Roh Kudus tohkak nguasak dolang Rasul
2
Beteng uwas donik noh ahkan ngoramik ondo Pentakosta.a Ulun-ulun jok pocayakb umbak Yesus kupur nuk icok ruangan. c 2 Nyolengak kongihan tahkan langit naing bahiu nuvik lovuk nuk doh tuot kupur. 3 Khavun marah noh kolo jelax ahpui yamios karoi khavun naꞌang kuk amo-amoh tondok nuk isung idoh. 4 Idoh pun konguasak Roh Kudus, khavun doh nopahtuk bokesah hatin auh jok iyam doh ngorehti ah, auh erih iyok noh auh jok tonongak Roh Kudus ahkan doh ngohavot ah.5 Beteng hun erih tumbuk ulun Yahudi, tahkan negri nuk paring duniak, mocon nuk Yerusalem. Idoh arok noh ulun jok pocayak mbak Hotalak. 6 Beteng auh aꞌang erih tohkak ulun arok hokorumbuk. Idoh pusong khavun salut nyonih rasul-rasul erih touk bokesah hapan auh jok bojoin doh hapai ah nuk nogara doh masing-masing. 7 Paring doh pusong, khavun doh bokesah: “Iyam leh idoh dolang ihtuh ulun Galilea? 8 Inon kolo ah ihtok nyonih doh touk hapan auh malik macam hapan auh paring tok jok arok nuk ohtoi? 9 Ihtok ulun Partia, Media, Elam, penduduk Mesopotamia, Yudea khavun Kapadokia, Pontus khavun Asia, 10 Prigia khavun Pamfilia, Mesir khavun daerah-daerah Libia jok hokoronik umbak Kirene, khavun ulun-ulun jok lombut tahkan Roma. 11 Arok kak ulun-ulun Yahudi khavun arok kak ulun-ulun jok iyam ulun Yahudi jok boragama Yahudi, idoh ulun tahkan pulou Kreta khavun tahkan daerah Arab. Ihtok nyonih ah idoh bokesah luvang auh etok masing-masing, mongenai aꞌang jok hajok jok konguan Hotalak!” 12 Idoh paring ah pusong khavun salut, mahkak idoh bokisok icok mbak jok bohkon: “Inon rehti ah paring jok torjadik tuh?”
13 Tahpik hiyon doh jok bohkon nyindir nyopahing ulun-ulun jok pocayak erih: “Ah idoh tuh rih buso!”
Petrus Kotbah
14 Mahkak kuat noh Petrus turus tombok umbak icok balas Rasul erih, khavun umbak auh mohing iyok marak ah ahkan idoh: “Oo ihkok ulun Yahudi khavun ihkam paring mik jok mocon nuk Yerusalem, nyonih ah noh tetu-tetu, 15 idoh dolang ihtuh iyam buso numun jok kongohavot mik, tului ondo tuh punai ah kak jam sioi ngohkos.” 16 Totahpik ihtuh noh jok kongohavot Hotalak nyihing Nabik Yoël:
17 Hotalak marak ah: “Ahkan torjadik beteng ondo-ondo ahir noing erih noh Auh Hotalak
tului Ahkuk ahkan motohkak Roh-Kuk isung paring kolunon.
Mahkak dolang anak muk jok bahkas khavun jok bavik ahkan marak tanjik Hotalak,
khavun dolang koturun muk ahkan ngonduon ponohtok,
ulun jok okok ahkan ngonduon nuhpik, d
18 koderih kak ahkan jihpok Kuk bahkas bavik,
Ahkuk ahkan nongak Roh Kuk paring ah ahkan doh beteng ondo erih.
Khavun idoh ahkan marak tanjik Hotalak ahkan ulun-ulun.
19 Khavun Ahkuk ahkan napak aꞌang jok motaher nuk isung langit,
khavun tandak-tandak nuk pindak duniak,
dahak khavun ahpui khavun kuhtuh osun.
20 Mahtan ondo ahkan pindong kihtop,
khavun bulan ahkan mangan havoi mbak dahak,
khavun umbot erih ahkan lombut ondo Kiamat, ondo Hotalak nguan aꞌang jok punak poduluk.
21 Khavun iyai jok ngoriak naꞌah Tuhan
ahkan sonyolamat.”
22 Jadik ihkam dolang bari-basak kuk ulun Israel! Nyonih ah noh inon jok kongohavot kuk ihtuh, uwas nyahtak Yesus tuh ulun Nasaret jok konguhtus Hotalak. Khavun Hotalak uwas mokarah ah ahkam muk umbak malik macam aꞌang jok motaher nyihing Yesus, numun jok uwas ta'an mik. 23 havoi umbak evak Hotalak jok uwas tonehtap Ah jaman lomoi, Yesus uwas sonyerah Ah ahkan mik. Khavun ihkam kongonohop ulun-ulun jok iyam pocayak, ihkam uwas nyalib Yesus nyiring mahtoi. e 24 Totahpik Hotalak uwas ngomolum Yesus tahkan pahtoi Ah khavun molahpas Iyok tahkan kojorak pahtoi Ah. Kotului pahtoi tiho iyam duoi nulo nikong Yesus. f 25 Daud uwas ngohavot ihtuh mongenai Yesus:
“hkuk ta'ak tului Tuhan arok bunang hicok humbak umbak ahkuk.
