Yesus tonavan
(Mat. 26:47-56; Mrk. 14:43-50; Luk. 22:47-53)
18
Mbot Yesus bodoa naing erih, Iyok khavun dolang murit-Ah tulak noku pohoi sungoi Kidron. Nuk anai arok taman, Yesus khavun dolang murit-Ah nyolong noku taman erih. 2 Yudas Iskariot jok ahkan nyerah Yesus noku dolang musuh-Ah, Yudas taꞌai taman erih, kotului Yesus bojoin hokupur mbak dolang murit-Ah nuk anai. 3 Mahkak Yudas tulak noku anai ngomin icok kolompok porajurit Romawi, khavun dolang ulun jok jagak Lovun Hotalak idoh sonyuhuk dolang kopalak pomipin agamak Yahudi khavun ulun-ulun tahkan kolompok Parisi. Idoh ngonin lentera, obor, khavun sonjata. 4 Yesus taꞌai paring aꞌang jok ahkan torjadik mbak Iyok. Jadik Iyok ngoronik ulun-ulun erih khavun bokisok, hiyoi-Ah: “Ihkam ngurah iyai?”5 Hiyon doh mutah Yok: “Yesus, ulun Nazaret.”
Hiyoi mutah idoh: “Ahkuk noh Yesus.”
Yudas jok nyerah Yesus erih tombok hicok mbak ulun-ulun jok lombut erih. 6 Beteng Yesus marak ahkan doh: “Ahkuk noh Yesus.” Idoh paring ah mundur noku lihkut khavun idoh pun botahak noku tanak. 7 Sinok hinok Yesus bokisok mbak idoh hiyoi: “Ihkam ngurah iyai?”
Hiyon doh mutah Yok: “Yesus ulun Nazaret.”
8 Hiyon Yesus: “Umbot noh Kuk marak ah Ahkuk noh Yesus, khavun ngindoi Ahkuk jok kongurah mik, pohiyoi ah noh dolang murit-Kuk tulak.” 9 Mbak koderih torjadik non inon jok hiyon Yesus sojaham ah: “Amai, tahkan paring ulun jok ongak Amai ahkak-Kuk, yarok icok behtik pun jok konolohpung.”
10 Simon Petrus ngomin lading, iyok nyohpit lading erih tahkan kupang ah khavun nohtok tolingan silak kotoun jihpon kopalak pomipin agamak erih nyiring pahtot. Ngaran jihpon jok tolingai ah bototohtok erih arok noh Malkhus. 11 Mahkak hiyon Yesus ahkan Petrus: “Mosolong ah hinok lading atuh noku luvang kupang ah! Ahkuk alah jorak mbak elah jok was tonetu Amai-Kuk.” a
Yesus onin doh noku husuk Hanas
(Mat. 26:57-58; Mrk. 14:53-54; Luk. 22:54)
12 Khavun dolang porajurit Romawi mbak komandan doh khavun dolang ponjagak Lovun Hotalak, idoh navan Yesus khavun doh ngahut longoi-Ah mbak talik. 13 Topahtuk ah idoh ngomin Yesus noku Hanas, okok upuk Kayafas. Beteng toun erih Kayafas jadik Kopalak Pomipin Agamak Yahudi jok paling isung. 14 Khavun Kayafas noh jok marak ahkan dolang pomipin Yahudi: “Nihak icok behtik palus ahkan paring bangsak tok!” b
Petrus ngilang Yesus
(Mat. 26:69-70; Mrk. 14:66-68; Luk. 22:55-57)
15 Petrus khavun icok behtik murit Yesus jok bohkon dorok tulak ngohasuk Yesus. Murit Yesus jok bohkon erih nyokonok Pomipin Agamak Yahudi jok paling isung, jadik iyok mbak nyolong noku anai hombo-homboh mbak Yesus noku dohopan lovun Pomipin Agamak Yahudi erih. 16 Tahpik Petrus ngindoi nuk luar donik atop, khavun murit Yesus jok nyokonok pomipin agamak Yahudi erih, tulak bohavung mbak polayan jok bavik iyok jagak atop erih, khavun turus ngomin Petrus nyolong. 17 Bavik jok jagak atop erih marak Petrus: “Eh, Iyam leh ihkok halik murit-Ah?”
Petrus mutah ah, hiyoi: “Iyam.” 18 Beteng erih sorongin nyangit, jadik dolang jihpon pomimpin agamak erih khavun dolang ponjagak lovun Hotalak idoh ngopolum ahpui motuh arop doh supayak behtin doh bolasut. Petrus halik mbak doh motuh behtin doh nuk anai.
Hanas bokisok mongenai ajar barak Yesus
(Mat. 26:59-66; Mrk. 14:55-64; Luk. 22:66-71)
19 Hanas Jok lomoi jadik Pomipin Agamak Yahudi jok paling isung iyok bokisok mbak Yesus mongenai murit-murit-Ah khavun bokisok kak mongenai ajar barak-Ah. 20 Yesus mutah ah: “Ahkuk bokesah yarok jok sonyuhuk Kuk. Ahkuk nulo ngajar nuk dolang lohpo sombayang ulun Yahudi khavun nuk dohopan Lovun Hotalak, unuk ulun Yahudi baas hokupur. Yapujik Kuk bokesah nyuhu-nyuhuk. 21 Jadik ngombai tuan ngisok Ahkuk? Ngisok ah noh noku idoh jok pujik nyonih Ahkuk ngajar. Idoh muhtik taꞌai inon jok kongesah Kuk.”
