Yesus nuk husuk Gubernur Pilatus
(Mat. 27:1-2, 11-14; Luk. 23:1-5; Yoh. 18:28-38)
15
Ngohko-ngohkos dolang Kopalak Pomipin agamak Yahudi, okon-okon Yahudi khavun guruk-guruk agamak Yahudi, khavun paring anggota Pongadilan Agamak, idoh was umbot pahkat. Idoh ngahut Yesus khavun ngonin Yok, umbot erih nyerah Yok noku Pilatus. 2 Pilatus bokisok mbak Yesus hiyoi: “Ihkok leh lacak ulun Yahudi?”Yesus mutah ah: “Ihkok noh jok marak ah.”
3 Dolang Kopalak Pomipin agamak Yahudi ngesah yamios karoi tondah doh mongenai Yesus. 4 Pilatus ngisok Yesus hinok: “Mbai yam kok ngobela arop muk mongenai tondah erih? Nyonih ah yamios karoi tondah doh mongenai Ihkok!”
5 Totahpik Yesus yam mutah ah hinok, sohinggak Pilatus pusong.
Pilatus nyerah Yesus supayak konohukum mahtoi
6 Nyinong porayaan Ondo Paskah, kolo jok kopuꞌun ah Pilatus molahpas icok behtik ulun tahkan pononyara numun jok sonyavot ulun arok. 7 Beteng hun erih arok icok behtik ngarai ah Barabas iyok honong pononyara. Barabas pononyara hicok mbak dolang ponjahat. Idoh pononyara kotului ngolavan pomoretah Roma khavun doh munuk arok pirak behtik ulun. 8 Mahkak lombut noh ulun arok khavun nyavot mbak Pilatus supayak molahpas icok behtik ulun jok pononyara kolo jok konguan doh beteng Ondo Raya Paskah. 9 Pilatus bokisok mbak idoh hiyoi: “Inon leh ihkam kanik supayak ahkuk molahpas Lacak ulun Yahudi ahkan mik?” 10 Pilatus was taꞌai noh ngindoi dolang kopalak pomipin agamak Yahudi idoh nyerah Yesus kotului idoh ngomeluk mbak Iyok.
11 Totahpik dolang kopalak pomipin agamak Yahudi erih ngohasut ulun arok supayak idoh nyavot mbak Pilatus Barabas noh jok pomolahpas. 12 Pilatus sinok hinok bokisok mbak ulun arok erih: “Ngindoi koderih, inon jok harus konguak kuk ahkan ulun jok pomarak mik Lacak ulun Yahudi ihtuh.”
13 Mahkak doh ngoriak: “Nyalib ah noh Iyok!”
14 Khavun hiyon Pilatus marak doh: “Totahpik kojaek inon jok was konguai Ah?”
Idoh makin mohing ngoriak: “Nyalib ah noh Iyok!”
15 Kotului Pilatus kanik nguan ahtoi ulun arok erih ngandah, iyok moluak Barabas tahkan ponjara ahkan doh, totahpik Yesus ponorihpit mbak cambuk khavun sonyerah ahkai sonyalib.
Yesus konolunyik
(Mat. 27:27-31; Yoh. 19:2-3)
16 Khavun porajurit-porajurit ngitot Yesus noku dohopan nuk luvang istana Pilatus. Idoh naꞌah paring porajurit Roma jok bohkon supayak idoh kupur nuk anai. 17 Idoh mosoloh jubah ungu ahkan Yesus, khavun doh napak mahkotaa tahkan pahting-pahting jok hoduhik khavun turus doh mosoloh mahkota erih noku kuhung Ah. 18 Khavun dolang porajurit erih ngolunyik Yok idoh nongak salam ahkai Ah supayak idoh kolo ulun jok ngolehkak Iyok hiyon doh akhai Ah: “Ihtuh noh Lacak ulun Yahudi!” 19 Idoh nulo nahup kuhung Ah mbak sokuhut, khavun doh ngolucak Yok khavun doh nyuhkuk nyembah Yok. 20 Umbot doh ngolunyik Yok idoh nguvat jubah ungu erih tahkan behtiu Ah, khavun doh mosoloh kolambik jok baꞌas Yok hatiu, khavun Yesus onin doh boluak tahkan dohopan istana Pilatus supayak sonyalib.
