Evak ahkan munuk Yesus
(Mat. 26:1-5; Luk. 22:1-2; Yoh. 11:45-53)
14
Duok ondo hinok ahkan Ondo Paskah khavun Ondo Raya Roti Iyam Konolakik. Dolang Kopalak Pomipin Agamak Yahudi khavun dolang Guruk Agamak Yahudi ngurah elah supayak doh touk navan khavun munuk Yesus totahpik iyam kotaan ulun arok. a 2 Idoh marak ah: “Arak sapai tumbas beteng ondo porayaan supayak arak ngolopung kokalut nuk tohun-tohun ulun arok.”Icok behtik bavik nusuh binyak wangi nuk kuhung Yesus
(Mat. 26:6-13; Yoh. 12:1-8)
3 Kotihkak Yesus nuk Betania, nuk lohpo Simon, Simon holuk pujik buah belang. Beteng Yesus tuot kuman nuk anai lombut noh icok behtik bavik ngonin kundik suang ah binyak wangi jok bolehkak. Bavik erih mosak kuhung kundik erih kahvui nusuh ah noku kuhung Yesus. b 4 Arok pirak behtik ulun jok arok nuk anai idoh birat, idoh bokesah icok mbak jok bohkon, hiyon doh: “Inon gunai binyak wangi atuh konohanyang? 5 Kotului binyak wangi ihtuh touk dahkang toluk lahtus dinarc holovik, khavun duit ah touk tonongak ahkan ulun-ulun malak.” Khavun idoh ngomirat bavik erih.
6 Totahpik hiyon Yesus: “Pohiyoi ah noh iyok! Arak ihkam majak yok kotului bavik ihtuh uwas nguan aꞌang jok pios ahkak Kuk. 7 Kotului ulun-ulun malak arok nulo nuk hokosilak ihkam, khavun ihkam touk ngavat idoh mirak kiyak ihkam kanik, totahpik Ahkuk iyam ahkan hicok mbak ihkam bunang. d 8 Iyok was nguai inon jok touk yok nguai ah. Behtik kuk was konobinyak ah mbak binyak wangi sobagai tandak Ahkuk was ahkan tonanom.” 9 Hiyon Yesus: “Pocayak noh nuk amoh kiyak Tarung Pios kongesah noku paring duniak, inon jok konuai bavik ihtuh ahkan kongesah kak. Iyok ahkan tonohouk ulun arok.”
Yudas kanik nyerah Yesus noku pomipin-pomipin Yahudi
(Mat. 26:14-16; Luk. 22:3-6)
10 Arok icok behtik murit Yesus ngarai ah Yudas Iskariot, iyok tulak noku dolang kopalak pomipin agamak Yahudi supayak nyerah Yesus noku idoh. 11 Khavun pomipin-pomipin erih ngandah nyonih inon jok pomarak Yudas, idoh bojanjik mbak Yudas ahkan nongak duit ahkai ah. Khavun Yudas ngurah kotihkak jok pios supayak touk nyerah Yesus noku idoh.
Yesus khavun koduok balas murit Ah kuman ukun ponguman jok tonapak ahkan ngoramik ondo Paskah
12 Ondo jok topahtuk ah beteng ngoramik Ondo Roti Iyam Konolakik, beteng ulun nyomolih domba ahkan porayaan Paskah, murit-murit Yesus marak ahkai Ah: “Noku amoh Ihkok kanik ihkai tulak nyodiak porjamuan Paskah ahkam Muk?”
13 Khavun Iyok nanjik koduok behtik murit Ah hiyoi: “Tulak noh borok noku kota Yerusalem, nuk anai ihkam borok ahkan bohavung umbak ulun bahkas jok ngonin kundik totai danum. Ngohasuk ah noh iyok, 14 khavun ngindoi iyok nyolong noku luvang lohpo, marak ah noh ahkan ulun jok tepun lohpo erih: ‘Guruk bokesah: Nuk amoh takun jok was sonyodiak ahkak Kuk supayak Ahkuk touk kuman ukun ponguman Paskah hombo-homboh mbak dolang murit Kuk?’ 15 Khavun ulun erih ahkan marak kok takun jok hajok nuk lohteng, nuk anai lekap uras noh. Nuk anai noh kam borok harus nyodiak porjamuan Paskah ahkan tok!”
16 Mahkak tulak noh koduok murit Ah erih khavun kotihkak dorok dahpot nuk kota erih, inon jok kongesah Yesus havoi noh mbak inon jok tonohtok doh. Khavun dorok nyodiak ah ukun ponguman ahkan porjamuan Paskah nuk anai.
