Yesus hulik bolum tahkan pahtoi-Ah
(Mat. 28:1-10; Mrk. 16:1-8; Luk. 24:1-12)
20
Beteng ondo minggu topolaoi, ondo honong mindong, Maria Magdalena tulak noku tanom. Iyok nohtok bahtuk jok nuk nuhtup tanom erih was tosarok tahkan tukang tanom erih. 2 Mahkak Maria nokoruk ngurah Simon Petrus khavun murit jok kongasih Yesus, khavun hiyoi ah ahkan dorok: “Ulun was ngomin otun Tuhan Yesus tahkan tanom, khavun iyam kai taꞌai nuk amoh doh nginak otui Ah.”3 Mahkak Petrus mbak murit jok kongasih Yesus erih tulak noku tanom. 4 Dorok nokoruk, totahpik jolahan Petrus erih yamios kodaras ah nokoruk, khavun iyok holuk mbak Petrus dahpot nuk tanom erih. 5 Iyok tunop tahtup nyokilik noku luvang tanom khavun nohtok kain jok nuk mukus otun Yesus erih botihkas nuk tanak, totahpik murit jok konasih Yesus erih iyam nyolong. 6 Khavun Simon Petrus ngohasuk nuk lihkut ah, iyok turus nyolong noku luvang tanom erih. Iyok pun nohtok kain jok nuk mukus otun erih botihkas nuk tanak. 7 Totahpik kain jok konahut nuk kuhung Yesus, iyam bototihkas nuk donik kain nuk mukus otui-Ah, tahpik botihpok nuk bohkon. 8 Mahkak murit Yesus jok holuk dahpot nuk tanom erih, iyok halik nyolong kak. Beteng iyok nohtok paring ah erih iyok jadik pocayak ngindoi Yesus hulik bolum. 9 Kotului nyiring hun erih idoh iyam ngorehti inon jok tonulih luvang Kitab Suci ngindoi Yesus alah hulik bolum tahkan pahtoi-Ah. 10 Umbot erih duok behtik murit Yesus erih pun bulik.
Yesus motohtok arop Ah ahkan Maria Magdalena
(Mat. 28:9-10; Mrk. 16:9-11)
11 Totahpik Maria Magdalena tombok nuk luar tanom tahtup nangih. Beteng ah nangih, iyok nyokilik noku luvang tanom erih, 12 Khavun iyok nohtok duok behtik molekat hatin kolambik puhtik. Molekat jok icok tuot nuk lohkun kuhung Yesus ponokaling khavun jok icok ah hinok tuot nuk lohkun paai-Ah. 13 Molekat-molekat erih bokisok: “Inai mbai kok nangih?”
Maria mutah ah: “Otun Tuhan kai was onin ulun, khavun iyam kai taꞌai nuk amoh doh nginak otui Ah.”
14 Umbot bokesah naing erih, Maria nohtok noku lihkut iyok nohtok arok Yesus tombok nuk anai. Totahpik iyam yok taꞌai ngindoi erih Yesus. 15 Yesus bokisok mbak iyok: “Inai mbai kok nangih? Inai ngurah iyai?”
Davak Maria Iyok tuhkang jagak taman erih, jadik hiyon Maria ahkai-Ah: “Tuan, ngindoi Tuan jok nyarok Yok tahkan ohtoi, kuk nyavot khavat mbak Tuan supayak marak unuk kok nihkas Iyok, supayak kuk touk ngonin Yok.”
16 Yesus naꞌah, hiyoi-Ah: “Maria!”
Maria molio noku Yesus khavun bokesah luvang auh Ibrani, hiyoi: “Rabuni!” rehti ah “Guruk”.
17 Hiyon Yesus ahkai ah: “Arak namit Ahkuk, kotului Ahkuk jaham tulak noku Amai. Totahpik tulak nai noku dolang murit Kuk, khavun marak ah ahkan doh ngindoi huntuh Ahkuk ahkan tulak noku Amai Kuk jok arok noh Amai doh kak, Iyok arok noh Hotalak Kuk khavun Hotalak doh kak.”
