Yesus hulik bolum tahkan pahtoi Ah
(Mat. 28:1-8; Luk. 24:1-12; Yoh. 20:1-10)
16
Beteng uwas nokalo noh ondo Sabat, Maria Magdalena, Maria inai Yakobus, khavun Salome, doh toluk tulak molik kajuk-kajuk jok buan segah nuk napak binyak wangi. Idoh kanik tulak noku tanom ahkan ngasak otun Yesus mbak binyak erih. 2 Ondo Minggu ngohko-ngohkos beteng mahtan ondo marah, idoh tulak noku tanom Yesus. 3 Nuk tohun jalan idoh hokisok icok umbak jok bohkon: “Iyai jok ahkan nyarok bahtuk jok hajok tuhtup tanom erih ahkan tok, supayak tok touk nyolong noku luvang anai?” 4 Totahpik beteng doh dahpot nuk tanom erih, idoh nohtok bahtuk jok hajok erih uwas tosarok noh tahkan tukang tanom erih. 5 Khavun doh nyolong noku luvang tanom erih. Idoh tokocit nyangit kotihkak nohtok arok bahkas honong bio iyok hapan jubah puhtik tuot nuk silak kotoun doh. 6 Totahpik molekat erih marak doh: “Arak mihkoh. Ihkam ngurah Yesus ulun Nazaret jok mahtoi sonyalib erih leh? Iyok uwas hulik bolum! Iyok iyam arok nai nuk ohtoi. Nohtok ah! Ihtuh nuk doh nihkas otui Ah. 7 Tahpik huntuh, tulak nai khavun marak ah ahkan dolang murit-murit Ah, marak ah ahkan Petrus kak: ‘Yesus uwas holuk noseluk kam noku Galilea. Ihkam ahkan nohtok Yok nuk anai, kolo jok uwas pujik pomarak Ah ahkan mik.’ ” a 8 Dolang bavik erih boluak tahkan luvang tanom erih khavun doh nokoruk buho, tului idoh nocot khavun mihkoh. Idoh iyam ngesah inon jok was tonohtok doh ahkan ulun bohkon tului idoh mihkoh.Yesus Mokarah arop ah ahkan Maria Magdalena
(Mat. 28:9-10; Yoh. 20:11-18)
9 Ngohko-ngohkos beteng ondo Minggu, Yesus was hulik bolum tahkan pomalus Ah, topahtuk Ah iyok mokarah arop Ah ahkan Maria Magdalena. Maria Magdalena pujik sonorupang roh jaek Yesus noh jok muhkok roh jaek erih tahkan behtiu ah. 10 Umbot erih Maria Magdalena tulak marak murit-murit Yesus hun erih idoh honong liduk khavun nangih kotului pahtoi Yesus. 11 Totahpik kotihkak doh nyonih tahkan Maria Magdalena ngindoi Yesus hulik bolum khavun iyok uwas nohtok Ah, idoh iyam pocayak mbak iyok.
Yesus mokarah arop Ah ahkan duok behtik murit
12 Umbot erih Yesus mokarah arop Ah noku duok behtik murit Ah, beteng dorok nyalan noku luar kota. 13 Ulik erih bulik noh dorok khavun marak ahkan dolang murit-murit jok bohkon, tahpik idoh iyam kak pocayak.
Yesus motohtok arop Ah ahkan dolang murit
14 Umbot erih Yesus mokarah arop Ah ahkan kosobalas murit-murit Ah erih beteng idoh kuman. Khavun Iyok negur doh tului idoh iyam pocayak konguan komahang jaꞌan doh, khavun idoh iyam pocayak umbak ulun-ulun jok ngesah ngindoi Yesus uwas hulik bolum. 15 Mbot erih Yesus bokesah umbak idoh: “Tulak nai noku paring duniak, ngesah ah noh Tarung Pios noku paring kolunon. b 16 Iyai jok pocayak khavun kongombaptis ahkan sonyolamat, totahpik iyai jok iyam pocayak ahkan konohukum. 17 Tandak-tandak ihtuh ahkan arok umbak ulun-ulun jok pocayak: Idoh ahkan ngusir roh-roh jaek hapan ngarak Kuk, idoh ahkan bokesah hapan auh-auh ulun bohkon jok jaham pujik doh nyonih ah. 18 Idoh ahkan namit lohik jok moharik tunduk ah, holuk poh idoh ngorih sovui, idoh iyam ahkan mahtoi, idoh ahkan nihkas longon doh nuk isung ulun jok poros, khavun ulun erih ahkan pios.”
Yesus tokahtang noku surga
19 Umbot Yesus marak doh noing erih, Iyok tokahtang noku surga, nuk anai Iyok tuot nuk jok konolehkak silak kotoun Hotalak.c 20 Murit-murit Ah pun turus tulak ngesah mongenai Tarung Pios tahkan Hotalak noku paring duniak. Khavun Idoh touk nguan aꞌang jok motaher kotului Tuhan Yesus nongak doh kuasak sohinggak paring ulun pocayak ngindoi Tarung Pios erih punak tuꞌuk.