17 Beteng ondo was pindong, lombut noh Yesus hombo-homboh mbak koduok balas murit Ah. 18 Beteng doh tuot nuk takun lohteng erih beteng doh honong kuman Yesus marak doh hiyoi ah: “Ahkuk marak ahkam muk, ahkan arok icok behtik nuk holang ihkam ahkan ngohianat Ahkuk, yok erih jok kuman mbak Ahkuk.” e
19 Mahkak piluk noh ahtoi doh khavun ico-icok ah idoh bokesah mbak Yesus hiyon doh: “Iyam ahkuk, Guruk?”
20 Iyok mutah doh: “Ulun erih yok noh tahkan holang kam duok balas behtik tuh, iyok jok kuman hicok pinjan mbak Ahkuk. 21 Anak kolunon ahkan mahtoi numun jok uwas tonulih nuk luvang Kitab Suci. Totahpik colahkak noh ulun jok ngohianat Iyok. Kotului punak pios ngindoi ulun erih iyam konganak noku duniak ihtuh!”
Porjamuan Kudus
(Mat. 26:26-29; Luk. 22:14-20; 1Kor. 11:23-25)
22 Kotihkak Yesus khavun murit-murit Ah honong kuman, Yesus ngonin roti khavun Iyok bodoa bosukur mbak Hotalak. Khavui nyipa-nyipak roti erih turus magi-magik ah ahkan murit-murit-Ah hiyoi Ah ahkan doh: “Ngoniu ah ihtuh noh behtik Kuk.”
23 Umbot erih iyok ngonin sakir, bosukur ahkan Hotalak khavui nongak sakir erih ahkan doh. Khavun doh paring ah ngorih danum anggur jok arok nuk luvang sakir erih. 24 Khavui marak doh hiyoi Ah: “Ihtuh noh dahak Kuk, dahak jok nguan porjanjian Hotalak mahi-mahik borohon mbak ulun jok konopilik Ah. Ahkuk ahkan nongak dahak Kuk ahkan paring ulun. f 25 Ahkuk marak ahkam muk nyonih ah! Ahkuk iyam ahkan ngorih anggur ihtuh hinok nyiring Ahkuk ngorih anggur jok bohuak nuk Korajaan Hotalak.”
Petrus ahkan ngilang Yesus
(Mat. 26:30-35; Luk. 22:31-34; Yoh. 13:36-38)
26 Khavun doh nyanyi icok lagu ahkan nuk momuji Hotalak, ulik erih idoh turus tulak noku korong Zaitun.
27 Khavun hiyon Yesus ahkan doh: “Ihkam paring ah ahkan buho nohtah Ahkuk. Kotului arok tonulih nuk luvang Kitab Suci: ‘Hotalak ahkan munuk ponjagak domba erih khavun paring domba ah ahkan hobomilang.’ g 28 Ahkan totahpik ngindoi Ahkuk was hulik bolum tahkan holang ulun mahtoi, Ahkuk ahkan holuk tulak noku Galilea.” h
29 Hiyon Petrus ahkai Ah: “Holuk poh paring idoh nohtah Guruk, totahpik ahkuk iyam.”
30 Khavun hiyon Yesus ahkai ah: “Nohouk ah! Ngolomik ihtuh kak, sojaham manuk nonduk duok kali, ihkok ahkan ngilang Ahkuk toluk kali.”
31 Umbak tegas Petrus mutah ah hiyoi ah: “Oluk poh ahkuk mahtoi hombo-homboh mbak Guruk, ahkuk iyam ahkan ngilang Guruk.”
Paring murit jok bohkon pun bokesah naing erih kak.
Yesus nuk taman Getsemani
(Mat. 26:36-46; Luk. 22:39-46)
32 Khavun docok noh Yesus khavun murit-murit Ah noku unuk jok ngarai ah Getsemani. Hiyon Yesus ahkan murit-murit Ah: “Tuot noh nuk ohtoi, lambak Kuk bodoa.”
33 Khavun iyok ngonin Petrus, Yakobus, Yohanes ngohasuk Iyok. Iyok nyangit liduk khavun mihkoh, 34 khavun hiyon Yesus ahkan doh toluk erih: “Ahtoi kuk nyangit liduk, nanyam jok kanik mahtoi nih. Ngindoi nuk ohtoi khavun jaga-jagak.”
