KESAH DOLANG RASUL
Roh Kudus Jok Kongojanjik
1
Teopilus jok pomolehkak kuk, salam tahkan ahkuk Lukas. aNuk luvang buhkuk kuk jok topahtuk ah uwas tonulih kuk paring ah mongenai jok konguan Yesus khavun aꞌang jok kongajar Ah, tahkan topahtuk ah Iyok narung Tarung Pios, 2 nyiring hun ondo Iyok nuhkat kuk surga. Beteng sojaham Iyok nuhkat kuk surga, umbak kuasa Roh Kudus Iyok marak dolang rasul-rasul jok kongopilik Ah. 3 Ahkan rasul-rasul erih Iyok mokarah arop Ah ulik Iyok mahtoi sonyalib, khavun tumbuk tandak jok pomokarah Ah sobagai tandak Iyok hulik bolum. Solama ohpat puluk ondo Iyok bojoin mokarah arop Ah nahtup bokesah mbak rasul-rasul erih mongenai Korajaan Hotalak. 4 Icok ondo beteng Iyok kuman hicok umbak dolang rasul-rasul Ah, Iyok majak idoh nohtah Yerusalem, khavui nyuhuk doh mocon ngindoi Roh Kudus jok kononjanjik Hotalak, hiyoi Ah: “Janjik erih uwas sonyonih muk tahkan Ahkuk. b 5 Tului Yohanes mombaptis hapan danum tahpik iyam tahik nok ihkok kongombaptis hapan Roh Kudus.” c
Yesus tokahtang kusurga
6 Mahkak bokisok noh rasul-rasul erih jok kupur nuk anan: “Tuhan kanik leh Ihkok hulik napak korajaan ahkan Israel hinok?”
7 Iyok mutah ah: “Ihkam iyam sah taꞌai ah mirak ohkot ondo ah, jok tonehtap Amai Kuk monurut kuasa Ah. 8 Totahpik ihkam ahkan norimak kuasa ngindoi Roh Kudus tohkak isung ihkam, khavun ihkam ahkan jadik saksi-saksi Kuk, nuk Yerusalem khavun nuk paring Yudea khavun nuk Samaria khavun nuk paring duniak.” d 9 Tonaꞌak Yesus ulik nuhtui noing erih botokahtang noh Iyok noku surga, tonohtok dolang rasul-rasul Ah, khavun Yesus iyam kihtan tahkan ponohtok doh khavun behtiu Ah kahput havun. e
10 Beteng doh honong moliyo kuk langit hun Yesus tokahtang erih, nyolengak tombok duok behtik molekat jok hapan hatik puhtik donik idoh. 11 Khavun molekat duok behtik erih bokesah mbak rasul-rasul erih: “Oo ulun-ulun Galilea ngombai poh ihkam tombok nohtok kulangit? Yesus tuh rih tokahtang kuk surga nohtah ihkam, tahpik Iyok ahkan hulik lombut nok umbak aꞌang jok motaher havoi mbak beteng ihkok nohtok Ah nuhkat kuk surga ihtuh kak.”
Rasul-rasul hokindoi kindoi
12 Mahkak bulik noh rasul-rasul erih kuk Yerusalem tahkan Korong Jaitun kacun ponyalan doh sokitar icok kilo tahkan Yerusalem. 13 Uwas dahpot noh idoh nuk kota Yerusalem, nuhkat noh idoh noku takun lohteng, unuk doh kapat. Idoh erih iyok noh Petrus khavun Yohanes, Yakobus khavun Andreas, Pilipus khavun Tomas, Bartolomeus khavun Matius, Yakobus anak Alpeus khavun Simon ulun selot khavun Yudas anak Yakobus. f 14 Idoh paring ah hicok ahtoi bodoa havo-havoi, umbak dolang bavik khavun umbak Maria inai Yesus khavun umbak dolang pongarik Yesus.
Matias kongopilik ngatik Yudas Iskariot
15 Beteng hondo erih tombok noh Petrus khavun bokesah nuk tohun-tohun ulun pocayak, nuk anai sokitar icok lahtus duan puluk behtik ulun, beteng doh hokupur hicok, Petrus marak ah hiyoi, 16 “Oo dolang bari-basak harus noh genap Kitab Suci jok kongohavot Roh Kudus nyihing Daud mongenai Yudas Iskariot, Yudas jok mipin ulun navan Yesus. 17 Yudas Iskariot holuk umbak molayan Yesus havo-havoi mbak ihtok kak iyok tormasuk rasul kak.”
18 Yudas ihtuh uwas ngonduon tanak ahkan tanom ah, jok pomolik dolang okon agamak Yahudi tahkan hasil kojaek ah dahkang Yesus. Iyok botahak turus mahtoi nuk isung tanak erih, khavun butui ah bodorak nyiring tonoiu ah boluak uras. g 19 Kojadiu erih taꞌan paring ulun kota Yerusalem, sohinggak tanak erih pomarak doh Tanak Dahak.
20 “Tului arok tonulih nuk luvang Kitab Mazmur,
‘Pohiyoi noh balai jadik bungun
khavun pohiyoi noh iyam arok ulun jok mocon nuk luvang ah
khavun pohiyoi noh jabatan ah omin ulun bohkon.’ h
21 Jadik harus nongak ah ahkan kai icok behtik tahkan idoh ahkan jadik rasul harus ulun jok tuhit lombut hokupur mbak ihkai kotahin Tuhan Yesus humbak mbak ihkai. 22 Yok erih nopahtuk tahkan baptisan Yohanes nyiring beteng Yesus tokahtang noku surga nohtah ihkai, ahkan jadik saksi mongenai pahtoi Ah jok hulik bolum.” i
23 Khavun doh nyavot duok behtik, Yusup jok tonaꞌah Barnabas, Yusup halik tonaꞌah kak ngarai ah Yustus, dorok Matias. 24 Paring doh bodoa khavun doh nuhtui: “Oo Tuhan Ihkok noh jok nyokonok ahtoi paring kolunon, mokarah ah noh iyai anggar ah jok kongopilik Muk tahkan duok behtik tuh. 25 Ahkan norimak tugas polayanan jadik rasul ngatik Yudas Iskariot jok uwas mahtoi tului kojaek ah.” 26 Khavun doh nosahkah undij ahkan Barnabas khavun Matias, jok buah undi erih iyok noh Matias, jadik ulik undi erih Matias kongahtang monahang kosobalas rasul erih.