Inganyo ḍya mushat̯a mbeju
4
1 Yesu kaḍabva kuyongweeza kawii geri ya ziwa. Kwiwa t̯ut̯a nkuu na nkuu ya wantu hat̯a kaona kwamba heri anjie chomboni. Epfonjia kakaa chihako, na hawa wantu wakaa na hapfaḍe gubani. 2 Kawayongweeza mambo menji na menji kwa mainganyo. Kawamba, 3 “T̯asikiani! Kwiwa na muntu mumodza endeye kushat̯ani mbeju. 4 Epfoakishat̯a, mbeju zingine zigwa njiani na ziḍigwa ni nsongo. 5 Mbeju zingine zigwa maweni kusikokuwa na mutsanga mwinji, na zimea haraka. 6 Ela kwa kwamba hi mitse ntaiwa na mizi yendeyeyo nsii, ipfobigwa ni dzuwa inyuuka ifwa. 7 Zingine zigwa miwani na hi miwa nayo ikuya iishumpanya hi mimea na ntaikuvyaa kintu. 8 Ela mbeju zingine zigwa kuntu kwa mutsanga munono. Zimea, zikuya na zivyaa chima cha nseensee miyongo mihahu zaid̯i ya hiviḍe zishat̯ijwevyo. Zingine zivyaa chima cha miyongo mihandahu na zingine gana, zaid̯i ya hiviḍe zishat̯ijwevyo.” 9 Kisa Yesu kawamba, “D̯ubva huyuḍe eye na masikio nasikiye!”Yesu keleza maana eyonasumwiiya na mainganyo
10 Yesu epfosaa jeje na wanafund̯iwe kumi na wawii na wantu wangine weowakimuuḅa, wamuuza dzuu ya haya mainganyo. 11 Nae kawambukuya kawamba, “Nywinywi muḍyaalijwa kuimanya hi siri ya Uhaju wa Muungu. Ela wangine wanayambijwa ḅasi kimafumbo. 12 Ndookomu,
‘Kuona wanaona,
ela ntawahambuye kintu.
Kupfindiiya wanapfindiiya,
ela ntawaimuke kintu.
Koro t̯ambere si hivyo,
wandemuperukia Muungu nae andewapfonya.’ ”
Maana ya hiḍi inganyo ḍya mushat̯a
13 Kisa Yesu kawauza kawamba, “Yani hat̯a hiḍi hiḍi inganyo ntamukuḍiimuka hat̯a? Mani d̯ubva munaweza kuimuka inganyo ḍingine ḍiḍeḍyonse? 14 Mushat̯a ni huyu eyenashat̯a chuuwo cha Muungu. 15 Wantu wangine waa dza hizi mbeju zigwiyezo njiani. Wanakisikia hichi chuuwo, ela iyo saa Shaat̯ani anakudza akachiwapfoka myojoni mwao. 16 Na wantu wangine waa dza hiziḍe mbeju zigwiyezo maweni. Wanakisikiiya hichi chuuwo cha Muungu na iyo saa wakachipfokea na tsekea muno. 17 Ela kwa kwamba hichi chuuwo ntachikungora myojoni mwao, faro yao ntaiwe na nguvu. Wakipatwa ni mad̯ina kwa dzambo ḍye chuuwo, iyo saa wanaziyekeza faro zao. 18 Wantu wangine waa dza hizi mbeju zigwiyezo miwani. Wanakipfokea hichi chuuwo, 19 ela mirumiru za huju lumwengu na makulekule ya ujabva na t̯amaa nyinji, zinawalinga na kukishumpanya hichi chuuwo. Ndookomu hichi chuuwo ntakivyae matunda yaḍeyonse maishani mwao. 20 Na hiziḍe mbeju zigwiyezo kwiiko na mutsanga munono, ni dza hawaḍe wantu weonakisikiiya hichi chuuwo na wakachigija na mojo mumodza. Maisha yao yanamuvyaiya Muungu matunda dza hiviḍe vya muhi wivyonavyaa mumpaka ukaara gomba.”
