TARUNG PIOS
JOK TONULIH
LUKAS
Nopahtuk kesah
Injil ihtuh tonulih dokter Lukas. Lukas erih hojolahan mbak Paulus kotihkak dorok tulak ngesah tarung pios (Kolose 4:14; 2 Timotius 4:11).
Lukas uwas morisak khavun ngisok kesah mongenai Yesus Kristus tahkan ulun-ulun jok umbot nohtok kojadiu ah erih mbak mahtan doh, khavun iyok nulih ah ahkan Tiopilus kesah Yesus erih umbak torahtur (Lukas 1:1-2).
Lukas nulih buhkuk ihtuh ahkan ulun taꞌai ngindoi Yesus erih iyok noh Lacak Ponyolamat jok kononyanjik Hotalak ahkan ulun Israel khavun ahkan paring kolunon. Kolo jok tonulih luvang (Lukas 19:10) polombut Yesus noku duniak tuh yok noh: “Ngurah khavun nyolamat ulun jok iyam Ngorehti Tarung Pios.”
Lukas ngesah mongenai inai Yesus, khavun nyiring Yesus kongarok. Khavun ngesah beteng Yesus honong anak kinyam, umbot erih ngesah beteng Yohanes Pombaptis mombaptis Yesus. Khavun kesah mongenai inon jok kongajar Yesus nuk daerah Galilea khavun nuk daerah Yudea, nyiring Yesus tulak noku kota Yerusalem. Khavun ngesah inon jok uwas torjadik nuk Yerusalem nyiring Yesus tonavan, kongadil, khavun pomunuk nuk salib, khavun unuk Ah sonyalib. Turus ngesah kolo Yesus hulik bolum hinok, khavun mokarah arop Ah ahkan murit-murit Ah, nyiring Iyok nuhkat noku surga.
Nuk luvang Kitab Lukas 4:18 tonulih: Roh Hotalak nyuhuk Yesus ahkai Ah ngesah Tarung Pios ahkan ulun malax. Mahkak buhkuk ihtuh ngesah mongenai ulun jok jorak khavun ulun jok pononyorak. Jok tumbuk tonulih nuk buhkuk ihtuh iyok noh mongenai bodoa, Roh Hotalak, dolang bavik jok molayan Yesus, khavun dosa jok kongapun.
Khavun arok kak pirak kesah nuk Kitab ihtuh jok yarok kongesah nuk Kitab jok bohkon, kolo kesah Yesus kongarok (Lukas 2:1), Yesus nuk Lovun Hotalak (Lukas 2:45), kopios jok punak tulin (Lukas 10:25) khavun anak jok niho (Lukas 15:11).