Yesus motohtok arop-Ah ahkan pihtuk behtik murit
21
Khavun arok pirak ondo ulik erih Yesus motohtok arop-Ah hinok ahkan murit-murit-Ah nuk kovang danau Tiberias. Kolihtuh kesah ah: 2 Icok ondo Simon Petrus, Tomas jok pomarak anak kembar, Natanael jok tahkan kota Kana nuk daerah Galilea, duok behtik anak Zebedeus, khavun duok behtik murit Yesus jok bohkon ah hinok, idoh kupur. 3 Hiyon Simon Petrus ahkan doh jok bohkon: “Ahkuk kanik tulak monyalak ocin.”Hiyon doh mutah yok: “Ihkai ngohasuk ihkok.” Mahkak idoh pun tulak hapan alut. Totahpik icok ngolomik erih, idoh yam ngonduon ino-inon. a 4 Ngohko-ngohkos tuꞌuk, Yesus tombok nuk kovang danau Tiberias, totahpik dolang murit-Ah iyam doh taꞌai ngindoi erih Yesus. 5 Hiyon Yesus ahkan doh: “Oo, dolang anak, inon leh arok ocin mik?”
Hiyon doh mutah Yok: “Iyam arok.”
6 Hiyon Yesus ahkan doh: “Nosahkah jalak muk noku silak kotouk alut, mahkak ihkam ahkan ngonduon ocin.” Khavun jalak erih tonosahkah doh, totahpik yam duon doh nguhut ah hinok noku luvang alut kotului yamios karon ocin ah. b
7 Hiyon murit jok konasih Yesus, ahkan Petrus: “Nohtok ah noh erih Tuhan!” Kotihkak Petrus nyonih ngindoi erih Tuhan Yesus, iyok hatin kolambiu ah tului iyok toburang kolambik khavui nyohovuk noku luvang danum. 8 Dolang murit jok bohkon pun ngavus alut erih noku saran kovang tahtup nguhut jalak jok tuvik konguan ocin erih, kotului idoh yam macuk tahkan saran kovang, sokitar solahtus mehter kiyak. 9 Kotihkak idoh dahpot nuk saran kovang, idoh nohtok ocin nuk diang bahon ahpui khavun arok kak roti jok honong pomahpui nuk diang ahpui erih. 10 Khavun hiyon Yesus ahkan doh: “Cobak ngoniu noku ohtoi pirak kungan ocin jok punan kam ngonduoi ah.”
11 Petrus nuhkat noku alut, khavun nguhut jalak erih noku kovang. Jalak erih tuvik konguan ocin jok hajo-hajok, paring ah solahtus liman puluk toluk kungan. Holuk poh karon erih jalak doh iyam borutat. 12 Hiyon Yesus ahkan doh: “Hai tok manjak.” Yarok icok behtik pun dolang murit-Ah jok bohanyik bokisok kolihtuh: “Kok Iyai Amai?” Kotului idoh was taꞌai ngindoi Iyok arok noh Tuhan Yesus. 13 Khavun Yesus ngoronik idoh turus ngonin roti khavun magi-magik ah ahkan doh. Iyok pun ngonin ocin jok was kongisak erih khavun magik ah ahkan doh.
14 Erih noh jok kotoluk kali ah Yesus motohtok arop-Ah ahkan dolang murit-Ah, ulik Iyok hulik bolum tahkan pomalus-Ah.
Yesus nyavot mbak Petrus supayak ngurus dolang domba-Ah
15 Umbot doh manjak, Yesus bokisok mbak Simon Petrus: “Simon, anak Yohanes, inon reh ihkok mongasihi Ahkuk holovik tahkan paring dolang jolaham muk tuh?”
Khavun hiyon Petrus mutah ah: “Tuꞌuk Tuhan, Ihkok taꞌai ngindoi ahkuk mongasihi Ihkok.”