Mayongweezo ya Yesu yayeha muyanga
21 Yesu kongeza kunena kamba, “Kuna muntu eyenagiza tsaa kisa akaifinikiza na pishi ambu akaingiza t̯at̯ani kuzimu, ḅad̯ala ya kuipfatsika pfantu dzuu? 22 Koro kula kifitsikiyecho kidzayawiya wekeani tswee na kula chicho sirini kidzamanyikana. 23 D̯ubva awee na masikio nasikiye!”
24 Kisa kawamba, “Yapfindiiyeni muno hayaḍe mwiyonasikia! Hikiḍe kipimo mwichonapimia nacho wenzenu, ndicho mudzechopimijwa hat̯a na kufwachaa. 25 Koro huyuḍe eye na kintu na akikitumia, huyo anakwongezejwa. Ela huyuḍe asiye na kintu, ḅasi hat̯a hakaḍe kachuchu ekonako pia anakapfokwa.”a
Inganyo ḍya mbeju ivyonamea
26 Yesu kongeza kunena kamba, “Uhaju wa Muungu nauinganya na muntu mwenye nkonde endeye akishat̯a mbejuze. 27 Siku ukifika anayaa na nsi ikicha anayamuka. Azo hizi mbeju zinatsembuya na zinaḍabva kumea pfasipfo jeje kumanya kwamba vyakuhendekanidze. 28 Hu mutsanga ndiwo wiwonakuzya mumea. D̯ura kunatsembuza gomba, kisa kunapfatsika hiḍi suke, na mwiso hiḍi suke ḍinangiza chakuḍya. 29 Hi bvaro ikimawivwa, huyu muntu anaḍabva kuikekenta, kwa kwamba ngera ya mavuno ifika.”
Inganyo ḍya mbeju ya tsare
30 Kawii Yesu kamba, “Uhaju wa Muungu hundeuinganya na kintu ga? Ambu hundeweleza na inganyo ga? 31 Waa dza mbeju ya tsareb imeeyeyo nkondeni. Gula ndiyo mbeju ndoḍo ya mwiso kahi ya mbeju zonse. 32 Ela ikimea inawa muhi mukuu kuchia mihi ingine yonse ya nkondeni. Mahambiye yanawa makuu na hat̯a nyuni nao wanakudza na kudzielekanyia vitsanza humu mahambini.”
33 Yesu kawasumwiiya wantu chuuwo na mainganyo yangine menji dzayahaya. Kawasumwiiya chima wawezeyecho kusikiiya. 34 Yesu nkakunena na hawa wantu kiḍechonse pfasipfo mainganyo. Ela epfokuwa ndiye jeje na wanafund̯iwe wao heket̯u, ekiwaimusya maana ya haya mainganyo.
Yesu kabusa vut̯o
35 Iiḍe nsiku na mioro, Yesu kawamba wanafund̯iwe, “Nahuvukeni hiḍi ziwa hwende huḍoombe.” 36 D̯ubva waiyatsa hi t̯ut̯a ya wantu, wanjia humu chomboni mwa Yesu emokuwa na waḍabva kuvuka hiḍi ziwa. Vyombo vingine navyo viwauḅa na nyuma. 37 Wepfowakivuka, kuḍabva kubiga vut̯o kali na haya mawimbi yakibiga hichi chombo hat̯a kiḍabva kunjia madzi. 38 Ae huku Yesu ewa ka nsezi ye chombo, katsagamia mut̯o ekiyaa. D̯ubva wanafund̯iwe wamuyamusa wamwamba, “Mwaalimu, ntavikwakukumud̯ani hat̯a kwamba hwakuhihimiani?” 39 Yesu epfoyamuka, kaḍibusa hiḍi vut̯o na kayaamuru haya mawimbi kayamba, “Ingamaa! Ḍunda mya!” Na pfapfo hiḍi vut̯o ḍinyamaa na ziwa ḍyonse ḍiḍunda mya! 40 Kisa Yesu kawamba wanafund̯iwe, “Kut̯i mu woga dza hivi? Amaale ntamu faro hat̯a?” 41 Nao myojo iwanjia oga zaid̯i na waḍabva kuuzana wao na wao wakyamba, “Huyu huyu ni muntu aweedze, jwa kwamba hat̯a vut̯o na mawimbi navyo vinamut̯ii?”