22 Beteng Yesus bokesah naing erih, icok behtik ponjagak Lovun Hotalak jok arok nuk anai turus nopeleng Yok khavun hiyon ah: “Bohanyik tuꞌuk Ihkok bokesah naing erih mbak Pomipin Agamak Yahudi jok paling isung!”
23 Yesus mutah ah: “Ngindoi Ahkuk bokesah mongenai aꞌang jok salak, marak ah nuk ohtoi inon kosalak Kuk! Totahpik ngindoi inon jok pomarak Kuk erih tuꞌuk, ngombai kok nopeleng Ahkuk?”
24 Khavun Hanas nyuhuk ulun-ulun erih ngomin Yesus tahtup tokahut longoi-Ah noku Pomipin Agamak Yahudi jok paling isung yok erih Kayafas.
Petrus ngilang Yesus hinok
(Mat. 26:71-75; Mrk. 14:69-72; Luk. 22:58-62)
25 Beteng Petrus honong tombok ngolasut arop ah nuk donik ahpui erih. Arok ulun jok marak ah: “Iyam leh ihkok halik murit-Ah?” Totahpik Petrus ngilang ah, hiyoi: “Iyam beh!”
26 Icok behtik jihpon Pomipin Agamak Yahudi jok paling isung, iyok koluarga ulun jok boputung tolingai ah konguan Petrus, hiyoi ah: “Iyam leh ahkuk pujik nohtok ihkok nuk taman hicok mbak Iyok?”
27 Khavun Petrus ngilang Yok hinok, hiyoi ah: “Iyam beh,” khavun beteng erih kak manuk nonduk.
Yesus noharep Pilatus
(Mat. 27:1-2, 11-14; Mrk. 15:1-5; Luk. 23:1-5)
28 Ngohko-ngohkos tuꞌuk idoh ngomin Yesus tulak tahkan lohpo Kayafas noku Istana Pilatus gubernur Roma. Totahpik dolang pomipin Yahudi jok ngonin Iyok idoh iyam nyolong noku luvang istana, kotului ulun Yahudi ahkan jadik kohtor sohinggak iyam taan doh mbak sombayang nyolong noku lohpo jok iyam lohpo ulun Yahudi. Khavun idoh kanik nguan arop doh tehtap borasih, kotului hondo erih idoh ahkan ngoramik Ondo Paskah. 29 Kotului erih Pilatus boluak tahkan istana ah noku idoh, khavui bokisok: “Inon kojaek jok tonuduh mik ahkai-Ah?”
30 Idoh mutah ah: “Ngindoi Iyok iyam salak, ihkai iyam ahkan ngonin Yok noku ihkok, Tuan Gubernur.”
31 Hiyon Pilatus ahkan doh: “Ngoniu ah noh Iyok khavun ngohukum ah noh Iyok monurut hukum agamak emik.”
Totahpik dolang pomipin Yahudi erih mutah ah: “Monurut hukum Roma, ihkai ulun Yahudi iyam taan kai ngohukum ulun nyiring mahtoi.” 32 Mbak marak ah naing erih, nyolung noh inon jok pomarak Yesus mongenai bohkolo elah ah Iyok ahkan mahtoi.c
33 Pilatus hulik nyolong noku istana ah khavun iyok nyuhuk dolang porajurit ah naꞌah Yesus. Khavun iyok bokisok mbak Yesus, hiyoi: “Inon leh Ihkok Lacak ulun Yahudi?”
34 Yesus mutah ah: “Inon leh kisok ihtuh tahkan ihkok bongon ngindoi iyam inon leh arok ulun bohkon jok was marak ahkam muk mongenai Ahkuk?”
35 Pilatus mutah ah: “Inon leh ahkuk ulun Yahudi? Jok nyerah Ihkok noku ahkuk arok noh dolang ulun Yahudi, bangsak Emuk noh khavun dolang kopalak pomipin agamak Muk. Inon jok was Kok nguai ah?”
36 Hiyon Yesus nok: “Ahkuk jadik Lacak iyam tahkan kuasak duniak tuh. Ngindoi kuasak Kuk tahkan duniak ihtuh, muhtik dolang ulun jok ngohasuk Ahkuk ahkan bohelah supayak Ahkuk iyam sonyerah noku dolang pomipin Yahudi. Totahpik punak tuꞌuk noh Ahkuk Lacak jok kuasak Kuk iyam tahkan duniak ihtuh!”
37 Mahkak Pilatus bokisok mbak Yesus, hiyoi: “Ngindoi koderih, Ihkok Lacak?”
Yesus mutah ah: “Ihkok jok marak ah ngindoi Ahkuk Lacak. Ahkuk kongarok khavun lombut noku duniak, salak kuk yok erih nongak kosaksian mongenai aꞌang jok hinut. Dolang ulun jok norimak inon jok hinut, idoh ahkan nyonih inon jok pomarak Kuk.”
38 Pilatus bokisok mbak Iyok hinok: “Inon aꞌang jok hinut erih?”
Pilatus ngohukum Yesus nyiring mahtoi
(Mat. 27:15-31; Mrk. 15:6-20; Luk. 23:13-25)
Pilatus boluak hinok tahkan istana khavun hiyoi ah ahkan dolang pomipin Yahudi erih: “Yarok kuk ngonduon icok kosalak pun nuk Iyok. 39 Totahpik aꞌang jok baas kuk nguai ahkan mik, yok erih ahkuk nulo molahpas icok behtik ulun jok pononjara beteng Ondo Raya Paskah. Kanik leh ihkam ahkuk molahpas Lacak ulun Yahudi ihtuh?”
40 Idoh mutah ah tahtup ngoriak: “Iyam! Arak molahpas Iyok, tahpik molahpas ah noh Barabas!” Barabas arok noh ulun jok bas nahko.