35 Yesus nyalan nyohiot hinok. Iyok nyuhkuk nuk isung tanak kahvui bodoa, Iyok nyavot ngindoi Hotalak kanik supayak Iyok arak pononyorak. 36 Hiyoi Ah: “Amai, Amai! Yarok aꞌang jok motaher ahkam Muk. Molahpas ah noh kojorak ihtuh tahkan Ahkuk. Totahpik arak numun kokanin Ekuk harus numun kokanin Emuk noh.”
37 Umbot erih Iyok hulik noku kotoluk murit Ah erih totahpik lambak erih idoh tiruh. Khavun hiyoi ahkan Petrus: “Petrus ihkok honong tiruh leh? Icok jam kiyak yaduom muk bojagak?” 38 Khavun hiyon Yesus ahkan doh: “Jaga-jagak noh khavun bodoa noh, supayak ihkok arak tonikos. Ahtoi muk kanik nguan aꞌang jok pios, totahpik behtim muk yam duoi nguai.”
39 Khavun Yesus tulak bodoa hinok umbak Hotalak numun doa jok pomarak Ah nenih. 40 Umbot erih Iyok hulik hinok noku murit-murit Ah khavun nohtok idoh honong tiruh hinok kotului mahtan doh nyangit nunduk. Iyam taan doh inon jok harus pomarak doh ahkai Ah.
41 Kotihkak Yok hulik noku murit-murit Ah jok kotoluk kali ah, Iyok bokisok mbak idoh: “Ngombai ihkam honong totiruh? Jadik noh! Beteng huntuh Anak Kolunon ahkan sonyerah noku ulun-ulun jok bodosa. 42 Monyun nai hai tok tulak. Iyok jok nyerah Ahkuk was donik.”
Yesus tonavan
(Mat. 26:47-56; Luk. 22:47-53; Yoh. 18:3-12)
43 Beteng Yesus honong bokesah, lombut noh Yudas, icok behtik tahkan koduok balas murit Ah. Iyok hombo-homboh mbak kolompok ulun-ulun jok ngonin iso khavun pongolang. Idoh sonyuhuk dolang kopalak pomipin agamak Yahudi, dolang guruk agamak Yahudi khavun okon-okon Yahudi. 44 Yudas was marak tandak ahkan ulun-ulun jok ngonin iso erih hiyoi ah: “Ulun jok ahkan kongarok kuk, erih noh Yesus, navan ah noh Iyok khavun ngonin Yok tulak mbak pios-pios.”
45 Kotihkak Yudas docok nuk anai, turus noh iyok noku Yesus khavun marak ah: “Guruk!” Khavui ngarok Ah. 46 Mahkak idoh namit Yesus khavun navan Yok. 47 Totahpik icok behtik murit Yesus jok arok nuk anai nyohpit iso ah khavun mutung tolingan jihpon kopalak pomipin agamak Yahudi jok paling isung erih, tolingai ah putung. 48 Khavun hiyon Yesus ahkan doh: “Inon leh Ahkuk ulun jaek, nyiring ihkam lombut ngonin iso khavun pongolang ahkan navan Ahkuk? 49 Nyinong ondo Ahkuk ngajar nuk Lovun Hotalak nuk husuk mik, khavun ihkam iyam navan Ahkuk. Totahpik Ahkuk harus tonavan, supayak nyahtak noh inon jok tonulih luvang Kitab Suci.” i
50 Paring murit Ah buho nohtah Yesus.
51 Arok icok behtik murit-Ah jok honong bio, iyok cumak hatin tacong nuk nuhtup behtiu ah, iyok ngohasuk Yesus. Kolompok ulun-ulun jok konguhtus erih kanik navan yok, 52 totahpik iyok molahpas koromaꞌang erih khavui turus buho tahtup urang ah.
Yesus nuk husuk kopalak pongadilan agamak
53 Khavun Yesus onin idoh noharep Kopalak Pomipin agamak Yahudi jok Paling Isung nuk lohpo ah. Paring Kopalak Pomipin agamak Yahudi, okon-okon Yahudi, khavun dolang guruk agamak Yahudi kupur nuk anai. 54 Khavun Petrus ngohasuk Yesus tahkan macuk nyiring docok nuk tohopan lohpo erih. Nuk anai iyok tuot nginduk donik ahpui, havo-havoi mbak dolang porajurit. 55 Dolang kopalak pomipin agamak Yahudi khavun paring Kopalak Pongadilan Agamak idoh ngotiak ngurah kosalak Yesus supayak touk ngohukum mahtoi Iyok. Totahpik idoh iyam ngonduon icok pun kosalak Yesus. 56 Tumbuk saksi jok tonaꞌah ahkan ngesah kosaksian palsu nongenai Yesus, totahpik kosaksian doh iyam havoi icok mbak jok bohkon.
