Yesu kapfiikwa kwa Pilato
15
1 Ipfofika chamukoche magurani t̯u, gasa yonse ya Kiyahud̯i, hangu wakohani wakuu pfamodza na wazee wa gasa na waalimu wa *Sharia, wakaa chihako ili waone kwamba wahendedze. Hapfo wamufunga-funga Yesu na wamupfiika kwa Pilato. 2 Wepfomupfiika, Pilato kamuuza Yesu kamwamba, “Wewe ndiwe ayu Haju jwa Wayahud̯i?” Yesu kamwambukuya kamwamba, “Kuvinena wewe mwenye!”3 Hawa wakohani wakuu wamusit̯aki Yesu na mambo menji na menji. 4 Pilato kamuuza Yesu kawii kamwamba, “Nkukwakwambukuya chuuwo hat̯a? Aya mambo yonse weyokukusit̯akini nayo nkukwakuyasikiani hat̯a?” 5 Ela Yesu nkakwambukuya chuuwo hat̯a kimodza. Ndookomu Pilato kamaka muno.
Yesu kahukumigwa kufwa
6 Pilato ewa kabarat̯a kwamba kula jila ya *Pasaka, anafunguya mufungwa mumodza atsanijwee ni hawa wantu na akamuyatsa huru. 7 Kwiwa muntu mumodza eyeakihanwa Baraba. Jeje na wenziwe wangine wewa wafungwa gerenzani kwa dzambo ḍya kujumuya fuḍyo na kuyaga wantu. 8 Hi t̯ut̯a ya wantu imwendea Pilato na imwamba awahendeye hiviḍe abarat̯iyevyo kuwahendea. 9 Pilato kawauza kawamba, “Munatsaka nimumufungwiiye ayu Haju jwa Wayahud̯i?” 10 Pilato ewa kanena hivi koro ewa kahambuya kwamba hawa wakohani wakuu wekimusit̯aki Yesu kwa kwamba wekimuonea wivu.
11 Ela hawa wakohani wakuu waingiza nsunziirya hi t̯ut̯a ili wamuyombe Pilato kwamba amufunguye Baraba ḅad̯ala ya Yesu. 12 Pilato kawauza kawii kawamba, “Mani ayu Yesu mwiyenamuhana Haju jwa Wayahud̯i, munatsaka nimuhendedze?” 13 Na wonse waholoka wamba, “Mupfatsike!” 14 Ela Pilato kawauza kawamba, “Kwa dzambo ga? Munatsaka nimupfatsike, munamba kahenda tsowa ga?” Ela wao wongeza kuḅaa madzwi wakyamba, “Napfatsikwe! Napfatsikwe!”
15 Ndookomu kwa kwamba Pilato ekitsaka kuitsakiza hi t̯ut̯a ya wantu, kamuwafungwiiya Baraba kuyawa gerenzani. Kisa kaamuru kwamba Yesu abigwe na lucha. Na epfobigwa akisa, kamuyavya akapfatsikwe.
Hawa asikari wamubaladhaiya Yesu
16 Makisa hawa asikari wamuhwaa Yesu wenda nae uani kwe nyumba ya huyu liwali kwikokuwa hi nkambi yao, na wahanana kit̯aro kizima. 17 Wamuvwika lot̯a ḍya ranji ya zambarau, kisa waelekanya kiyemba cha miwa na wakimuvwika kitswani. 18 Wakisa waḍabva kumukedhya na baladha wakimwamba, “Kwa naghea, Haju jwa Wayahud̯i?” 19 Kisa wamubiga nkaka za kitswa na kumukamia mahe, na wamuvunzia nkuhi kwa kumubaladhaiya. 20 Wepfomubaladhaiya hat̯a wakifuruma, waḍimuvuya hiḍi lot̯a ḍya ranji ya zambarau na wazimuvwika hizi nguoze. Makisa wanuka nae kwenda wakamupfatsike.
Kupfatsikwa kwa Yesu
21 Wepfowakyenda wakamupfatsike, wat̯ongana na muntu mumodza jwa Ukirene eyeakihanwa Simioni. Ewa ni babajwe Alekizanda na Rufasi. Ewa kayawa makondeni, na hawa asikari wepfomuona, wamusharut̯isa autsukuye hu muhi wa mpatsa wa Yesu. 22 Wenda na Yesu mumpaka pfantu pfepfopfakihanwa Goligata, yani, “Pfantu pfa pfaa ḍya Kitswa.” 23 Wamumpa mvinyo itsanganyijweyo na manemane, ela kadziza kuinwa. 24 Wamupfatsika Yesu muhini mwa mpatsa, makisa wazigawana hizi nguoze kwa kuzibigia kura.
