Yesu kapfonya muhumisi jwa mukuu mumodza jwa Kirumi
7
1 Yesu epfokwisa kuwambia wantu hayo mambo yonse, kenda Kaperinaumi. 2 Hukuḍe kwiwa mukuu jwa kit̯aro cha asikaria wa Kirumi eyekuwa na muhumwa amutsakie muno. Huyu muhumwa ewa mujwazi mund̯at̯i eyekuwa d̯uru ḍya mwiso. 3 Ndookomu huyuḍe mukuu jwa asikari epfopata maagu dzuu ya Yesu, kamuhumia wazee wa gasa ya Kiyahud̯i wakamuyombe ende akamupfonye huyu muhumwawe. 4 Wepfofika kwa Yesu wamuyomba muno wamwamba, “Muntu huyu anamala kupfegwa ugijowo. 5 Koro katsaka kyeet̯i chehu hat̯a kahumbakia *sunagogi.” 6 Ndookomu Yesu kagijana na hawaḍe wazee. Wepfofika hafufi ne nyumba, huyuḍe mukuu jwa asikari kahuma waḅamuzwe wakamwambe, “Ḅwana, nkudzodzisumbue kudza kwangu, koro mimi sikwaa hat̯a muntu jwa kwamba wewe unjie nyumbani mwangu. 7 Wala sit̯are kwamba namala kukudzia wewe mimi mwenye. Wewe nena chuuwo kimodza t̯u, na huyu muhumisi jwangu anapfowa! 8 Koro hat̯a nami nina wakuu wangu, na nina asikari weo nsii yangu. Ninkimwambia mumodza, ‘Enda,’ nae anakwenda. Ninkyambia yungine, ‘Nzoo,’ nae anakudza. Na ninkimwambia muhumwa jwangu, ‘Henda visiku,’ nae anavihenda.” 9 Yesu epfosikia haya kamaka. Ndookomu kachiperukia hichi kit̯aro chichochikimuuḅa kachamba, “Sidzaona muntu awee na faro nkuu dza hi hat̯a kahi ya Waisiraeli!” 10 Hawaḍe wazee wahumijweo wepfouja hukuḍe nyumbani, wamuona huyuḍe muhumwa kapfowa.Uwezo wa Yesu dzuu ya kufwa
11 Kit̯emo kachuchu ḅaad̯aye, Yesu kenda mudzi wiwonahanigwa Naini, na wanafund̯iwe pfamodza na t̯ut̯a nkuu ya wantu wamuuḅa. 12 Epfofika hafufi na lango ḍya mudzi kat̯ongana na wantu watsukwiiyeo mufu, eyekuwa mwanamuyume madiani jwa muke muchiwa. Kwiwa t̯ut̯a nkuu ya wantu pfamodza nae wayawiyeo humuḍe mudzini. 13 Yesu epfomuona huyuḍe muke muchiwa, kamufwiya t̯ei, makisa kamwendea kamwamba, “Nkudzoiye.” 14 Yesu kanuka kenda kaihora hi ḍyeneza na hawa wantu weoitsukuya wasumama. Makisa Yesu kamba, “Muurani, nuka.” 15 Ndookomu huyu mufu kanuka kaḍabva kunena na hawa wantu. Yesu kamugija mukono hat̯a kwa nina. 16 Wantu wonse weokuwapfo wagijwa ni oga na wamushad̯a Muungu wakyamba, “Hut̯upukijwa ni *nabii mukuu kahi yehu. Muungu kadzia kuhugija swiswi, wantuwe!” 17 Maagu dzuu ya Yesu yad̯achaa nsi yonse ya Yud̯aya na nsi zingine zingine zizokuwa hafufi.
Yesu kamungiza mojo Yohana Mut̯opya
18 Hawa wanafund̯i wa Yohana Mut̯opya wenda wamusumwiiya Yohana mambo yonse ya Yesu eyoakihenda. 19 Nae Yohana kahana wanafund̯iwe wawii kawahuma kwa Yesu kawamba, “Endani mukamuuze kwamba jeje ndiye ayu *Masiya hwiyekuyoweeyani kwamba anakudza, ambu huindiiye muntu yungine?”
20 Hawa wanafund̯i wepfofika kwa Yesu, wamwamba, “Yohana Mut̯opya kahuhuma hudze hukuuze kwamba wewe ndiwe ayu Masiya hwiyekuyoweeyani kwamba anakudza, ambu huindiiye muntu yungine?” 21 Hawaḍe wanafund̯i wepfofika hapfaḍe, Yesu ewa kupfonyani wantu weokuwa na nd̯wari garagara na kubusa mpepfo nzuka, na ntumbu matso kawapfa kuona. 22 D̯ubva wepfokwenda wakimuuza, Yesu kawambukuya kawamba, “Galani kwa Yohana mukamusumwiiye haya musikiiyeyo na muoneyeo. Mwambeni ntumbu matso wakuonani, vihewi wakwenendani, wajwazi wa kwanga wakupfozwani, makurud̯ud̯u wakusikiani, wantu wafwiyeo wakufufujwani, na makowesa wakusumwiijwani haya maagu mema.b 23 Na kawii mwambeni, kula asiye kajela nami kavodhyegwa.”
