TARUNG PIOS
JOK TONULIH
YOHANES
Nopahtuk kesah
Nuk luvang Tarung Pios jok kongesah Yohanes tuh, Yesus pomarak sobagai Auh Hotalak jok arok nyiring yarok tihkas nyamah ah, jok was jadik kolunon khavun jok mocon nuk holang tok paring ah. Kolo jok pomarak nuk luvang buhkuk ihtuh, Tarung Pios ihtuh tonulih supayak ulun jok ngomasak ah pocayak ngindoi Yesus noh Lacak Ponyolamat jok kononjanjik. Iyok arok noh Anak Hotalak. Khavun supayak nyihing pocayak mbak Yesus dolang ulun ngonduon komolum jok yarok tihkas nyamah ah (20:31).
Umbot kesah jok topahtuk erih pomarak kak ngindoi Auh Hotalak jok yarok tihkas nyamah ah erih arok noh Yesus, topahtuk kitab ihtuh ngesah paring aꞌang jok motaher jok konguan Yesus. Dolang aꞌang jok motaher erih motohtok ngindoi Yesus arok noh Lacak Ponyolamat jok konojanjik, Yesus arok noh Anak Hotalak. Mongenai paring aꞌang jok motaher tuh nuk luvang ah arok tuhtui kesah Tuhan Yesus mbak dolang ulun. Tahkan dolang tuhtui auh erih nyahtak inon jok tonohtok nyihing aꞌang jok motaher. Nuk luvang bagian ihtuh pomarak ngindoi arok ulun jok pocayak mbak Yesus khavun idoh jadik murit-Ah, totahpik arok kak jok ngolavan Iyok khavun iyam kanik pocayak mbak Iyok. Luvang pasal 13-17 tonulih mbak jelas bohkolo kodonik Yesus mbak dolang murit-Ah beteng ngolomik Iyok ahkan tonavan, khavun ngolomik erih kak Iyok nyodiak paring aꞌang khavun ngajar marak dolang murit-Ah supayak ahtoi doh tehtap borohon. Pasal-pasal jok pongohpah ah ngesah mongenai Yesus tonavan khavun kongadil, bohkolo Iyok sonyalib, mahtoi khavun hulik bolum hinok, khavun ngesah bohkolo Iyok mokarah arop-Ah ahkan dolang murit beteng Iyok hulik bolum.
Kesah mongenai bavik jok dahkang arop ah (Yohanes 8:1-11), ponosolong tandak jok kurung hajok kotului tumbuk torjemaah-torjemaah jaman holuk iyam nulih mongenai kesah ihtuh. Totahpik kitab jok bohkon nulih kesah erih iyam hatin tandak kurung.
Nuk luvang buhkuk jok tonulih Yohanes tuh ponokarah aꞌang jok punak peting jok tonongak Hotalak mongenai komolum jok kotuui ah khavun komolum jok yarok tihkas nyamah ah. Yok erih tonongak Hotalak nyihing Lacak Ponyolamat, tongak erih was tonopahtuk nuk duniak, khavun ulun-ulun jok norimak Yesus sobagai jalan doh noku Hotalak idoh touk ngomok ah, ngindoi Hotalak khavun lacak Ponyolamat jok nongak komolum. Tanda-tandak tahkan kitab Yohanes iyok noh dolang tindung jok oniu ah tahkan komolum tok bojondo-jondo ahkan mokarah ajar barak jok hinut, contoh ah: danum, roti, tarang, ponjagak domba khavun domba ah, puun anggur khavun buai ah.