Yesus muhik paan dolang murit-Ah
13
Icok ondo sojaham porayaan Ondo Paskah, Yesus taꞌai ngindoi was ohkot-Ah noh Iyok nohtah duniak ihtuh ahkan hulik noku unuk Amai-Ah. Iyok mongasihi ulun-ulun jok Iyok tepui nuk duniak tuh, khavun koderih kak Iyok motohtok kasih-Ah ahkan doh nyiring ondo pongohpah komolum-Ah.2 Beteng ngolomik Yesus khavun dolang murit-Ah honong kuman. Lacak paring otuk was ngevak aꞌang jok jaek luvang ahtoi Yudas anak Simon Iskariot, supayak iyok nyerah Yesus noku dolang pomipin Yahudi. 3 Yesus taꞌai ngindoi Amai-Ah was nyerah paring kuasak ahkai-Ah. Yesus halik taꞌai ngindoi Iyok lombut tahkan Hotalak khavun ahkan hulik nok noku Hotalak. 4 Kotului erih Iyok tombok khavun nguhkoi jubah-Ah, Iyok ngahut anduk nuk kahang-Ah. 5 Umbot erih Iyok nusuh danum noku luvang baskom, khavun Iyok muhik dolang paan murit-Ah turus ngapit motojah paan doh mbak anduk jok konahut nuk kahang-Ah. 6 Beteng Yok docok nuk paan Simon Petrus, hiyon Simon Petrus ahkai-Ah: “Tuhan, inon leh Ihkok kanik muhik paak kuk?”
7 Yesus mutah yok: “Huntuh ihkok iyam ngorehti inon jok konguak Kuk tuh, totahpik ngindoi was ohkot ah nain ihkok ahkan ngorehti.”
8 Hiyon Petrus mutah Yok: “Arak! Nyiring mirak pun Ihkok iyam ahkan tonohook kuk muhik paak.”
Totahpik Yesus mutah ah: “Ngindoi Ahkuk iyam muhik paam muk, rehti ah ihkok iyam murit Kuk.”
9 Hiyon Petrus ahkai-Ah: “Tuhan, ngindoi koderih arak paak kuk kiyak, longok khavun kuhung kuk halik muhik ah kak!” 10 Hiyon Yesus marak yok: “Ulun jok was monus, was borasih noh paring behtiu ah, totahpik paai ah kiyak jok poduluk pomuhik. Ihkam was borasih noh, totahpik iyam paring mik jok was borasih.” 11 Yesus taꞌai iyai jok ahkan nyerah Iyok. Kotului erih noh Iyok marak ah: “Ihkam iyam paring ah borasih.”
12 Mbot Yesus muhik morasih paan doh, Iyok tuot hinok khavun hatin jubah-Ah. Khavun hiyoi-Ah ahkan doh: “Ngorehti reh ihkam inon jok was konguak Kuk ahkan mik? a 13 Ihkam naꞌah Ahkuk Guruk khavun Tuhan, aꞌang erih hinut, kotului punak tuꞌuk Ahkuk noh Guruk khavun Tuhan. 14 Ngindoi Ahkuk Tuhan khavun Guruk muhik paan mik, mahkak ihkam halik alah muhik paan mik icok mbak jok bohkon 15 Ahkuk was nguai aꞌang erih ahkan mik, supayak ihkam numui inon jok konguak Kuk erih. 16 Punak tuꞌuk auh Kuk tuh: Jihpon iyam ahkan holovik peting mbak tuan ah, khavun ulun jok konguhtus iyam ahkan holovik peting mbak ulun jok nguhtus-Ah. b 17 Ngindoi ihkam was taꞌai paring ah ihtuh, mahkak ngandah noh ihkam ngindoi ihkam numui inon jok konguak Kuk erih.
18 Inon jok pomarak Kuk ihtuh iyam mongenai kam paring ah. Ahkuk taꞌai ulun-ulun jok was konopilik Kuk. Totahpik inon jok was pomarak nuk luvang Kitab Suci paring ah erih ahkan torjadik, yok erih: Ulun jok kuman hicok mbak Ahkuk iyok noh jok ahkan ngolavan Ahkuk. c 19 Aꞌang erih pomarak Kuk ahkam mik huntuh, sojaham torjadik, supayak ngindoi aꞌang erih torjadik nain, ihkam ahkan pocayak ngindoi Ahkuk arok noh Lacak Ponyolamat. 20 Punak tuꞌuk auh Kuk tuh: Iyai jok norimak Iyok jok konguhtus Kuk, iyok norimak Ahkuk kak. Khavun iyai jok norimak Ahkuk, ulun erih norimak Iyok jok nguhtus Ahkuk kak.” d
Yesus marak ah iyai jok ahkan nyerah Iyok
(Mat. 26:20-25; Mrk. 14:17-21; Luk. 22:21-23)
21 Umbot Yesus bokesah naing erih, Iyok ngomok punak liduk, khavun Yok marak ah, hiyoi: “Tuꞌuk inon jok pomarak Kuk tuh, arok icok behtik nuk holang ihkam jok ahkan nyerah Ahkuk.”
