Yesus hulik bolum
(Mat. 28:1-10; Mrk. 16:1-8; Yoh. 20:1-10)
24
Beteng ondo minggu ngohko-ngohkos tuꞌuk, dolang bavik erih tulak noku tanom ngonin daun jok buan segah khavun binyak wangi jok umbot idoh nyodiak ah. 2 Khavun nuk tanom erih, idoh nohtok bahtuk tuhtup tanom erih uwas botosarok noh. 3 Khavun idoh nyolong noku luvang tanom erih, totahpik iyam bohumbak mbak otun Yesus nuk anai. 4 Beteng idoh tombok nuk anai idoh pusong mihkir paring aꞌang erih, solengak lombut duok behtik ulun jok hatin hatik ngolondang tombok donik idoh. 5 Idoh mihkoh tuꞌuk, khavun nyiring bototuhkom noku tanak, beteng erih duok behtik ulun erih marak ahkan doh: “Ngombai ihkam ngurah ulun jok bolum nuk holang ulun mahtoi? 6 Iyok iyam arok nuk ohtoi. Iyok uwas hulik bolum noh! Nohouk ah inon jok uwas pomarak Ah ahkam muk beteng Iyok honong nuk Galilea. a 7 Ahkuk, Anak Kolunon harus sonyerah noku ulun bodosa, khavun sonyalib, khavun ondo kotoluk ah hulik bolum tahkan holang ulun mahtoi.”8 Mahkak tohoun bavik-bavik erih noh inon jok hiyon Yesus. 9 Ulik doh bulik tahkan tanom erih, idoh ngesah paring ah erih ahkan koduok balas rasul khavun paring ulun jok ngohasuk Yesus. 10 Bavik-bavik jok marak paring ah erih ahkan ulun jok ngohasuk Yesus, iyok noh Maria tahkan Magdala, Yohana khavun Maria inai Yakobus, khavun bavik-bavik jok bohkon ah jok hicok humbak umbak idoh. 11 Totahpik dolang rasul erih ngoravak bavik-bavik erih tihkas ngesah jok iyam-iyam, idoh iyam pocayak jok kongesah bavik-bavik erih. 12 Totahpik Petrus kuat khavui tombok nokoruk noku tanom Yesus, iyok nyolong khavui nohtok tihkas kain puhtik kiak nuk anai. Petrus pusong khavui bulik, iyok bokisok kisok nuk luvang ahtoi ah inon jok uwas torjadik.
Yesus mokarah arop Ah unuk jalan noku Emaus
13 Beteng ondo erih kak, duok behtik murit-murit Yesus nyalan noku icok desa jok ngarai ah Emaus, sokitar icok balas kilo mehter kacui ah tahkan Yerusalem. 14 Beteng dorok nyalan tahtup bokesah mongenai paring aꞌang jok uwas torjadik erih. 15 Lambak dorok bokesah khavun botuhkar pihkir, Yesus nyolengak lombut khavun nyalan hombo-homboh umbak dorok. 16 Dorok nohtok Yesus, totahpik arok aꞌang jok nguan dorok iyam nyokonok Iyok. 17 Khavun Yesus ngisok dorok: “Inon jok kongesah mik nuk tohun jalan tuh?”
Khavun dorok tondok umbak tapak jok liduk. 18 Khavun icok behtik nuk holang dorok jok ngarai ah Klopas, bokisok umbak Yesus: “Ihkok bongom muk kiak leh ulun Yerusalem jok iyam hokotaꞌan mbak aꞌang jok torjadik malom?”
19 Khavun Yesus ngisok iyok hinok: “Inon poh jok uwas torjadik?”
Khavun dorok marak ah: “Aꞌang jok uwas torjadik mbak Yesus, ulun tahkan Nazaret erih. Iyok nabik. Auh Ah khavun jok konguai Ah bokuasak tuꞌuk nuk ponohtok Hotalak khavun monurut ponohtok paring ulun. 20 Dolang kopalak okon agamak Yahudi khavun okon-okon bangsak tok nyerah Iyok ahkan kongohukum mahtoi, khavun idoh nyalib Iyok. 21 Podahal ihkai ngoharap Iyok ahkan molahpas bangsak tok Israel, khavun ondo ihtuh iyok noh ondo kotoluk ah ulik Iyok mahtoi. 22 Mahik hinok, arok pirak behtik bavik tahkan holang ihkai uwas nguan ihkai tokocit. Kotului ngohko-ngohkos idoh noku tanom, 23 totahpik iyam arok idoh nohtok otui Ah nuk anai. Khavun doh hulik marak ngindoi idoh nohtok molekat, khavun molekat erih marak ah Yesus hulik bolum. 24 Pirak behtik nuk holang ihkai tulak noku tanom khavun doh nohtok inon jok pomarak bavik-bavik erih punak tuꞌuk, idoh iyam nohtok Yesus.”
25 Khavun Yesus marak ahkan dorok: “Ihkam tuꞌuk baleh! Bohalik nyangit ihkam pocayak paring jok uwas pomarak dolang nabik! 26 Iyam leh Lacak Ponyolamat harus jorak holuk, ahkan ngonduon komuliaan Ah?” 27 Khavun Yesus marak ahkan dorok inon jok tonulih nuk paring luvang Kitab mongenai Iyok, tahkan hukum Taurat jok tonulih Musa khavun buhkuk dolang nabik.
