Injili dza yorejwevyo ni
MARKO
Ndwahiyo
Hichi ndicho chuo kifufi cha mwiso kahi ya hivi vyuo vyoone visumwiiyevyo dzuu ya maisha na mayongweezo ya Yesu. Choregwa ni muntu eyeakihanwa Yohana Marko. Marko ewa ni muntu jwa Yerusalemi eyeakigijana na aḍe Paulo, Baranaba na Pet̯ero wepfowakyenda kuntu garagara wakisumwiiya haya Maagu Mema.
Hichi hichi chuo chakusumwiiyani mafara makuu ya Yesu ahendeyeyo hangu epfoḍabva kaziye. Ḅaad̯a ya kutsana wanafund̯iwe woone wa d̯ura (1:16-20), Yesu kaḍabva kuhenda mafara ya kumakisa ya kupfoza wantu. Kahi ya hawaḍe wantu wapfozejweo, ni muntu eyekuwa na mpepfo nzuka (1:21-28), mukwanguwe muke Simioni (1:30-31), t̯ut̯a za wantu wajwazi (1:32-34), na muntu eyekuwa na kwanga (1:40-45).
Kuzimuni mwa hichi hichi chuo, Marko kasumwiiya namuna ya Yesu apfozeyevyo wantu kwa nguvu za Muungu amumpiyezo.
Dzambo ḍingine ni kwamba, wayongozi wa Kiyahud̯i wadziza kumuhikiza Yesu. Na hiḍi ḍiyeha kutsaimukana (2:2-3:6) kuwahendezeyeko kutsaka kumuyaga Yesu (11:18). Ela hat̯a mpepfo nzuka ziona uwezo wa Yesu eokuwa nao, na zimuhambuya kwamba jeje ni Mwana jwa Muungu, ingawa Yesu nkakuziruhusu zivinene.
Hichi chuo kidzaa mafara menji na menji ya kumakisa ya Yesu ahendeyeyo, yamakisiyeyo hangu wanafund̯iwe hat̯a wantu wangine wonse. Ela kuuḅana na Marko, dzambo kuu ḍya mwiso ḍya kumakisa ni kukuntiswa d̯ina na kufwa kwa Yesu. Na muntu jwa d̯ura aḍiimukiye hiḍi hiḍi dzambo kuu ni asikari jwa Kirumi amuoneye Yesu akwakufwani muhini mwa mpatsa na akyamba, “Hachi huyu ewa ni Mwana jwa Muungu ḍugha!” (15:39)
Marko kora hichi chuo kwa wantu wasiokuwa Wayahud̯i. Hivi hunaviona na hivi aḍemeyevyo kweleza dzuu ya maadha menji na menji ya Kiyahud̯i.
Na pia Marko kora kuwaimusya wasomai wakwe kwamba Yesu kadza dza muhumisi, na kadzia kuyayavya maishaye kuwa mupfonyo wa wenji (10:45). Kawambia wasomai wakwe dzuu ya Yesu ili awangize nguvu na wahikize kwamba Yesu ana uwezo wa kuwapfonya kuyawana na majwazi yao, kuyawana na mpepfo nzuka na kufwa. Na pia kawakumbusya kwamba kuishi haya maisha mapfya ya kumuserefat̯a Yesu si dzambo rahisi. Ni had̯i wamuuḅe Yesu kwa kuwahumikia wangine na kuwa t̯ayari kukunta d̯ina na hat̯a kufwa dzevyakwe.
Yeyo humu chuoni kwa ufufi kwa ufufi
Nsumwiizi za Yohana Mut̯opya 1:1-8
Kut̯opyegwa na kuḍemegwa kwa Yesu 1:9-13
Yesu kenda Galilaya 1:14-9:50
Yesu kanuka na Galilaya kenda Yerusalemi 10:1-52
D̯ina na kufwa kwa Yesu 11:1-15:47
Kufufuka kwa Yesu 16:1-8
Yesu kawat̯upukia wanafund̯iwe na kapfaa Yuwinguni 16:9-20