Yesus sonyalib
(Mat. 27:32-44; Luk. 23:26-43; Yoh. 19:17-27)
21 Arok icok behtik ulun nyihing ngarai ah Simon, iyok ulun Kirene, Simon amai Aleksander khavun Rufus, iyok punai lombut tahkan kota jok bohkon. Khavun dolang porajurit erih maksak yok nakung salib Yesus. b 22 Idoh ngonin Yesus noku korong jok ngarai ah Golgota, Golgota rehti ah: Unuk Tengkorak. 23 Nuk anai idoh nongak ahkai Ah danum anggur jok ponolouk murc, totahpik Yesus iyam kanik ngorih anggur erih. 24 Khavun idoh nyalib Yok, idoh hotaruh netu ah iyai jok ahkan tepun kolambik ngindoi iyam jubah Ah. d 25 Yesus sonyalib beteng jam sioi ngohkos. 26 Porajurit erih nulih: “Lacak Ulun Yahudi” nuk pahpan khavun mahtuk ah nuk diang kuhung Yesus, Erih noh buhkui ah idoh nyalib Iyok. 27 Hombo-homboh mbak Yesus sonyalib arok duok behtik ulun jok jaek: icok behtik nuk kotouk icok behtik nok nuk komuloi Ah. 28 [Kotului erih torjadik noh inon jok tonulih luvang Kitab Suci: “Iyok konohavoi mbak ulun jok jaek.”] e
29 Ulun-ulun jok nyihing anai ngiling kuhung doh khavun ngohinak Yesus. Hiyon doh: “Ahkai, Ihkok leh jok kanik monorop Lovun Hotalak khavun napak jok bohuak toluk ondo nyolung. f 30 Cobak Kok mosuluh tahkan salib atuh nyolamat ah arop Muk!”
31 Koderih kak mbak dolang kopalak pomipin agamak Yahudi khavun dolang guruk-guruk agamak Yahudi idoh ngolunyik Yesus. Idoh bokesah icok mbak jok bohkon: “Iyok nyolamat ulun bohkon, totahpik arop Ah bongoi yam dahpat Yok nyolamat ah! 32 Ngindoi Iyok tuꞌuk-tuꞌuk Lacak ulun Yahudi, Lacak Ponyolamat, Iyok touk mosuluh tahkan salib atuh, supayak ihkai nohtok khavun ihkai pocayak mbak Iyok!”
Ulun-ulun jok sonyalib havo-havoi mbak Yesus erih doh umbak kak ngohinak Yesus.
Yesus mahtoi
(Mat. 27:45-56; Luk. 23:44-49; Yoh. 19:28-30)
33 Beteng tohun ondo sokitar toluk jam kotahiu ah, paring daerah erih jadik pindong. 34 Khavun sokitar jam toluk cohit, Yesus ngoriak mbak auh jok mohing luvang auh Aram hiyoi Ah: “Eloi, Eloi, lama sabakhtani?” rehti ah: “Hotalak Kuk, Hotalak Kuk, ngombai Kok nohtah Ahkuk?” g
35 Arok pirak behtik ulun jok arok nuk anai nyonih koriak erih, hiyon doh: “Nyonih ah! Iyok naꞌah Elia!” 36 Icok behtik holang doh ngimos tulak ngonin savut japau, khavun ngipos ah noku luvang danum anggur mosom. Khavun savut japau erih pomahtuk ah unuk topahkan kajuk, khavun ngunjung ah kudiang noku baun Yesus, khavun hiyoi bokesah: “Ngindoi ah, ihtok havo-havoi nohtok ah inon leh Elia ahkan lombut khavun nguhkoi Yok tahkan salib atuh.” h
37 Khavun Yesus ngoriak turus mahtoi.
38 Beteng erih kak Tirai jok arok nuk Lovun Hotalak botisah tahkan diang noku pindak. i 39 Kopalak Porajurit jok tombok donik salib erih, iyok nohtok Yesus mahtot hasong Ah. Iyok bokesah hiyoi ah: “Punak tuꞌuk Iyok ihtuh Anak Hotalak!”
40 Nuk anai arok pirak behtik ulun bavik idoh nohtok paring jok torjadik erih tahkan macuk. Nuk holang idoh arok jok ngarai ah Salome, Maria Magdalena, Maria inai Yakobus jok bio erih iyok tuh inai Yoses kak. j 41 Idoh noh bavik-bavik jok ngohasuk khavun ngavat Yesus kotihkak Yok nuk Galilea. Khavun tumbuk ah nok bavik jok bohkon nuk anai jok was lombut noku Yerusalem idoh tulak hombo-homboh mbak Yesus.
Yesus tonanom
(Mat. 27:57-61; Luk. 23:50-56; Yoh. 19:38-42)
42 Beteng ondo was manyo noh pindong. Ondo erih ulun Yahudi sia-siap noharep Ondo Sabat. 43 Arok icok behtik ngarai ah Yusup, iyok tahkan Arimatea iyok arok noh anggota pongadilan agamak Yahudi jok konolehkak ulun, iyok halik ngindoi Korajaan Hotalak, iyok ngohanyik arop ah noharep Pilatus supayak touk ngonin otun Yesus. 44 Pilatus pusong beteng yok nyonih kesah ngindoi Yesus was mahtoi. Mahkak iyok naꞌah kopalak porajurit khavun bokisok mbak yok inon leh Yesus was mahtoi. 45 Umbot yok nyonih auh kopalak porajurit erih, mahkak iyok kanik nongak otun Yesus noku Yusup. 46 Yusup pun molik kain puhtik jok bolehkak, khavun iyok nohkak otun Yesus tahkan salib erih khavun mukus ah mbak kain erih. Khavun Yusup nihkas otui ah nuk luvang tanom, jok tonapak unuk luvang korong bahtuk. Umbot erih Yok nuhtup tanom erih mbak bahtuk jok hajok. 47 Maria Magdalena khavun Maria inai Yakobus idoh nohtok nuk amoh otun Yesus ponokaling.