19
Ulik erih Pilatus ngonin Yesus khavun nyuhuk dolang porajurit nyambuk Iyok. 2 Dolang porajurit erih napak mahkota tahkan pahting kajuk jok hoduhik, khavun nihkas nuk kuhung Yesus. Umbot erih idoh mosoloh ahkai-Ah jubah jok warna ungu. 3 Idoh nulo ngoronik Yesus khavun purak-purak ngolehkak Iyok, hiyon doh ahkai-Ah: “Ngolehkak ah noh Lacak ulun Yahudi!” Khavun doh nulo nopeleng Yok.4 Umbot erih Pilatus boluak hinok khavun hiyoi ah ahkan dolang pomipin agamak Yahudi erih: “Nohtok ah! Ahkuk ngonin Yok boluak ahkan mik, supayak ihkam taꞌai yarok kuk nyombang inon kosalak-Ah.” 5 Mahkak Yesus boluak hatin mahkota duhik khavun jubah ungu erih. Hiyon Pilatus ahkan doh: “Ihtuh Yok ulun ah.”
6 Kotihkak dolang kopalak pomipin agamak Yahudi khavun dolang ponjagak Lovun Hotalak erih nohtok Yesus, idoh ngoriak: “Nyalib ah noh Iyok! Nyalib ah noh Iyok!”
Hiyon Pilatus ahkan doh: “Ngoniu ah noh Iyok, khavun ihkam noh jok nyalib Yok, yarok kuk nyombang kosalak ah.”
7 Ulun-ulun Yahudi erih mutah ah: “Monurut hukum ekai, Iyok alah konohukum mahtoi kotului Iyok ngahkuk arop ah Anak Hotalak.”
8 Kotihkak Pilatus nyonih doh bokesah naing erih, iyok mahi-mahik mihkoh ngohukum Yesus nyiring mahtoi. 9 Mahkak iyok nyolong nok noku luvang istana ah khavun beteng Yesus was mbot noh doh ngoniu nyolong, Pilatus bokisok mbak Iyok, hiyoi: “Asal muk tahkan amoh?”
Totahpik Yesus yam mutah ah. 10 Hiyon Pilatus hinok: “Ihkok elem bokesah mbak ahkuk? Nyonih ah, ahkuk tepun kuasak supayak molahpas Ihkok, khavun tepun kuasak kak nyalib Ihkok!”
11 Yesus mutah ah: “Ngindoi Hotalak iyam nongak kuasak erih ahkam muk, ihkok iyam ahkan bokuasak mongenai komolum Kuk. Kotului erih ulun jok nyerah Ahkuk noku ihkok dosa doh holovik hajok mbak dosa jok ahkan konguam muk ahkak Kuk.”
12 Kotihkak Pilatus nyonih paring kesah Yesus erih, iyok ngotiak molahpas Yesus. Totahpik dolang ulun Yahudi ngoriak hiyon doh: “Ngindoi Tuan Gubernur molahpas Iyok, Tuan ngolavan Kaisar lacak Roma! Kotului ulun jok ngahkuk arop ah lacak, iyok arok noh musuh Kaisar!”
13 Kotihkak Pilatus nyonih auh doh erih, iyok ngonin Yesus boluak khavun tuot nuk bangku pongadilan nuk anai jok pomarak “Saoh Bahtuk”. Luvang auh Ibrani ngarai ah Gabata.
14 Kotihkak erih manyo noh jam duok balas hondo, beteng ondo sojaham ngoramik Paskah. Pilatus marak ahkan dolang pomipin Yahudi, hiyoi: “Ihtuh noh Lacak mik!”
15 Idoh ngoriak: “Munuk Iyok! Munuk Iyok! Nyalib ah noh Iyok!”
Pilatus bokisok: “Inon leh Ahkuk alah nyalib Lacak mik?”
Dolang kopalak pomipin agamak Yahudi erih mutah ah: “Kaisar kiyak ico-icok ah lacak kai!” 16 Mahkak Pilatus nyerah Yesus ahkan dolang porajurit supayak sonyalib. Idoh ngonin Yesus tulak tahkan anai.
Yesus sonyalib
(Mat. 27:32-44; Mrk. 15:21-32; Luk. 23:26-43)
17 Tahtup nakung salib Ah Yesus tulak noku unuk jok ngarai ah Unuk Tengkorak, luvang auh Ibrani ngarai ah Golgota. 18 Nuk anai Iyok sonyalib. Hombo-homboh mbak Iyok arok kak duok behtik ulun jok sonyalib, icok behtik nuk silak uloi-Ah, icok behtik nuk silak kotoui-Ah, Yesus nuk tohu-tohun dorok. 19 Nuk kajuk salib Yesus diang kuhung Ah, Pilatus nyuhuk ulun mahtuk pahpan jok tonulih, hiyon tulih erih: “Yesus ulun Nazaret, Lacak ulun Yahudi.” 20 Tulih erih luvang auh Ibrani, auh Latin, khavun auh Yunani. Tumbuk ulun Yahudi ngomasak tulih erih, tului nuk Yesus sonyalib iyam macuk tahkan kota. 21 Hiyon dolang Kopalak pomipin agamak Yahudi ahkan Pilatus: “Arak nulih ‘Lacak ulun Yahudi’, tahpik nulih ah noh, ‘Ulun ihtuh marak ah, Ahkuk Lacak ulun Yahudi.’ ”
22 Totahpik Pilatus mutah ah: “Ahkuk iyam ahkan ngatik inon jok was tonulih kuk.”
23 Beteng dolang porajurit erih was umbot nyalib Yesus, idoh molahpas dolang hatiu Ah. Khavun magik ah jadik ohpat, icok porajurit ngonduon icok. Idoh halik ngomin jubah-Ah. Jubah erih yam arok tusuk ah tahkan pindak nyiring isung. 24 Dolang porajurit erih bokesah icok mbak jok bohkon hiyon doh: “Arak tok nohtok jubah ihtuh. Hai tok undi iyai jok ahkan ngonduoi ah.” Mahkak torjadik noh inon jok tonulih luvang Kitab Suci:
“Idoh ahkan magi-magik hatik-Kuk nuk holang idoh paring ah,
khavun doh undi hotaruh iyai jok ngonduon jubah Kuk.”