Yesu kanena dzuu ya Yohana Mut̯opya
24 D̯ubva hawa wanafund̯i wa Yohana wepfonuka, Yesu kaḍabva kunena ne t̯ut̯a ya wantu dzuu ya Yohana. Kawauza kawamba, “Mwipfokwenda kumusikiiya Yohana akuḍe yuwandani, mwikit̯aria kuona muntu eyedze? Mwikit̯aria kwendaona muntu eye dza yuḍanzi jwijonabigwa ni mpepfo jukadzivut̯ia ḅasi? 25 Ambu mwikit̯ara kwamba mwendaona muntu avwaiye nguo nyema nyema? Moro, weonavwaa dzevyohivyo ni wantu weonakaa madzumbani mwa mahaju. 26 Mwikit̯aria kwamba mwendaona muntu eyedze? Ntamwiikwenda kuona nabii? Ḅasi hachi nyakumwambiani, mwenda muona muntu eye hat̯a zaid̯i ya nabii! 27 Koro Yohana ndiye anenejwee humu matsoroni kwamba kadzahumigwa. Haya matsoro yamba,
‘Namuhuma ntumi jwangu usoni yako,
adzeielekanya njiayo.’
28 Hachi nyakumwambiani, kahi ya wanaad̯amu wonse waishiyeo, ntakudzawa na yuḍejwonse eye mukuu kumuchia Yohana Mut̯opya. Ela huyuḍe eye muḍoḍo jwa mwiso Uhajuni mwa Muungu, ni mukuu kumuchia Yohana.”
Yesu kanena dzuu ya wantu wadziziyeo maaguye ae na Yohana
29 (Wantu wonse, hat̯a *wahwaa kuwa, wepfosikia hivi vya Yesu aneneyevyo, wahikiza ya kwamba vyuuwovye viyawa kwa Muungu koro wet̯opyegwa ni Yohana. 30 Ela *Mafarisayo na waalimu wa *Sharia wawinga mupango wa Muungu atsakiyeo kuwahendea, wepfodziza kut̯opyegwa ni Yohana.)
31 Yesu kagija kunena kamba, “D̯ubva awa wantu wehii ngera ya yeo niwainganye na? Ni wantu weodze? 32 Waa dza vit̯aro vya wana weokutsezani moroni. Wana wa kit̯aro kimodza wanawalalabvia hawa wenzao we kit̯aro kingine wakawamba,
‘Nywinywi humwimbia meya ya kwamba muvine,
ela ntamukuvina.
Humwimbia meya ya masikit̯iko,
ela vivyo ntamukuiya!’
33 Ninena hivi kwa kwamba Yohana Mut̯opya epfokudza, ekifunga kut̯wa na wala nkekinwa mvinyo. Ela nywinywi mwamba kwamba ana mpepfo nzuka. 34 Nami *Mwana jwa Ad̯amu nidza, na naḍya na kunwa mvinyo na wantu, ela nywinywi mwakunenani kwamba mimi ni mwambi na ni murumi. Na pia mwakunenani kwamba mimi ni ḅamu jwa wahwaa kuwa na wantu wangine wanabvise! 35 Ela nyakumwambiani, mvidhyo iyonayawa kwa Muungu inaonekana kuwa ya hachi kuuḅana na mahendo ya hawaḍe wonse weonawa nayo.”
Yesu kahiijwa mafuha ni muke munabvise
36 Makisa Mufarisayo mumodza kamuhana Yesu akaḍye chakuḍya nyumbani kwakwe. Nae kenda nyumbani, kakaa chanoni kuḍyani. 37 Humuḍe mudzini kwiwa muke shudha. D̯ubva epfosikia kwamba Yesu kakuḍyani nyumbani mwa Mufarisayo, kadza na nt̯upa ya mafuha ghali ya manunkanto.c 38 Kasumama nyuma ya Yesu, hafufi na maguuye huku akiwa kuiyani. Hi mitsoziye imutsaposa Yesu haya maguu. Kisa kaḍabva kamufuta na hizi nywiize, na kuyanonea haya maguud na kuyahiiya manunkanto. 39 Huyuḍe Mufarisayo amuhaniye Yesu, epfoona haya, kat̯ara na mojoni kamba, “T̯ambere huyu muntu ni nabii ḍugha, andehambuya kwamba ayu muke eyekumuhorani-horani ni muke eyedze, koro ni shudha!” 40 Yesu kamuhuna mat̯aroye kamwamba, “Simioni, nina chuuwo nawe.” Ae kamwamba, “Nyambia, mwaalimu.” 41 Yesu kamba, “Kwiwa wantu wawii weokuwa na marando kwa muntu. Jwa d̯ura ewa na rando ḍya makuruḅembe magana matsano, na jwa pfii ewa na rando ḍya makuruḅembe miyongo mitsano. 42 Ntaku hat̯a mumodza jwao eyeweza kuipfa randoḍye. Ndookomu huyuḍe muntu kawayatsia marando yao wowii. D̯ubva kahi ya hawa wantu wowii, ni ga adzeemutsaka zaid̯i ayuḍe mwenye hizi fwedha?” 43 Simioni kamwambukuya, kamba, “Nat̯ara adzeemutsaka zaid̯i, ni huyuḍe eyekuwa na rando kuu.” Yesu kamwamba, “Kwambukuya sawa.” 44 Makisa Yesu kaperuka kumuyowa huyu muke na kamwambia Simioni, “Kumuona ayu muke ayu? Kanyosa maguu yangu na mitsoziye na kanipfanguya na nywiize. Kenge wewe nipfokudza nyumbani mwako nkukunimpa hat̯a madzi ya kukosea vumbi ḍya maguuni mwangu. 45 Wewe nkukuninonea, ela hangu nikidza, huyu nkadzayatsa kunonea haya maguu yangu. 46 Nkukunipfakaza mafuha kitswani, ela huyu muke kanihiiya manunkanto maguuni mwangu. 47 D̯ubva nyakumwambiani, matsako makuu ya huyu muke ayangiyeo ni ushaahiḍi kwamba nabviseze ziizo nyinji kaziyatsijwa. Ela yuḍejwonse ayatsiijwe kachuchu anayanga matsako machuchu.”