57 Khavun arok pirak behtik ulun kuat khavui ah tombok turus bobalik ngesah aꞌang jok jaek mongenai Yesus, 58 hiyon doh: “Ihkai nyonih Ulun ihtuh marak ah: ‘Ahkuk ahkan monorop Lovun Hotalak ihtuh jok tonapak kolunon, khavun ondo jok kotoluk ah, Ahkuk ahkan napak jok bohkon jok iyam tonapak kolunon.’ ” j 59 Totahpik kosaksian doh erih pun hokolavan icok mbak jok bohkon.
60 Mahkak Kopalak Pomipin agamak Yahudi jok Paling Isung tombok nuk husuk ulun arok khavun bokisok mbak Yesus, hiyoi ah: “Ngombai Ihkok tonih kiyak nyonih doh nondah Kok?”
61 Totahpik Yesus tonih kiyak. Sinok pun Iyok iyam mutah doh. Khavun Kopalak Pomipin agamak Yahudi jok Paling Isung erih bokisok hinok mbak Iyok hiyoi: “Inon leh Ihkok Lacak Ponyolamat, Anak Hotalak?”
62 Khavun Yesus mutah ah hiyoi ah: “Ahkuk noh Iyok! Khavun ihkok ahkan nohtok Anak Kolunon tuot nuk silak kotouk Hotalak jok Paling Bokuasak khavun lombut nuk tohun-tohun havun tahkan langit!” k
63 Mahkak Kopalak Pomipin Agamak Yahudi jok Paling Isung erih birat turus nisah hatiu ah khavui bokesah hiyoi: “Ihtok iyam poduluk saksi hinok! 64 Ihkam was nyonih Iyok ngohinak Hotalak. Bohkolo monurut mik, Iyok tuh ulun jok hinut inon leh ulun jok salak?”
Idoh hopahkat ngindoi Yesus salak, Iyok pahtut konohukum mahtoi. l
65 Khavun arok pirak behtik ulun ngolucak Yesus, idoh nuhtup mahtan Yesus khavun nahup Yok, hiyon doh ahkai Ah: “O Guruk, inon leh Ihkok touk marak ah iyai jok nahup Kok?” Mahkak dolang porajurit erih halik mbak nahup Yok kak.
Petrus nyangkal Yesus
66 Beteng hun erih Petrus honong arok nuk dohopan lohpo Kopalak Pomipin agamak Yahudi jok Paling Isung erih khavun lombut noh icok behtik bavik noku Petrus iyok jihpon pomipin erih. 67 Kotihkak nohtok Petrus ngolasut behtiu nuk donik ahpui, iyok noliti tapak Petrus khavun hiyon: “Iyam leh ihkok nulo hicok humbak mbak Yesus ulun Nazaret erih?”
68 Totahpik Petrus ngilang, hiyoi mutah ah: “Ahkuk yam kuk taꞌai inon jok pomarak muk.” Khavun Petrus tulak noku gerbang lohpo Kopalak Pomipin agamak Yahudi jok paling isung erih. [Beteng hun erih nonduk noh manuk.]
69 Bavik jok jadik jihpon pomipin erih iyok nohtok Petrus hinok, khavun marak ahkan ulun-ulun jok arok nuk anai, hiyoi-ah: “Iyok tuh noh icok behtik tahkan holang idoh.” 70 Totahpik Petrus ngilang hinok.
Iyam tahik ulik erih, ulun-ulun jok arok nuk anai marak ah: “Iyam dahpat kok ngilang ah hinok, ihkok noh icok behtik tahkan holang idoh, kotului ihkok ulun Galilea!”
71 Khavun Petrus nulut arop ah hiyoi ah: “Ahkuk iyam nyokonok Ulun jok pomarak muk erih!”
72 Beteng erih kak manuk nonduk koduok kali. Khavun Petrus nohouk ah ngindoi Yesus pujik marak ahkai ah: “Sojaham manuk nonduk duok kali, ihkok was toluk kali ngilang Ahkuk.” Mahkak Petrus pun nangih mbak ahtoi jok piluk.