Yesus noharep Pilatus
(Mat. 27:1-2, 11-14; Mrk. 15:1-5; Yoh. 18:28-38)
23
Khavun paring ulun jok umbak pokarak erih tombok khavun doh ngitot Yesus ahkan noharep Pilatus. 2 Nuk anai idoh nondah Yesus, idoh marak ah: “Ulun ihtuh molanyat bangsak kai. Iyok majak paring ulun, supayak doh iyam ngomayar pajak ahkan Kaisar, khavun Iyok ngahkuk arop Ah Kristus, Iyok noh lacak ulun Yahudi.”3 Khavun Pilatus ngisok Yesus: “Tuꞌuk noh leh ihkok lacak ulun Yahudi?”
Yesus mutah ah: “Iyok, Ihkok noh jok marak ah.”
4 Mahkak hiyon Pilatus ahkan okon-okon agamak khavun ulun arok erih: “Ahkuk iyam nyombang icok kosalak pun mbak Ulun ihtuh ahkak touk kuk ngohukum Iyok.”
5 Totahpik idoh mahi-mahik ngonyonyok Pilatus: “Mbak ajar ah, Iyok nyavung paring ulun nuk Yudea. Topahtuk ah nuk Galilea, khavun huntuh uwas dahpot noh nuk ohtoi.”
Yesus kongomin noku Herodes
6 Kotihkak Pilatus nyonih dolang auh guru-guruk agamak erih, iyok ngisok: “Inon, ulun ihtuh ulun Galilea?” 7 Kotihkak Pilatus taꞌai ngindoi Yesus tahkan daerah jok konguasak Herodes, Pilatus nyuhuk idoh ngitot Yesus noku Herodes, hun erih tumbas kak Herodes arok nuk Yerusalem. 8 Kotihkak Herodes nohtok Yesus, iyok ngandah tuꞌuk tului uwas tahik noh iyok nyonih mongenai Yesus khavun kanik nohtok Iyok. Herodes ngoharap touk nohtok Yesus nguan aꞌang jok motaher. 9 Tului erih Herodes tumbuk ngisok Iyok, totahpik Yesus iyam mutah icok pun tahkan kisok ah. 10 Okon-okon agamak Yahudi khavun guru-guruk agamak erih arok kak nuk anai, idoh nyangit nondah Yesus nguan aꞌang jok jaek. 11 Herodes khavun dolang porajurit ah nyangit ngohinak khavun ngolunyik Yesus, khavun mosoloh Iyok umbak jubah lacak jok tamam, khavun hulik ngitot Iyok hinok noku Pilatus. 12 Beteng erih kak Herodes khavun Pilatus jok holuk ah bomusuh jadik hojolahan.
Pilatus nongak Yesus ahkan kongohukum
13 Khavun Pilatus ngupur dolang kopalak okon agamak, okon-okon Yahudi khavun dolang ulun arok. 14 Khavui marak ahkan idoh: “Ihkam uwas ngomin ulun ihtuh noku ahkuk khavun nondah Iyok ngolanyat ulun arok, huntuh nuk husuk mik ahkuk uwas morisak Iyok, khavun paring aꞌang jok tonondah mik ahkai Ah yarok kuk nyombang ah. 15 Koderih kak monurut Herodes, tului iyok motiang ulun Tuh hulik hinok noku ihtok nuk ohtoi. Ulun Ihtuh iyam nguan kosalak icok inon pun jok pahtut ahkan kongohukum mahtoi. 16 Tului erih ahkuk ahkan nyambuk Iyok khavun molahpas Ah.”
17 [Beteng ngoramik Paskah, Pilatus harus molahpas ahkan ulun Yahudi icok behtik ulun jok tonahan ah.]
18 Totahpik paring ulun jok kupur nuk anai havoi ngoriak: “Munuk Iyok! Molahpas Barabas ahkan kai!” 19 Barabas tonahan kotului iyok ngolavan pomoretah Roma khavun munuk icok behtik ulun nuk kota erih.