Ahkuk ahkan kongolindung Ah tahkan ulun-ulun jok jaek umbak ahkuk, tului Hotalak arok nuk donik ahkuk. g
26 Kotului erih ahtoi kuk ngandah,
khavun umbak bauk kuk ahkuk atak ngehtek Hotalak nahtup kandah kuk.
Tahkan behtik kuk pun halik nanyam
jok linuh tului ahkuk pocayak janjik Muk jok uwas itot Muk ahkak kuk.
27 Tului Ihkok iyam ahkan nohtah Roh Kuk nuk lovuk lio.
Khavun Ihkok iyam ahkan mosuah ulun Kudus Muk dalak luvang tanom.
28 Ihkok uwas mokarah ahkak Kuk jalan bolum.
Khavun Ahkuk ahkan ngandah nyangit tului Ahkuk ahkan bolum hicok umbak Ihkok.”
29 Dolang bari-basak, mosuah ah noh ahkuk bokesah jok kotuꞌui ah ahkan mik mongenai Daud tahtuk ajuh tok erih. Inon jok kongohavot ah rih iyam arok buah mongenai arop ah, tului iyok uwas mahtoi tonanom khavun tanom ah tohkok nyiring huntuh. 30 Totahpik Daud iyok noh nabik khavun iyok uwas taꞌai ah tului Hotalak uwas bojanjik nahtup hotulut tului icok behtik tahkan koturun Daud erih ahkan jadik lacak khavun tuot nuk isung korajaan Daud. h 31 Jadik Daud taꞌai inon jok ahkan terjadi, tului erih noh iyok bokesah kolo erih mongenai komolum Lacak Ponyolamat jok kongonjanjik Hotalak:
“Tului pahtoi tiho iyam dahpat nulo
nikong Iyok behtiu Ah iyam ahkan dalak luvang tanom.”
32 Jadik Yesus ihtuh noh jok konomolum Hotalak tahkan pahtoi Ah. Khavun ihkai uwas nohtok Iyok hulik bolum, khavun huntuh ihkai sonyuhuk ahkan ngesah mongenai komolum Yesus erih. 33 Mahkak huntuh Iyok tokahtang kuk surga khavun tuot nuk jok konolehkak yok erih nuk kotouk Hotalak. Khavun Yesus uwas norimak Roh Kudus jok uwas kongojanjik Amai Ah. Jadik huntuh Yesus uwas nongak Roh, Roh erih noh jok uwas kihtam muk khavun sonyonih muk. 34 Tului iyam Daud jok tokahtang kuk surga, totahpik Yesus noh jok nuhkat kuk surga Daud uwas marak ah,
“Hotalak marak ahkan Lacak Ponyolamat kuk:
‘Tuot noh nuk kotouk Kuk, khavum momorintah noh sobagai Lacak. i
35 Nyiring Ahkuk ngalah paring ulun jok bomusuh mbak Ihkok khavun nguan idoh jadik jihpom Muk!’
36 Tului erih pohiyoi ah noh ulun Israel taꞌai ah jelas tului Hotalak uwas nehtap Yesus, jok sonyalib mik erih, sobagai Lacak Ponyolamat jok kongonjanjik erih!”
37 Beteng Petrus uwas umbot noh bokesah, tobuhkak noh ahtoi ulun arok jok nyonih ah. Khavun doh bokisok umbak Petrus khavun rasul-rasul jok bohkon: “Bari-basak, inon jok harus kai nguai ah?”
38 Petrus mutah ah: “Ihkam paring mik harus botobat khavun kongombaptis sobagai murit Yesus Kristus. Umbak koderih dosa muk ahkan kongapun, khavun ihkok ahkan norimak Roh Kudus. 39 Tului janjik erih ahkan ihkam, dolang anak-anak mik khavun bagin idoh jok arok nuk macuk, yok erih paring ulun jok tonaꞌah Tuhan Hotalak tok.”
40 Koderih noh Petrus monjelas ah ahkan doh. Khavun umbak kesah ah jok arok jok bohkon ah iyok nyavot doh molahpas arop doh tahkan bangsak jok jaꞌat jok ahkan kongohukum Hotalak. 41 Khavun doh jok pocayak umbak ajar barak Petrus, idoh paring ah kongombaptis. Khavun beteng ondo erih ulun jok pocayak monahang karon doh hinok sokitar toluk kujan behtik. 42 Idoh tuhkoi bolajar jok kongajar dolang rasul, khavun kak idoh bojoin hokupur sombayang, bodoa havo-havoi khavun kuman hicok.
Ulun-ulun jok pocayak havoi hokonohop
43 Beteng erih nyinong behtik nuk Yerusalem boko pusong khavun mihkoh tului Hotalak nongak kuasa ahkan rasul-rasul ahkan nuk napak aꞌang jok motaher punak arok hinok. 44 Paring ulun pocayak erih idoh nulo hopahkat khavun pongomok doh rih dolang ponahto doh rih havoi doh tepui ah. j 45 Mahkak bojoin torjadik tului icok behtik tahkan holang idoh dahkang tanak arop ah khavun magik ah hasil ah ahkan paring doh jok jonyok poduluk umbak duit. 46 Nyinong ondo idoh hicok ahtoi pihkir kupur nuk Lovun Hotalak. Bojoin kak idoh hokihit kuman hicok humbak tahkan lohpo jok koicok ah kuk lohpo jok bohkon. 47 Paring ulun jok pocayak momuji Hotalak, khavun idoh kongandah paring ulun. Nyinong ondo, Tuhan mondahang ulun jok bohuak sonyolamat ahkan kolompok ulun jok pocayak.