ekoakit̯opya wantu.

Yesu ndiye huyu jwa kunwiiya wantu nabvise

29 Ḅaad̯a ya kuhumijwa hawaḍe wantu, chamukoche Yohana kamuona Yesu akwakumudziani, nae kamba, “Huyu ndiye huyu Mwana Mbuzi jwa Muungu adzeenuya nabvise za lumwengu! 30 Nipfonikinena kwamba, ‘Kuna muntu awee kudzani nyuma yangu ela ni mukuu kunichia mimi, maanaye ewapfo hangu nisidzavyajwa,’ ninkinena dzuu ya huyu huyu muntu. 31 Mimi mwenye niiwa sidzi kwamba ayu jwa kudza nyuma yangu ni ga. Ela hat̯a vivyo nidza nyakut̯opyani wantu na madzi ili nipate kuwahendeza hawa wantu wa Isiraeli wamuhambuye huyu huyu muntu kwamba ni ga.”

32 Makisa Yohana kashuhuḍia kamba, “Nimuona huyu Ruhu jwa Muungu akisuka kuyawa yuwinguni dza ndiwa akidza akimuhama na akihangat̯a nae. 33 Niiwa sidzamanya ya kwamba ewa ndiye huyu jwa kudza nyuma yangu. Ela huyu Muungu anihumiye kut̯opya wantu na madzi ewa kanyamba, ‘Kudzamuona huyu Ruhu akimusukia muntu kisa akihangat̯a nae. Ḅasi huyo ndiye huyu jwa kut̯opya wantu na Ruhu Mudheru.’ 34 Nami haya haya yonse niyaona na matso yangu mwenye, na nyakumushuhuḍiani ya kwamba huyu muntu ni Mwana jwa Muungu.”

Wanafund̯i wa d̯ura wa Yesu

35 Chamukoche, Yohana ewa pfamodza na wanafund̯iwe wawii kawii. 36 Yohana akidzaakimuona Yesu kakuchiani, kamba, “T̯ayowani! Huyuḍe, huyu Mwana Mbuzi jwa Muungu.” 37 Hawa wanafund̯iwe wowii wakidzawakimusikia akinena hivi, nao wamuuḅa Yesu.

38 Yesu akidzaakiperuka na akiwaona wakumuuḅani, kawauza kawamba, “Munaa?” Nao wamwambukuya wamwamba, “Raḅi (yani Mwaalimu), unakaa ku wewe?” 39 Nae kawamba, “Nzoni nimuyange huku nikonakaa.” Nao hawa wanafund̯i wowii wagijana na Yesu na wendawapfaona hapfa epfoakikaa. Hihiiḍe saa iwa chima cha saa kumi za mioro na wakaa pfamodza nae kwehiḍe nsiku.

40 Mumodza jwa hawa wantu wowii wamuuḅiyeo Yesu ḅaad̯a ya kumusikia Yohana akinena dzuuye, ewa ni And̯erea ndugujwe Simioni Pet̯ero. 41 Cha d̯ura cha And̯erea ahendeyecho ni kwamba, kamupata Simioni, huyu ndugujwe, na kamwamba, “Humuona huyu Masiya.” Masiya maanaye ni Kirist̯o. 42 Makisa And̯erea kamuhwaa Simioni kamupfiika kwa Yesu. Yesu kamud̯eḍea Simioni gu, kisa kamwamba, “Wewe ndiwe Simioni mwana jwa Yohana. Ela sasa unahanwa Kefa.” (Kefa maanaye ni Pet̯ero.)

43 Chamukoche yakwe Yesu kahuna kwenda Galilaya. Kenda kamuona Filipo na kamwamba, “Niuḅa!” 44 Filipo ewa muntu jwa kuyawa Betisaiḍa, mudzi wa aḍe And̯erea na Pet̯ero. 45 Filipo kamuona Natanaeli na kamwamba, “Humuona huyu jwa Musa oreye dzuuye humu mwa hichi chuo cha Sharia, ambaye kwamba hawa manabii nao pia wora dzuuye. Jeje ni Yesu mwana jwa Yusufu jwa kuyawa mudzi wa Nazareti.” 46 Natanaeli kamwamba, “Kuna dzema ga ḍya kuyawa mudzi wa Nazareti?” Filipo kamwambukuya kamwamba, “Nzoo udzioneye mwenye.”

47 Yesu epfomuona Natanaeli kakumudziani, kamba, “Huyu ni Muisiraeli kindindi. Jeje nka makulekule yaḍeyonse!” 48 Natanaeli kamuuza kamwamba, “Kunimanyadze?” Yesu kamwambukuya kamwamba, “Nikuona wipfokuwa nsi ya muhi wa mutini kaḅila Filipo nkadzakuhana.” 49 Natanaeli kamwamba, “Mwaalimu, hakika wewe u Mwana jwa Muungu ḍugha! Wewe u Haju jwa Isiraeli!” 50 Yesu kamwambukuya kamwamba, “Niukwamba niwa nikuona ukiwa nsi ya mutini. Dze, kuhikiza kwa dzambo ḍyevyohivyo t̯u? Ḅasi unaona mambo makuu kuchia hayo!” 51 Makisa Yesu kongeza kunena kamba, “Hachi nyakumwambiani, mudzaziona hizi mbingu zikipfenuka, na malaika wa Muungu wakipfaa mbinguni na kusuka kwangu mimi Mwana jwa Ad̯amu.”