Khavun paring ah erih konguan dolang porajurit erih. a
25 Nuk donik salib Yesus nuk anai kak inai Ah tombok, khavun bavik jok jolahan inai Ah harik, khavun Maria oruh Klopas, khavun Maria Magdalena. 26 Kotihkak Yesus nohtok inai Ah khavun murit jok kongasih-Ah tombok nuk donik inai-Ah, hiyoi-Ah ahkan inai-Ah: “Inai! Ihtuh noh anak muk!” 27 Khavun hiyon Yesus ahkan murit-Ah erih: “Tahkan huntuh iyok atuh inai muk!” Jadik tahkan ondo erih murit jok kongasih-Ah ngonin inai Yesus mocon nuk lohpo ah.
Pahtoi Yesus
(Mat. 27:45-56; Mrk. 15:33-41; Luk. 23:44-49)
28 Yesus taꞌai ngindoi huntuh Iyok was nguan paring ah jok alah Yok nguai ah. Khavun supayak paring aꞌang jok tonulih luvang Kitab Suci touk torjadik, hiyon Yesus: “Ahkuk haus.” b
29 Nuk anai arok botoran tuvik mbak danum anggur jok mosom. Mahkak porajurit erih ngipos savut japau noku danum anggur mosom, khavun nihkas savut japau erih noku topahkan kajuk khavun ngunjung ah noku baun Yesus. 30 Umbot Yesus ngorih danum anggur mosom erih khavun hiyoi-Ah: “Was umbot!”
Khavui nunop kuhung-Ah Iyok pun turus mahtoi.
Icok behtik porajurit nevek bolihkat Yesus
31 Ondo erih arok noh ondo Jumaat porsiapan ahkan Ondo Sabat. Dolang pomipin Yahudi iyam kanik otun ulun-ulun jok sonyalib erih honong nuk isung salib doh beteng Ondo Sabat, Tului tumbas beteng ondo sabat erih arok noh ondo hajok. Mahkak ulun-ulun Yahudi nyavot ijin mbak Pilatus supayak nyuhuk dolang porajurit-porajurit Roma molot paan ulun-ulun jok sonyalib erih ahkan doh pohos palus. Khavun idoh halik nyavot dolang otun ulun erih nohkak ah tahkan salib. 32 Mahkak dolang porajurit erih tulak khavun molot paan koduok ulun jok sonyalib nuk hokosilak Yesus. 33 Totahpik kotihkak idoh dahpot noku otun Yesus, idoh nohtok Iyok was mahtoi. Jadik idoh iyam molot paai-Ah. 34 Totahpik icok behtik porajurit nevek bolihkat Yesus mbak lunjuk sohinggak boluak dahak khavun danum.
35 Ulun jok nohtok ah bongoi paring ah erih, iyok noh jok ngesah paring ah erih, jadik iyok taꞌai ngindoi inon jok pomarak ah erih hinut. Iyok bokesah aꞌang jok hinut erih supayak ihkam pocayak. 36 Paring aꞌang erih torjadik supayak nyolung noh inon jok tonulih luvang Kitab Suci, jok marak ah: “Iyam arok icok pun tahkan paring tulang ah jok ahkan ponolot.”c d 37 Nuk luvang Kitab Suci halik tonulih: “Idoh ahkan nohtok Iyok jok was tonevek doh.” e
Yesus tonanom
(Mat. 27:57-61; Mrk. 15:42-47; Luk. 23:50-56)
38 Umbot erih arok icok behtik ulun jok pocayak mbak Yesus ngarai ah Yusup iyok tahkan Arimatea. Tahpik iyok pocayak toni-tonih kiyak kotului iyok mihkoh mbak dolang pomipin Yahudi. Iyok nyavot ijin mbak Pilatus supayak iyok ngonin otun Yesus. Pilatus pun nongak yok ijin, sohinggak Yusup ngonin otui-Ah. 39 Nikodemus, jok pujik lombut noku Yesus beteng ngolomik khavun bokesah mbak Iyok, khavun beteng erih Nikodemus hombo-homboh mbak Yusup. Nikodemus pun ngonin rempah binyak mur khavun gaharu, karon dolang rempah erih sokitar tolun puluk kilo. f 40 Yusup khavun Nikodemus ngonin otun Yesus khavun mukus ah mbak kain puhtik hicok mbak rempah jok wangi erih. Aꞌang erih konguan monurut adat ulun Yahudi ngindoi idoh ngurus otun sojaham tonanom. 41 Nuk donik Yesus sonyalib arok icok taman. Nuk taman erih arok luvang bahtuk jok was sonyodiak unuk nanom khavun luvang bahtuk erih jaham pujik hatin nanom ulun. 42 Kotului tanom erih donik, mahkak dorok nihkas otun Yesus nuk anai. Tului yam arok waktu doh nai kotului was dahpot noh ohkot ah porsiapan Ondo Sabat ahkan ulun Yahudi.