SURAT PAULUS
AHKAN JOMAAT NUK
PILIPI
Nopahtuk kesah
Jomaat nuk Pilipi arok noh jomaat jok topahtuk ah jok ponotombok Paulus nuk Eropa, Pilipi arok nuk daerah Makedonia, icok provinsi jok arok unuk korajaan Roma. Surat Paulus ahkan Jomaat Pilipi ihtuh tonulih kotikak Paulus honong nuk luvang ponjara. Beteng erih ahtoi ah liduk kotului arok polayan-polayan Kristen jok ngolavan iyok, kotului luvang jomaat nuk Pilipi erih arok kak ulun-ulun jok ngajar ajar barak jok ngolanyat. Holuk poh koderih surat Paulus ihtuh nguan ihtok ngandah, ngombai koderih? Kotului Paulus pocayak nyangit umbak Kristus.
Paulus nulih surat ihtuh jok topahtuk ah kotului iyok kanik botorima kasih mbak jomaat nuk Pilipi kotului dolang paring aꞌang jok tonongak doh ahkai ah kotikak iyok arok luvang kojorak ah. Khavun beteng kosempatan ihtuh kak iyok kanik nongak somangat ahkan doh supayak idoh bohanyik khavun sabar noharep kojorak doh. Iyok tuꞌuk-tuꞌuk nyavot ah supayak idoh iyam ngomok arop doh holovik pios mbak ulun bohkon, idoh alah numun komolum Yesus khavun iyam sahkah, iyam nguan kopoduluk arop doh kiyak. Iyok ngingat doh tihkas kopion ahtoi Hotalak kiak nguan idoh hicok humbak mbak Kristus nyihing kopocayak doh mbak Kristus erih, iyam kotului idoh pahtuh nguan dolang porahturan agamak Yahudi jok was tonetu. Khavun Paulus nulih ah kak mongenai kandah khavun kolinuh jok tonongak Hotalak ahkan ulun-ulun jok bolum hicok mbak Kristus.
Tema surat ihtuh mongenai kandah, koborohon ahtoi, hicok ahtoi, khavun kosabar ulun Kristen nuk luvang kopocayak doh mbak Kristus. Surat ihtuh halik motohtok ah ngindoi Paulus punak mongasihi jomaat nuk Pilipi.