Wake wazingiyeo na kumuhumikia Yesu
8
1 Makisa Yesu kanjia charo cha kwenda midzini na vidzidzini akisumwiiya *Maagu Mema ya Uhaju wa Muungu. Epfoakyenda ekigijana na hawa wanafund̯iwe kumi na wawii. 2 Wake wangine eopfonya nd̯wari na kuwayavya mpepfo nzuka nao wamuuḅa. Kahi yao weewa Maria jwa kuyawa Magid̯ala, eeyavigwa mpepfo nzuka mfungahe ni Yesu, 3 Yoana, muke jwa muhenda kazi mukuu jwa *Herod̯e ahanijwe Kuza, na Susana, pfamodza na wake wangine wenji wawahumikiiyeo na malit̯e yao, Yesu na wanafund̯iwe.Inganyo ḍya mushat̯a mbeju
4 Wantu wagija kumudzia Yesu kuyawa mudzi hat̯a mudzi. Na wepfot̯ut̯aa kit̯aro kikuu, Yesu kawayongweeza na mainganyo kawamba, 5 “Kwiwa na muntu mumodza endeye kushat̯ani mbeju. Epfoakishat̯a, mbeju zingine zigwa njiani zirangwa-rangwa na ziḍigwa ni nsongo. 6 Mbeju zingine zigwa maweni. Na kwa kwamba hu mutsanga ntawiiwa na madzi, hizi mbeju zipfotsembuya zinyuuka zifwa. 7 Zingine zigwa miwani na hi miwa nayo ikuya iishumpanya hi mimea na iiyaga. 8 Ela mbeju zingine zigwa kuntu kwa mutsanga munono na zivyaa chima cha nseensee gana zaid̯i ya hiviḍe zishat̯ijwevyo.” Yesu epfokwisa kunena hivi, kawalalabvia hawa wantu kawamba, “D̯ubva huyuḍe eye na masikio nasikiye!”
Yesu keleza maana eyonasumwiiya na mainganyo
9 Hawa wanafund̯i wamuuza Yesu wamwamba, “Maana ya hiḍi hiḍi inganyo ni?” 10 Nae kawambukuya kawamba, “Nywinywi muḍyaalijwa kuimanya hi siri ya Uhaju wa Muungu. Ela wangine wanayambijwa ḅasi kimafumbo.
Ndookomu kuona wanaona,
ela ntawahambuye kintu.
Kusikiiya wanasikiiya,
ela ntawaimuke kintu.”
Maana ya inganyo ḍya mushat̯a
11 Makisa Yesu kawamba, “Maana ya hiḍi inganyo ni haya. Hizi mbeju ni chuuwo cha Muungu. 12 Hizi mbeju zigwiyezo njiani, ni dza hawaḍe weonasikiiya chuuwo cha Muungu, ela Shaat̯ani akadza na kuchiwapfoka myojoni mwao, ili watseepata kuhikiza wapfonyegwe. 13 Mbeju zigwiyezo maweni ni dza hawaḍe weonakisikiiya chuuwo cha Muungu na wakachipfokea na tsekea. Ela kwa kwamba hichi chuuwo ntachikungora myojoni mwao, wanahikiza kwa mweedha t̯u. Na wakipatwa ni maḍemo, iyo saa wanaziyekeza faro zao. 14 Hiziḍe mbeju zigwiyezo miwani ni dza hawaḍe weonayasikiiya haya maagu, ela mirumiru za maisha na makulekule ya ujabva wa lumwengu huju vinawashumpanya. Ndookomu faro zao ntaziwezi kungora. 15 Na hiziḍe mbeju zigwiyezo kwiiko na mutsanga munono, ni dza hawaḍe wantu weonakisikiiya hichi chuuwo na wakachigija na mojo mumodza na kuwa na faro kwa Muungu. Kwa kuit̯isa kwao, maisha yao yanamuvyaiya Muungu matunda dza hiviḍe vya muhi wivyonavyaa mumpaka ukaara gomba.”