20 Pilatus kanik molahpas Yesus, tului erih iyok nuhtui sinok hinok mbak auh jok mohing ahkan ulun arok erih. 21 Totahpik idoh ngoriak: “Nyalib ah Iyok, nyalib ah noh Iyok!”
22 Khavun jok kotoluk kali ah nok Pilatus marak ah: “Totahpik inon kosalak Ah? Ahkuk iyam nyombang icok kosolai ahkai Ah pahtut kongohukum mahtoi! Ahkuk ahkan nyambuk Iyok khavun ahkan molahpas Iyok.”
23 Totahpik idoh makin mohing ngoriak khavun marak ah tului Yesus harus sonyalib. Khavun pongohpah ah idoh manang mbak koriak doh jok mohing nyangit. 24 Mahkak Pilatus ngohasuk kojolik ulun arok erih khavui nongak hukuman mahtoi ahkan Yesus. 25 Khavun molahpas ulun jok sonyavot doh, iyok noh Barabas jok ngolavan pomorintahan Roma khavun munuk icok behtik ulun. Khavun nongak Yesus ahkan idoh nguan inon jok konganin doh umbak Iyok.
Yesus sonyalib
(Mat. 27:32-44; Mrk. 15:21-32; Yoh. 19:17-27)
26 Mahkak Yesus pun kongomin doh. Noku holang jalan, idoh bohavung umbak ulun jok ngarai ah Simon tahkan Kirene, jok nyolong noku kota erih. Idoh nahan khavun mahpak iyok ahkai nakung salib ngohasuk Yesus.
27 Tumbuk ulun jok nyalan ngohasuk Yesus tahkan lihkut, nuk holang idoh erih arok kak bavik-bavik jok mongasihi khavun nangih Iyok. 28 Totahpik Yesus moliyo noku idoh khavun marak Ah: “Oo bavik-bavik Yerusalem! Arak noh ihkam nangih Ahkuk. Nangih ah noh arop mik khavun anak-anak mik. 29 Kotului ahkan arok kotihkak ah ulun ahkan nuhtui khavun marak ah: ‘Borutung noh bavik-bavik jok iyam taꞌai botohik, jok iyam alik noposuk anak kinyam!’ 30 Beteng erih kak ulun ahkan nuhtui ahkan puruk-puruk, ngohop ah noh ihkai, khavun ahkan dolang korong: ‘Ngahput ah noh ihkai!’ a 31 Ngindoi ulun-ulun nguan Ahkuk kolo ihtuh, nikos ihkok maham ah kojaek jok bokolo hinok ahkan konguan kolunon kotihkak uwas docok kotihkak ah?”
32 Arok kak duok behtik ulun jok bohkon, dorok ulun jok jaek, jok kongomin doh ahkan kongohukum homboh umbak Yesus. 33 Kotihkak uwas dahpot noh unuk jok kongohavot doh “Koravang”, idoh nyalib Yesus nuk holang duok behtik ulun jok jaek erih, icok ah nuk silak kotoun Yesus khavun jok icok ah nuk silak komuloi Yesus.
34 Khavun Yesus bodoa: “Amai, ngapun ah noh idoh! Kotului idoh iyam doh taꞌai inon jok konguan doh.”
Khavun idoh hotaruh iyai jok ahkan ngonduon kolambik Ah erih. b
35 Ulun-ulun tombok nuk anai nahtup nohtok inon jok torjadik, lambak okon-okon Yahudi ngolunyik Yesus idoh marak ah: “Iyok uwas umbot ngavat ulun bohkon, nikos Iyok ngavat arop Ah huntuh, ngindoi Iyok punak Lacak Ponyolamat jok kongojanjik Hotalak.” c
36 Khavun dolang porajurit erih pun ngolunyik Iyok. Idoh lombut khavun nongak danum anggur mosom ahkai Ah.d 37 Tahtup doh nuhtui ahkai: “Ngindoi ihkok lacak ulun Yahudi, nyolamat ah noh arop Muk!”