Khavun hiyon Yesus ahkai ah: “Ngurus ah noh dolang ulun jok pocayak mbak Ahkuk, kolo icok behtik ponjagak domba tuꞌuk-tuꞌuk ngurus dolang domba ah.”
16 Yesus bokisok jok koduok kali ah ahkan Petrus: “Simon, anak Yohanes, inon leh ihkok mongasihi Ahkuk?”
Petrus mutah ah: “Tuꞌuk Tuhan, Tuhan taꞌai kuk mongasihi Tuhan.”
Hiyon Yesus ahkai ah: “Ngurus ah noh dolang ulun jok pocayak mbak Ahkuk, kolo icok behtik ponjagak domba tuꞌuk-tuꞌuk ngurus dolang domba ah.”
17 Kotoluk kali ah Yesus bokisok mbak Petrus: “Simon, anak Yohanes, inon leh ihkok mongasihi Ahkuk?”
Petrus jadik piluk kotului Yesus bokisok mbak iyok nyiring toluk kali. Mahkak hiyon Petrus mutah Yok hinok: “Tuhan, Tuhan taꞌai paring ah. Tuhan taꞌai kuk mongasihi Ihkok!”
Khavun hiyon Yesus ahkai ah: “Ngurus ah noh dolang ulun jok pocayak mbak Ahkuk, kolo icok behtik ponjagak domba tuꞌuk-tuꞌuk ngurus dolang domba ah. 18 Punak tuꞌuk auh Kuk tuh: Beteng ihkok honong bio, ihkok noh jok ngurus arop muk bongom, khavun tulak noku amoh kiyak kok kanik. Totahpik ngindoi ihkok was okok nain, ihkok ahkan nonjuluk longom muk, khavun ulun bohkon ahkan ngahut longom muk, idoh ahkan ngonin ihkok noku amoh jok elem tulak noku anai.” 19 Mbak auh erih Yesus motohtok ah bohkolo Petrus ahkan mahtoi khavun nyihing pahtoi ah Hotalak konolehkak. Hiyon Yesus ahkan Petrus: “Pahtuh noh ngohasuk Ahkuk!”
Murit jok konasih Yesus
20 Beteng Petrus molio noku lihkut ah, iyok nohtok murit jok konasih Yesus ngohasuk idoh. Murit erih iyok noh jok tuot donik Yesus beteng doh hombo-homboh kuman, khavun murit erih kak jok bokisok: “Iyai ulun jok ahkan ngohianat Ihkok?” c 21 Kotihkak Petrus nohtok murit erih, iyok bokisok mbak Yesus, hiyoi ah: “Tuhan inon jok ahkan torjadik mbak iyok?”
22 Yesus mutah ah: “Ngindoi Ahkuk kanik iyok bolum nyiring Ahkuk hulik lombut, ihkok arak noh mihkir erih. Tahpik ihkok tuꞌuk-tuꞌuk noh ngohasuk Ahkuk!”
23 Mahkak sonyonih noh kesah nuk holang ulun-ulun jok pocayak mbak Yesus ngindoi murit jok kongasih-Ah erih iyam ahkan mahtoi. Totahpik Yesus yarok marak ahkan Petrus ngindoi murit erih iyam ahkan mahtoi, tahpik hiyon Yesus: “Ngindoi Ahkuk kanik iyok bolum nyiring Ahkuk hulik lombut, ihkok arak noh mihkir erih.”
24 Murit erih noh jok nongak kosaksian mongenai aꞌang jok torjadik ihtuh. Iyok kak jok nulih ah. Khavun ihtok taꞌai inon jok pomarak ah erih hinut.
Auh jok pongohpah ah
25 Tumbuk ah nok aꞌang jok bohkon jok konguan Yesus totahpik ngindoi paring ah erih tonulih mico-micok, mahkak davak kuk duniak ihtuh iyam ahkan cuhkup unuk nginak paring buhkuk-buhkuk jok ahkan tonulih erih.