22 Dolang murit-Ah hotohtok icok mbak jok bohkon tahtup koderoh doh, idoh iyam ngorehti iyai jok hiyoi-Ah. 23 Arok icok behtik nuk holang dolang murit erih jok punak kongasih Yesus iyok tuot nuk silak Yesus, murit erih nyikuh noku Iyok. 24 Petrus ngirak murit erih supayak iyok bokisok mbak Yesus, iyai jok hiyon Yesus erih.
25 Mahkak murit jok kongasih-Ah erih ngoronik Yesus hinok khavui bokisok hiyoi-Ah: “Tuhan, iyai ulun erih?”
26 Yesus mutah ah: “Ulun erih noh jok ahkan norimak roti jok was kongucom Kuk noku luvang makok.” Mahkak Yesus ngonin roti khavun ngucom ah noku luvang makok, mbot erih nongak ah noku Yudas, anak Simon Iskariot. 27 Beteng was umbot Yudas norimak roti jok tahkan Yesus, Lacak paring otuk pun nguasak iyok. Khavun hiyon Yesus ahkai ah: “Ngimos ah nai nguai inon jok kanik kok nguai.” 28 Totahpik yarok icok behtik pun idoh jok tuot kuman nuk anai ngorehti ngombai Yesus bokesah mbak Yudas naing erih. 29 Arok pirak behtik murit-Ah davak doh Yesus nyuhuk Yudas molik barang jok pononuluk doh beteng porayaan Paskah, ngindoi iyam nyuhuk Yudas nongak duit ahkan ulun malak. Kotului Yudas pomocayak namit duit porsembahan ahkan Yesus khavun dolang murit-Ah.
30 Umbot Yudas norimak roti erih, iyok turus boluak. Beteng erih was ngolomik.
Yesus nongak poletah jok bohuak
31 Beteng Yudas was tulak noh, hiyon Yesus ahkan dolang murit-Ah jok arok nuk anai: “Huntuh was dahpot noh ohkot ah ahkan Anak Kolunon konolehkak, khavun mbak koderih kak Hotalak ahkan konolehkak nyihing inon jok konguan Anak Kolunon. 32 Kotului Hotalak konolehkak nyihing Anak Kolunon, mahkak Hotalak pun ahkan motohtok ah ahkan kolunon ngindoi Ahkuk Anak Kolunon punak konolehkak. Khavun aꞌang erih ahkan pohos torjadik konguan Hotalak.” 33 Hiyon Yesus nok ahkan dolang murit-Ah: “Anak-anak jok kongasih Kuk, Ahkuk iyam ahkan tahik nai hicok humbak mbak ihkam. Ihkam ahkan ngurah Ahkuk, totahpik kolo jok was pomarak Kuk ahkan dolang pomipin Yahudi, erih kak jok pomarak Kuk ahkan mik: Noku unuk Ahkuk tulak ihkam iyam ahkan taan mik lombut noku anai. e 34 Poletah bohuak jok tonongak Kuk ahkan mik: Ihkam alah mongasihi icok mbak jok bohkon. Havoi mbak Ahkuk mongasihi ihkam, koderih kak ihkam alah havo-havoi mongasihi. f 35 Ngindoi ihkam mongasihi icok mbak jok bohkon, mahkak paring ulun ahkan taꞌai ngindoi ihkam arok noh murit-Kuk.”
Yesus marak ah ngindoi Petrus ahkan ngilang Yok
(Mat. 26:31-35; Mrk. 14:27-31; Luk. 22:31-34)
36 Khavun Petrus bokisok mbak Yesus: “Tuhan, Kok kanik tulak noku amoh?”
Yesus mutah yok: “Noku amoh Ahkuk tulak, ihkok iyam ahkan touk ngohasuk Kuk huntuh. Totahpik nain ihkok ahkan ngohasuk Ahkuk.”
37 Hiyon Petrus nok: “Tuhan, ngombai ahkuk iyam taꞌai ngohasuk Ihkok huntuh? Ahkuk yambai mahtoi kotului ngohasuk Tuhan!”
38 Yesus mutah yok: “Tuꞌuk noh leh ihkok yambai mahtoi kotului Ahkuk? Tuꞌuk noh inon jok pomarak Kuk ihtuh, sojaham manuk nonduk, ihkok was marak ah toluk kali ngindoi ihkok iyam nyokonok Ahkuk!”