Inganyo ḍya tsaa
16 Yesu kongeza kunena nao kamba, “Ntaku muntu eyenagiza tsaa kisa akaifinikiza na kija ambu akaingiza t̯at̯ani kuzimu. Ishinu anaipfatsika dzuu ili hawaḍe weokunjiani humuḍe nyumbani wapate kuona. 17 Koro kula kifitsijwecho kidzayavigwa wekeani, na kula chicho sirini kidzayavigwa muyangani. 18 D̯ubva manyani mwivyonasikiiya, koro huyuḍe eye na kintu na akikitumia, huyo anakwongezejwa. Ela huyuḍe at̯ariyee kwamba ana kachuchu na akitsakatumia, ḅasi hat̯a hakaḍe kachuchu ekonako pia anakapfokwa.”a
Mamajwe Yesu na wanduguzwe
19 Nsiku modza Yesu epfoakisumwiiya, wanduguzwe na mamajwe wamwendea, ela kwa dzambo ḍye t̯ut̯a ya wantu, ntawakuweza kumufikia hafufi. 20 Muntu mumodza kamwamba, “Ḅwana, mamajo na wanduguzo wasumama hapfo nze wanatsaka kunena nawe.” 21 Ela Yesu kambukuya kamba, “Mama na wandugu zangu ni hawaḍe weonasikiiya chuuwo cha Muungu na kuchigija.”
Yesu kabusa vut̯o
22 Nsiku modza Yesu kawamba wanafund̯iwe, “Nahuvukeni hiḍi ziwa hwende huḍoombe.” Ndookomu wanjia chomboni wagonzowa. 23 Wepfowakivuka Yesu kanjia sinzizini. Iyo saa kuḍabva kubiga vut̯o humu ziwani, na haya mawimbi yakibiga hichi chombo na kiḍabva kunjia madzi hat̯a kisaa kuhihimia. 24 D̯ubva hawa wanafund̯i wamwendea Yesu na wamuyamusa wamwamba, “Ḅwana, Ḅwana, hwakuhihimiani!” Ndookomu kayamuka, kaḍibusa hiḍi vut̯o na haya mawimbi yanyamaa. Ziwa ḍyonse ḍiḍunda mya! 25 Makisa Yesu kawauza wanafund̯iwe kawamba, “Faro yenu yaku?” Ela wao wamaka na wanjijwa ni oga, na wauzana wao na wao wakyamba, “Huyu huyu ni muntu aweedze, jwa kwamba anaamuru hat̯a vut̯o na mawimbi, navyo vikamut̯ii?”
Yesu kapfonya muntu awee na mpepfo nzuka
26 Yesu na wanafund̯iwe wenda wojeka nsi ya Wagerasa, iyokuwa yombe jwa pfii ya ziwa ḍya Galilaya. 27 Yesu epfoyawa na humu chomboni, kat̯angerwa ni muntu jwa humuḍe mudzini eyekuwa na mpepfo nzuka kwa muḍa muyeya. Nkekivwaa nguo na wala nkekikaa nyumbani, ela ekiishi maḅeerani. 28 Epfomuona Yesu, kaḅaa idzwi kuu. Kamugwiya maguuni na kanena na idzwi kuu kamba, “Unamini Yesu Mwana jwa Muungu Awee Dzuu? Nakuyomba utsenikuntisa d̯ina!” 29 Kanena dza hivi koro Yesu ewa kaiamuru hi mpepfo nzuka iyoikimusumbuwa nsiku nyinji imuyawe. Hat̯a akyamijwa na kufungwa na minyoro maguuni na mikononi, anaihuna hi minyoro na kupfiikwa yuwandani ni mpepfo nzuka. 30 Makisa Yesu kamuuza, kamwamba, “Sariḍyo ndiwe ga?” Ae kamwambukuya kamwamba, “Sari ḍyangu ndimi ‘Ḍyeshi.’ ” Kanena hivi koro ewa kanjijwa ni mpepfo nzuka nyinji na nyinji. 31 Hizi mpepfo nzuka zimuyomba Yesu muno atseziamuru kwenda kwa hiḍi simo ḍisiḍyo mwiso.b 32 Hafufi na hapfaḍe, kwiwa gwolu nkuu ya nguyuwe iyoikiisa karimani dzuu. Ndookomu hizi mpepfo nzuka zimuyomba Yesu aziruhusu kuwanjia hawaḍe nguyuwe, nae kaziruhusu.