18 Mahkak Maria Magdalena tulak marak ahkan dolang murit Yesus ngindoi iyok was nohtok Tuhan. Khavun iyok marak ah ahkan doh inon jok was pomarak Yesus ahkai ah.
Yesus motohtok arop-Ah ahkan dolang murit-Ah
(Mat. 28:16-20; Mrk. 16:14-18; Luk. 24:36-49)
19 Beteng ondo minggu erih kak, kotihkak was ngolomik, dolang murit Yesus hokupur nuk icok lohpo jok dolang atop ah tokucik uras, kotului idoh mihkoh mbak dolang pomipin Yahudi. Nyolengak Yesus lombut khavun tombok nuk tohun idoh khavun hiyoi-Ah: “Damai sojahtera ahkan mik!”
20 Umbot yok bokesah naing erih, Iyok mokarah ahkan doh lohkun havan jok nuk longoi khavun bolihkat Ah. Beteng murit-murit nohtok Tuhan Yesus, idoh punak ngandah. 21 Khavun sinok hinok Yesus marak ahkan doh, hiyoi Ah: “Damai sojahtera ahkan mik. Kolo Amai nguhtus Ahkuk noku luvang duniak, koderih kak huntuh Ahkuk nguhtus ihkam.” 22 Umbot erih Iyok ngomusik hasong-Ah ahkan doh, hiyoi-Ah: “Norimak ah noh Roh Hotalak luvang ahtoi mik. 23 Ngindoi ihkam ngapun dosa ulun, Hotalak halik ngapun dosa ah kak. Totahpik ngindoi ihkam iyam ngapun dosa ulun erih, mahkak Hotalak halik iyam ngapun dosa ah kak.” a
Yesus motohtok arop-Ah ahkan Tomas
24 Totahpik Tomas icok behtik tahkan koduok balas murit Yesus, jok pomarak anak kembar, iyam arok hicok mbak dolang murit jok bohkon kotihkak Yesus mokarah arop-Ah ahkan doh. 25 Mahkak dolang murit Yesus jok bohkon lombut noku Tomas, idoh nulo marak ah: “Ihkai was nohtok Tuhan Yesus!”
Totahpik Tomas mutah doh: “Ngindoi ahkuk jaham nohtok lohkun pahkuk nuk longoi-Ah, khavun jaham ahkuk nihkas boravai kuk nuk lohkun pahkuk erih, khavun jaham ahkuk nihkas boravai kuk nuk bolihkat Ah, mahkak ahkuk iyam ahkan pocayak.”
26 Jaluk ondo ulik erih dolang murit Yesus idoh hokupur hinok nuk lohpo erih, Tomas arok kak nuk anai. Paring atop tokucik, totahpik Yesus lombut khavun tombok nuk tohu-tohun idoh, khavun hiyoi Ah ahkan doh: “Damai sojahtera ahkan mik.” 27 Khavun hiyon Yesus ahkan Tomas: “Nohtok ah longok-Kuk, khavun nihkas boravai muk nuk ohtoi. Nonjuluk ah longom muk khavun nihkas ah nuk bolihkat-Kuk. Arak deroh nai, tahpik pocayak noh!”
28 Hiyon Tomas ahkan Yesus: “Ihkok Tuhan kuk khavun Hotalak kuk!”
29 Mahkak hiyon Yesus ahkai ah: “Ihkok pocayak kotului was nohtok Ahkuk, holovik ngandah ulun jok pocayak holuk poh iyok iyam nohtok Ahkuk!”
Ngombai Yohanes nulih Tarung Pios ihtuh
30 Tumbuk ah hinok aꞌang jok motaher jok konguan Yesus nuk husuk dolang murit-Ah, totahpik iyam paring ah tonulih nuk luvang kitab ihtuh. 31 Totahpik paring ihtuh tonulih, supayak ihkam pocayak ngindoi Yesus arok noh Lacak Ponyolamat, Anak Hotalak. Khavun kotului pocayak mbak Iyok, ihkam ngonduon komolum jok yarok tihkas nyamah ah hicok mbak Hotalak.