25 Wamupfatsika Yesu muhini mwa mpatsa saa ntahu za magura. 26 Wahwaa kiḅao chorejwecho haya masit̯aki yakwe na wakibiga hapfaḍe muhini mwa mpatsa, dzuu ye kitswache. Hichi kiḅao chamba, “Haju Jwa Wayahud̯i.” 27 Na pia hawa asikari wapfatsika wevia wawii pfamodza na Yesu. Mumodza wamupfatsika mukono kuyume wa Yesu, na yungine wamupfatsika mukono tsonso.b
29 Wantu weowakichia na hafufi wekimwambia vyuuwo vya kinyaya na kusukusa vitswa vyao wakyamba, “Dzaambia nkukwamba unaweza kuikomoa ai *Hekalu na uimbake na nsiku ntahu? 30 Mani nkwadzipfonya usuke na apfo muhini mwa mpatsa!”
31 Hawa wakohani wakuu na waalimu wa Sharia nao pia wamubaladhaiya Yesu wakyambana, “Kapfonya wangine ela nkawezi kudzipfonya mwenye! 32 At̯i ekidzihana *Kirist̯o, Haju jwa Waisiraeli. Mani nkaasuka na apfa muhini mwa mpatsa hi saasambi ili hupate kumuhikiza!” Hat̯a hawaḍe wapfatsikijweo pfamodza nae nao pia wamubaladhaiya.
Kufwa kwa Yesu
33 Ipfofika saa ntandahu za musikahi, nsi yonse ifungiiya kiza cha go mumpaka saa kenda. 34 Na ipfofika saa kenda, Yesu kaḅaa idzwi kuu kamba, “Eloi, Eloi, lama sabakitani?” Yani, “Muungu jwangu, Muungu jwangu, kut̯i kuniyatsa?”
35 Wantu wangine weosumama hapfaḍe hafufi wepfosikia hivi vya Yesu aneneevyo wamba, “T̯asikiani! Kakumuhanani *nabii Eliya.” 36 Mumodza jwao kad̯arama haraka kenda kahwaa yavuyavu kaḍilingila na muhi. Makisa kaḍit̯opya kwa mvinyo ibushaiyeyo na kaḍimugijia Yesu ili anwe na kamba, “Nahuyowe kwamba Eliya anakudza anamususya na apfa muhini mwa mpatsa ambu hat̯a!” 37 Makisa Yesu kaḅaa idzwi kuu kawii kisa kahuna nsoho.
38 Pfapfo, huju yukangadzi jufungijwejo humuḍe Hekaluni juḅaika na kahi, hangu dzuu mumpaka nsii. 39 Huyu mukuu jwa asikari eyesumama hapfaḍe usoni ya Yesu, epfoona namuna ya Yesu ahuniyevyo nsoho kamba, “Hachi huyu ewa ni Mwana jwa Muungu ḍugha!”
40 Kwiwa na wake weowakichimiza na jwa kuye. Wangine wao wewa ni Maria Magid̯alena, Maria mamajwe aḍe Yakobo muḍoḍo na Yusufu,c pfamodza na Salome. 41 Hawa ni wake weowakimuuḅa Yesu na kumuhumikia epfokuwa ḍyimbo ḍya Galilaya. Kwiwa na wake wangine wenji wendeyeo Yerusalemi pfamodza nae.
Kuzikwa kwa Yesu
42 Iwa imaafika mioro, nsiku ya maelekanyo ya kuindiiya *Sabato. 43 D̯ubva kwiwa muntu mumodza jwa kuyawa mudzi wa Arimataya eyeakihanwa Yusufu. Ewa muzee jwa gasa ya Kiyahud̯i eyeakihilwa muno. Jeje mwenye ekiindiya kudza kwa Uhaju wa Muungu. D̯ubva ḅila oga, Yusufu kamwendea Pilato na kamuyomba aupfegwe hu mwii wa Yesu. 44 Pilato kamaka epfosikia kwamba Yesu ewa kamaafwa. D̯ubva kamuhana huyu mura jwa hawa asikari na kamuuza kwamba Yesu ewa kamaafwa ḍugha ambu hat̯a. 45 Huyu mura kamuhakikishia kwamba Yesu ewa kamaafwa. Ndookomu Pilato kamumpa ruhusa Yusufu kwenda akauhwae hu mwii wa Yesu. 46 Yusufu kaguya sand̯a na kenda kaususya hu mwii wa Yesu na hapfaḍe muhini mwa mpatsa na kaulinga-linga ne sand̯a. Kisa kenda kaungiza kwa mbeera it̯ukurijweyo mwambani, na kaperuya-peruya iwe kuu kaufinikiza hu muḍyango we mbeera. 47 Maria Magid̯alena na Maria mamajwe Yusufu wewa wapfaona hapfaḍe pfa Yesu azikijwepfo.