Yesu kapfonya muntu na nsiku ya Sabato
3
1 Nsiku ingine ya *Sabato, Yesu kanjia kawii *sunagogini. Na humuḍe kuzimu kwiwa muntu mumodza ahinamfiye mukono. 2 Na pia kwiwa na *Mafarisayo weowakilacha dzambo ḍya kumusit̯aki naḍyo Yesu. D̯ubva wekimuchimiza waone kwamba anamupfonya huyu muntu na nsiku ya Sabato ambu hat̯a. 3 Yesu kamuhana huyuḍe muntu ahinamfiye hu mukono kamwamba, “Nzoo hapfa usoni.” 4 Kisa kawauza hawa Mafarisayo kawamba, “Dze, ai *Sharia yehu inahumala kuhenda kintu ga na nsiku ya Sabato? Kuhenda dzambo dzema ambu kuhenda dzambo zuka? Kupfonya ambu kuyaga?” Ela wad̯urura mya! 5 Yesu kawahaaza na dzitso ḍya ngoro, koro kasikit̯iswa ni myojo yao myumu. Kisa kamwamba huyuḍe muntu ahinamfiye, “Ugonzowe hu mukonowo!” Huyuḍe muntu kaugonzowa na upfowa pfapfo. 6 Iyo saa hawa Mafarisayo wayawa nze. Kisa wao na wangine weonamuunga mukono *Herod̯e wenda waḍabva kuhenda mashauri ya kumuyaga Yesu.T̯ut̯a ya wantu imuuḅa Yesu
7 Kisa Yesu pfamodza na wanafund̯iwe, wanuka wenda geri ya ziwa ḍya Galilaya. Na wantu wenji na wenji waḍabva kumuuḅa. Wangine wewa wayawa Galilaya, na wangine wayawa ḍyimbo ḍya Yud̯aya. 8 Wangine wayawa Yerusalemi na ḍyimbo ḍya Idumea. Na wangine wao wewa wayawa yombe jwa pfii jwa tsana ya Yorod̯ani na hat̯a ḍanda za midzi ya Turo na Sidoni. Wonse wamwendea Yesu kwa kwamba wesikia haya eyoakihenda. 9-10 Na kwa kwamba Yesu ewa kapfoza wantu wenji na wenji, wajwazi wonse wekikunduyana ili nangaa wamuhore t̯u. D̯ubva Yesu epfoona hivyo, kawamba wanafund̯iwe wamut̯ayarishie chombo kiḍoḍo, ili hi t̯ut̯a ya wantu itsekudzamuminya. 11 Na hawaḍe weokuwa na mpepfo nzuka, kula wepfowakimuona Yesu, wekidzigisa nsii usoni yakwe na kuḅaa madzwi wakyamba, “Wewe u Mwana jwa Muungu!” 12 Ela Yesu kawaseresa vyumuni watseenena kwa wantu kwamba jeje ni ga.
Yesu katsana ntumi kumi na wawii
13 Nyumae, Yesu kapfaa murimani dzuu na kahana hawaḍe atsakiyeo jeje, nao wamwendeya. 14 Katsana wantu kumi na wawii ahaniyeo, “*Ntumi,” wakae pfamodza nae na awahume nze kwendasumwiiya 15 na wawe na uwezo wa kuyavya mpepfo nzuka. 16 D̯ubva hawa kumi na wawii atsaniyeo ni hawa: Simioni amumpiye sari ḍya Pet̯ero, 17 Yakobo na Yohana wana wa Zebed̯ayo, awapfiyeo sari ḍya Boanage, yani wana wa ḅaḅat̯u. 18 Wangine ni aḍe And̯erea na Filipo, Bat̯olomayo, Matayo, Tomasi, Yakobo mwana jwa Alifayo, Tadayo, Simioni eyeakihanwa Janginaa na 19 Yud̯a Isikariota, huyu adzeyeakimuḍawanya Yesu.
Yesu ana nguvu kumuchia Belizebuli
20 Kisa Yesu na wanafund̯iwe wanjia nyumbani. Na kawii kut̯uut̯aa t̯ut̯a nkuu na nkuu ya wantu hat̯a Yesu na wanafund̯iwe ntawakupata namfasi ya kuḍya chakuḍya. 21 D̯ubva wantuwe wepfovipata maagu, wenda wakamuhwae koro wekit̯ara kwamba kakuyawani kitswa.
22 Kwiwa na waalimu wa Sharia weoyawa Yerusalemi. Nao wamba, “Huyu kanjijwa ni *Belizebuli, mukuu jwa mashaat̯ani. Na ndiye eyenamumpa nguvu za kuyavya wantu mpepfo nzuka.” 23 D̯ubva Yesu kawamba hawa wantu wadzikuntie hafufi nae, na kanena nao na mainganyo kawamba, “Shaat̯ani anaweza kumuyavya Shaat̯ani? 24 Uhaju uḍewonse ukigawika vit̯aro vya kupfingana vivyo kwa vivyo, uhaju dzao ntauwezi kusumama. 25 Na nyumba igawikiyeyo vit̯aro vya kupfingana vivyo kwa vivyo, nyumba dzayo ntaiwezi kusumama. 26 Ndookomu ikiwa kwamba Shaat̯ani kaḍabva kudzipfinga jeje mwenye, hu uhajuwe unawa kwamba ugawika, na ntauwezi kusumama, unagwa.
27 Ntaku eyenaweza kuvunza nyumba ya muntu mwenye nguvu aheke maliye pfasipfo nguzi kumufunga-funga huyu mwenye kisa rhefu, aheke maliye. 28 Hachi nyakumwambiani, nabvise zonse za wanaad̯amu na kukufuru kwao wanaweza kuyatsijwa. 29 Ela yuḍejwonse adzeyemukufuru Ruhu Mudheru, nkawezi kuyatsijwa meshi. Huyo anawa kwamba ana nabvise ya maishi.” 30 Yesu kanena dza hivi kwa kwamba wangine wekyamba ana mpepfo nzuka.
Mamajwe Yesu na wanduguzwe
31 Kisa wanduguzwe Yesu na mama jwao wenda hapfaḍe epfoakiyongweeza. Wasumama nze ye nyumba na wamuhumia muntu amuhane. 32 Yesu ewa karingwa ni t̯ut̯a ya wantu wakaiyeo chihako. Nao wamwamba, “Ḅwana, mamajo na wanduguzo wa hapfo nze wanatsaka kunena nawe.” 33 Ela Yesu kawambukuya kawamba, “Mama na wandugu zangu ni wa?” 34 Kahea matso kawayowa hawaḍe wamuringiyeo kisa kamba, “T̯ayowani, mama na wandugu zangu ni hawa! 35 Koro yuḍejwonse eyenahenda miro ya Muungu, huyo ndiye mama, ndiye ndugu yangu na ndiye imbu ḍyangu.”