33 D̯ubva hizi mpepfo nzuka zimuyawa huyuḍe muntu na ziwanjia hawa nguyuwe. Gwolu yonse ya nguyuwe id̯arama yenda igwa ziwani. Na nguyuwe wonse wafwa madzi tswee! 34 D̯ubva hawa wat̯ungac wa hawaḍe nguyuwe kudzaona hivyo, wad̯arama wapfiika maagu midzini na makondeni. 35 Ndookomu wantu wahika kwendayowa haya yahendekeeyo. Wepfofika hapfaḍe pfa Yesu epfokuwa, wamuona huyuḍe muntu ayavijwe hizi mpepfo nzuka. Ewa kakaa chihako hafufi na Yesu akiwa kavwaa nguoze na ndiye na akilize nzima! Ndookomu nao wanjijwa ni oga. 36 Na kula aoneye haya mafara yahendekeeyo, kavisumwiiya mwenziwe namuna ya huyuḍe muntu apfonyejwevyo. 37 Wagerasa wonse wepfoyasikia haya yahendekeeyo, wanjijwa ni oga mukuu. Ndookomu wamuyomba Yesu anuke nsini mwao. D̯ubva Yesu kanjia chomboni kuuja. 38 Huyuḍe muntu ayavijwe mpepfo nzuka kamuyomba Yesu amuruhusu agijane nae. Ela Yesu kamugonzoza akimwamba, 39 “Uja nyumbani ukasumwiiye haya ya Muungu akuhendeeyo.” Nae huyuḍe muntu kendakaḍabva kuvisumwiiya mudzi muzima hivi vya Yesu amuhendeeyevyo.
Mwanamuke jwa Yairo na muke ahoreye lot̯a ḍya Yesu
40 Yesu epfouja hi ḍanda ingine yeḍi ziwa, kat̯angerwa ni t̯ut̯a ya wantu, koro wonse wekimuinda. 41 Makisa kudza muntu eyeakihanigwa Yairo, eyekuwa mumodza jwa wakuu wa *sunagogi. Kenda kamugwiya Yesu maguuni na kamuyomba ende nyumbani kwakwe. 42 Koro ewa na mwanamuke madiani jwa myaka kumi na miwii nae ewa hafufi kufwa. Yesu epfokuwa kwendani, wantu wamuminya ḍanda zonse. 43 Kahi yao kwiwa na muke eyekuwa na ujwazi wa kukakanyika mwazi. Hu huu ujwazi ewa kamakaa nao kwa myaka kumi na miwii, ela ntaku muntu awezee kumupfoza. 44 D̯ubva kenda na nyuma kenda kauhora hu mutse wa hiḍi lot̯a ḍya Yesu. Na iyo saa hu mwazi eoakikakanyika ut̯uma! 45 Yesu kawauza hawa wantu kawamba, “Ni ga anihoreye?” Kula muntu kakana. Pet̯ero kamwamba Yesu, “Ḅwana, ae wantu ntawakukuzunguuka na wakukukunduyani na kula ḍanda?” 46 Ela Yesu kamba, “Kuna muntu anihoreye. Koro nidzisikia kwamba kuna nguvu ziniyawiyezo zikipfonya muntu.” 47 Huyu muke akiona kwamba kahambujwa, kenda kwa Yesu huku akihehema na oga. Kamugwiya maguuni na kamusumwiiya kacha ya wantu maana amuhoreyeo na namuna apfonyejwevyo. 48 Yesu kamwamba, “Maama, faroyo ikupfonya. Enda na naghea.”
49 Yesu asidzakwisa kunena, kudza muntu kuyawa nyumbani kwa Yairo na kamwamba Yairo, “Huyu mwanamukeo kesakufwa, nkudzomusumbuwe Mwaalimu amaale.” 50 Ela Yesu kavisikia na kamwamba Yairo, “Nkudzouwe na shaka, wewe hikiza t̯u, nae anapfona.” 51 Wepfofika nyumbani kwa Yairo, Yesu kaamuru kwamba kutsenjia yuḍejwonse humu nyumbani, lamud̯a Pet̯ero, Yohana na Yakobo pfamodza na babajwe huyuḍe mwanamuke na mamajwe. 52 Kula mumodza hapfaḍe ewa kuiyani na kukikintika. Yesu kawamba, “Yatsani kuiya, koro huyu mwana nkakufwa, kakuyaani t̯u!” 53 Ela wao wamutseka, koro wemanya kwamba kafwa ḍugha. 54 Wepfonjia humuḍe chumbani mwa huyuḍe mwanamuke emokuwa, Yesu kamugija mukono, kamuhana kamwamba, “Mwanangu, nuka!” 55 Iyo saa ruhuye imugalia, na kanuka pfapfo. Na Yesu kaamuru kwamba wamumpe kintu cha kuḍya. 56 Hawa wavyazi wa huyuḍe mwanamuke wamaka muno, ela Yesu kawaseresa watsevimwambia yuḍejwonse hiviḍe vihendekeyevyo.