Kufufuka kwa Yesu
16
1 Nsiku ya *Sabato ipfochia, Maria Magid̯alena na Maria mamajwe Yakobo pfamodza na Salome, wenda waguya manunkanto ili wakauhiiye hu mwii wa Yesu. 2 Na ipfofika chamukoche magura mapfema, nsiku ya d̯ura ya ḍyuma, hiḍi dzuwa ḍipfoḍikitsembuza, hawaḍe wake wenda hukuḍe mbeerani. 3 Wepfowakyenda wekiuzana wao na wao wakyamba, “Ni ga jwa kuḍihuperwiiya-perwiiya hiḍi iwe ḍya hapfaḍe muḍyangoni pfe mbeera?” 4 Wekiuzana hivyo maanaye hiḍi iwe ḍiwa ni kuu na kuu. Ela kudzafika waḍiona hiḍi iwe ḍisakuperujwa-perujwa ḍinujwa. 5 Wakidzawakinjia humu mbeerani, waona muurani avwaiye lot̯a dzeupe pee kakaa chihako mukono kuyume. Nao wamaka muno.6 Nae kawamba, “Namutsemaka. Nimanya kwamba mwakumulachani Yesu jwa Nazareti apfatsikijwe. Ela hapfa nkapfo, kesakufufuka kuyawa kwa wafu. T̯apfayoweni hapfa pfantu epfowekwa. 7 Endani mukawambie hawa wanafund̯iwe wangine pfamodza na Pet̯ero kwamba, Yesu kesakuyongowa kwenda Galilaya mudzekokwendamuona nyonse dza evyomwambia.” 8 Ndookomu wayawa haraka na humuḍe mbeerani na wad̯arama, koro wewa wapatwa ni kihuko na wekihehema kwa oga. Njia nzima ntawakunena na yuḍejwonse kwa oga weokuwa nao.a
Yesu kamut̯upukia Maria Magid̯alena
9 Yesu epfofufuka magura mapfema ya nsiku ya d̯ura ya ḍyuma, d̯ura kamut̯upukia Maria Magid̯alena. Huyu ewa ni huyuḍe muke eyemuyavya mpepfo nzuka mfungahe. 10 Nae Maria kenda kawasumwiiya hawaḍe weokuwa na Yesu. Wewa wakusikit̯ikani na kuiya. 11 Na wepfosikia kwamba Yesu ka mojo na kaonegwa ni Maria Magid̯alena, ntawakuhikiza.
Yesu kawat̯upukia wanafund̯iwe wawii
12 Ḅaad̯aye, Yesu kawat̯upukia na yuumbo jungine wanafund̯iwe wawii weowakyenda midzi ya makondeni. 13 Wepfomuhambuya, hawa wanafund̯i wagala na wenda wawasumwiiya hawa wenzao wangine, ela ntawakuwahikiza.
Yesu kawat̯upukia wanafund̯iwe
14 Ḅaad̯aye kawii, Yesu kawat̯upukia hawaḍe wanafund̯iwe kumi na mumodza wepfokaa kuḍyani. Kawabusa vyumuni kwa kutsowa faro kwao na myojo yao myumu, koro ntawakuwahikiza hawaḍe wamuoneyeo epfofufuka.
15 Makisa Yesu kawamba wanafund̯iwe, “Endani lumwenguni kwonse, mukayasumwiiye haya *Maagu Mema kwa wantu wonse. 16 Huyuḍe adzeyehikiza na akit̯opyegwa anapfonywa, ela asiyehikiza anahukumigwa. 17 Na hivi vihambwiizo hivi vinauḅana na hawaḍe wahikiziyeo: Wadzayavya mpepfo nzuka kwa sari ḍyangu, na wadzanena na lugha ngeni. 18 Wadzagija nyoka na mikono yao. Na hat̯a wakinwa kintu kiḍechonse cha sumu, ntakiwezi kuwadhuru. Wadzawawekea mikono wajwazi nao wadzapfona.”
19 D̯ubva Ḅwana Yesu epfokwisa kunena nao, kahwajwa kwenda mbinguni dzuu, na kakaa mukono kuyume wa Muungu. 20 Ndookomu hawa wanafund̯iwe wazinga kula pfantu wakisumwiiya chuuwo cha Muungu. Na Ḅwana kahenda kazi pfamodza nao akiyangizia nguvu haya maagu wasumwiiyeyo, koro kawawezesa kuhenda mambo menji na menji ya mafara. Amina.