38 Khavun nuk isung kuhung Yesus erih, icok behtik porajurit mahkuk pahpan jok tonulih: “Ihtuh noh lacak ulun Yahudi.”
39 Icok behtik ulun jaek jok sonyalib erih ngohinak Yesus, iyok marak ah: “Iyam leh Ihkok Lacak Ponyolamat? Ngindoi koderih, nyolamat ah noh arop Muk khavun ihkai.”
40 Totahpik jolahai ah erih marak iyok, hiyoi ah: “Ngombai ihkok iyam mihkoh umbak Hotalak? Ihkok kongohukum mahtoi havoi kolo iyok. 41 Totahpik dorok noh jok pahtut norimak hukum ihtuh, tului kojaek jok umbot torok nguai ah. Totahpik Iyok ihtuh iyam arok kosalak ah!” 42 Khavun iyok marak ah: “Yesus, nohouk ah noh ahkuk ngindoi ihkok lombut jadik Lacak!”
43 Hiyon Yesus ahkai ah: “Pocayak noh, hondo ihtuh ihkok ahkan umbak ahkuk nuk surga.”
Yesus mahtoi
(Mat. 27:45-56; Mrk. 15:33-41; Yoh. 19:28-30)
44 Sokitar jam duok balas tohun ondo, mahtan ondo solengak balop khavun paring nogara erih pindong nyiring jam toluk cohit. 45 Tirai jok kongihih nuk Lovun Hotalak botisah bagik duok. e 46 Khavun Yesus ngoriak hiyoi Ah: “Amai, nuk luvang longom Muk Ahkuk nyerah hasong Kuk.” Ulik Iyok marak erih Iyok pun mahtoi. f
47 Kopalak sordaduk jok nohtok paring aꞌang erih iyok pun momuji Hotalak khavui marak ah: “Tuꞌuk Iyok ihtuh iyam salak!”
48 Ulun arok jok lombut nuk anai ahkan nohtok inon jok torjadik. Idoh paring ah bulik mbak ahtoi punak monasar. 49 Paring ulun jok ngenal Yesus tombok tahkan macuk nohtok paring ah inon jok torjadik nuk anai, arok kak dolang bavik jok umbak Iyok tahkan Galilea. g
Otun Yesus tonanom
(Mat. 27:57-61; Mrk. 15:42-47; Yoh. 19:38-42)
50-51 Arok icok behtik bahkas ngarai ah Yusup jok tahkan Arimatea nuk provinsi Yudea. Iyok ulun jok pios khavun jujur, iyok ngindoi Hotalak momorintah jadik Lacak. Iyok anggota kopalak Pongadilan Agamak Yahudi, tahpik iyok iyam sotuju umbak inon jok uwas pomuhtus doh khavun inon jok konguan doh umbak Yesus. 52 Iyok tulak noharep Pilatus ahkan nyavot otun Yesus. 53 Khavun iyok nohkak otun Yesus tahkan salib, khavui mukus ah umbak kain puhtik. Ulik erih iyok nihkas otun Yesus nuk tanom jok tonapak nuk luvang bahtuk, tanom erih jaham alik hatin. 54 Ondo erih ondo jomahat, khavun ondo sabat manyo noh dahpot.
55 Khavun bavik-bavik jok ngohasuk Yesus tahkan Galilea erih ngohasuk Yusup khavun nohtok tanom erih. Idoh nohtok ah kak non kolo otun Yesus tonihkas nuk luvang tanom erih. 56 Khavun doh bulik ahkan nyodiak dau-daun jok buan segah khavun binyak buan pios ahkan otun Yesus.
Beteng ondo Sabat, idoh tondok korejak numun porahturan agamak. h