28 Beteng uwas cohit kotihkak idoh donik desa Emaus. Yesus nguan kolo-kolou kanik nurus ponyalai Ah. 29 Totahpik dorok nahan Iyok. “Mocon noh umbak ihkai,” hiyon dorok ahkai Ah: “huntuh uwas manyo noh ngolomik khavun uwas manyo noh pindong.” Mahkak Yesus nyolong ahkan tiruh nuk dorok mocon erih. 30 Beteng tuot kuman umbak idoh, Yesus ngonin roti, khavun ngucap sukur mbak Hotalak, nyipa-nyipak roti erih mbak longoi Ah, khavui nongak ah ahkan dorok. 31 Beteng erih kak dorok sadar noh ngindoi erih Yesus. Totahpik Iyok solengak niho tahkan ponohtok doh. 32 Hiyon dorok ahkan jok bohkon ah: “Pahtut noh ahtoi tok ngandah nyangit, kotihkak Iyok bokesah umbak ihtok nuk tohun jalan, khavun marak suang Kitab ahkan ihtok.”
33 Beteng erih kak dorok tombok turus nyalan khavun hulik noku Yerusalem. Nuk anai dorok bohumbak mbak sobalas behtik murit Yesus beteng dorok hokupur mbak murit-murit jok bohkon. 34 Dorok erih marak ah: “Punak tuꞌuk Tuhan uwas hulik bolum hinok! Iyok uwas mokarah arop Ah ahkan Simon!”
35 Khavun duok behtik jok ngohasuk Yesus, jok punan doh lombut erih turus ngesah ponyakum dorok nuk tohun jalan, khavun dorok botosadar kotului erih Yesus, beteng Iyok nyipak roti.
Yesus mokarah arop Ah ahkan ulun-ulun jok ngohasuk Iyok
36 Lambak idoh paring ah honong bokesah, solengak Yesus bongoi tombok nuk tohun-tohun idoh khavui marak Ah: “Damai sojahtera ahkam mik.”
37 Idoh tokocit khavun mihkoh, idoh davak Yesus erih otuk. 38 Totahpik Yesus marak Ah: “Ngombai ihkam mihkoh? Ngombai lopung koderoh nuk luvang ahtoi muk? 39 Nohtok longok Kuk khavun nohtok ah noh paꞌak Kuk. Ahkuk noh ihtuh, namit khavun nohtok ah, kotului otuk iyam arok usiu khavun tulang ah, kolo jok tonohtok mik mbak Ahkuk.”
40 Yesus marak koderih nahtup motohtok ahkan doh longoi khavun paꞌai Ah. 41 Khavun lambak idoh jaham dalo pocayak, tului idoh punak ngandah khavun pusong, Yesus bokisok umbak idoh: “Arok iyam ihkam tepun ukun ponguman nuk ohtoi?” 42 Idoh nongak ahkai Ah icok putung ocin kongisak. 43 Yesus ngonin ocin erih, khavui kumai nuk husuk doh.
44 Umbot erih Iyok marak ahkan doh: “Ihtuh noh aꞌang jok uwas umbot Kuk marak ahkan mik kotihkak Ahkuk honong hicok humbak umbak ihkam: Kotului paring jok tonulih mongenai Ahkuk nuk luvang hukum Taurat jok tonulih Musa, Kitab dolang nabik, khavun Mazmur, harus torjadik.”
45 Khavun Yesus nguvat ahtoi pihkir doh ahkan idoh ngorehti suang Kitab. 46 Khavun Iyok marak ahkan doh: “Nuk luvang Kitab tonulih ngindoi Lacak Ponyolamat harus jorak, khavun hulik bolum hinok tahkan pomalus Ah beteng ondo kotoluk. 47 Khavun umbak kuasa Lacak Ponyolamat erih ihkam harus marak ah ahkan paring bangsak ngindoi kolunon harus botobat, kotului Hotalak ngampun dosa. Tarung erih nyamah pomarak topahtuk ah tahkan Yerusalem. 48 Ihkam noh saksi-saksi tahkan paring ah erih. 49 Khavun Ahkuk ahkan motiang ahkan mik Roh Kudus jok uwas kongojanjik Amai Kuk. Totahpik ihkam harus tehtap ngindoi nuk kota ihtuh nyiring Hotalak nongak kuasa Roh Kudus Ah ahkam mik.” b
Yesus tokahtang noku surga
50 Ulik erih Yesus ngomin idoh boluak tahkan kota Yerusalem nyiring donik kapung Betania. Nuk anai Iyok ngahtang longoi Ah, khavui momberkat idoh. 51 Beteng Iyok ngahtang longoi Ah, khavun momberkat idoh, Iyok tokahtang noku surga, khavui hobomilang umbak idoh. 52 Idoh botosukuk nyembah Iyok, khavun hulik noku Yerusalem mbak ahtoi jok punak ngandah. 53 Khavun idoh nulo tulak nuk Lovuk Hotalak ahkan momuji Iyok.