SURAT PAULUS
AHKAN JOMAAT NUK
EPESUS
Nopahtuk kesah
Nuk luvang Surat Paulus Ahkan Jomaat Nuk Epesus, aꞌang peting jok Paulus marak ah mongenai evak Hotalak ahkan “Paring aꞌang jok tonapak Hotalak jok nuk surga khavun nuk duniak, ahkai hicok mbak Kristus sobagai kopalak.” (1:10). Surat ihtuh arok noh ajar barak ahkan ulun-ulun pocayak supayak idoh ngomok inon rehti ah evak Hotalak jok mulia. Yok erih evak ahkan ngohicok paring kolunon nyihing Yesus Kristus.
Nuk topahtuk ah surat Epesus ihtuh kongesah bohkolo kolunon jadik icok mbak Yesus Kristus touk torjadik. Yok erih bohkolo Hotalak Amai uwas ngopilik ulun-ulun jok pocayak, bohkolo nyihing Yesus Kristus, Anak-Ah, Hotalak ngampun khavun molahpas ulun jok pocayak tahkan dosa doh. Khavun bohkolo janjik Hotalak erih konorohon mbak Roh Hotalak. Nuk luvang bagian koduok, Paulus ngajar marak ahkan dolang ulun pocayak supayak idoh bolum hokopios. Mbak koderih dolang ulun jok pocayak doh ahkan jadik kohicok icok mbak jok bohkon.
Unuk mokarah ngindoi jomaat Hotalak umbot hicok mbak Kristus, Paulus hatin dolang tomalik. Contoh ah jomaat arok noh kolo oruh mbak Kristus sobagai kuhung ah. Khavun kolo oruh mbak Kristus sobagai bosai ah. Paulus tuꞌuk-tuꞌuk ngandah kotihkak nohouk kopios ahtoi Hotalak nyihing Kristus, sohinggak paring auh jok hatiu ah luvang surat ah ponokarah ngindoi ahtoi ah somakin pomonahang mbak bosukur khavun mbak pujian noku Tuhan. Paring aꞌang tonohtok ah tahkan kopios ahtoi Kristus, tahkan pengorbanan-Ah, pongampunan nyihing Kristus, kopios atoi-Ah khavun kosucian-Ah.