Ajar marak ahkan dolang anak khavun amai inai ah
6
Dolang anak jok was pocayak mbak Kristus, ihkam alah pahtuh mbak ulun okok mik kotului erih noh jok pahtut ihkam nguai ah. a 2 Nuk luvang Hukum Taurat poletah jok punak poduluk iyok noh: “Ngolehkak ah noh inai khavun amai muk.” Khavun poletah tuh arok noh jok topahtuk ah tahkan Hotalak arok janjik nuk luvang ah. b 3 Janjik erih arok noh, ngindoi nguan poletah erih “mahkak ihkam ahkan bolum mbak pios khavun hombuk umur muk nuk duniak tuh.”4 Ihkam dolang amai! Arak noh bokesah khavun nguan tobiat jok ahkan ngolopung kobirat dolang anak ah. Totahpik ngolekap ah noh paring aꞌang jok idoh poduluk mbak ajar barak jok tumbas mbak kokanin Yesus Kristus. c
Ajar marak ahkan jihpon khavun tuan ah
5 Bari-basak jok jadik jihpon! Pahtuh noh mbak tuan muk jok arok nuk duniak tuh. Mbak ahtoi jok tuꞌuk-tuꞌuk ngolehkak khavun mihkoh noh mbak doh. Ihkam alah nguan poletah idoh kolo kam nguan poletah Kristus. d 6 Arak ihkok pahtuh khavun ngotiak korejak mbak pios tihkas kotihkak idoh nohtok kok khavun unuk ngosenang ahtoi doh kiyak. Totahpik ihkok alah nulo pahtuh khavun ngotiak korejak pios tului ihkok jihpon Kristus. Mahkak korejak noh mbak tuꞌuk-tuꞌuk kolo kokanin Hotalak. 7 Korejak noh mbak ahtoi jok ngandah. Kolo ihkok korejak ahkan Tuhan Yesus khavun iyam cumak ahkan tuan muk jok nuk duniak tuh. 8 Nohouk ah noh, dolang jihpon khavun jok iyam jihpon jok uwas nguan aꞌang jok pios mahkak Tuhan Yesus ahkan malos paring kopion mik erih.
9 Khavun ihkam dolang tuan! Nguai noh tobiat jok pios kolo erih kak mbak dolang jihpon muk khavun arak ihkam ngacam doh. Nohouk ah noh ngindoi ihkam khavun dolang jihpon erih, kam tepun icok Tuhan jok havoi nuk surga. Paring kam havoi konolehkak Ah, Iyok iyam ngopilik-ngopilik ulun. e
Dolang ulun pocayak alah ngotiak ngolavan aꞌang jok jaek
10 Pongopah ah, pahtut noh ihkam jadik muhat mbak kuasak tahkan Yesus Tuhan tok, kotului ihkam uwas hicok umbak Iyok. 11 Kolo prajurit hatin kolambik perang mbak pokahkas ah jok arok uras supayak touk nahan arop ah tahkan musuh jok nyarang doh. Koderih kak mbak ihtok, tok alah hatin paring pokahkas perang tahkan Hotalak supayak touk botahan ngolavan paring aꞌang jok nikos tok tahkan Lacak paring otuk. 12 Ihtok alah nguan aꞌang erih tului ihtok iyam perang ngolavan kolunon, totahpik ihtok perang ngolavan paring roh jaek jok ngahtur khavun bokuasak ahkan paring aꞌang jok jaek nuk duniak jok pindong tuh. Khavun ihtok ngolavan paring jok jaek kak jok bokuasak nuk langit. 13 Jadik ihkok alah hatin paring pokahkas perang rohani jok tahkan Hotalak supayak ihkok touk botahan kotihkak musuh nyarang kok beteng ondo jok jaek erih. Khavun ngindoi ihkok uwas ngolavan dolang musuh erih, ihkok tehtap tombok mbak borohon luvang kopocayak muk noku Hotalak.
14 Jadik botahan noh mbak muhat ihkok alah nulo bolum ngohasuk ajar barak jok hinut tahkan Hotalak, kolo prajurit jok was hatin talik kahang jok siap ngolavan musuh. Ihkok alah nguai ah kak inon jok hinut, erih kolo prajurit jok hatin hatik umat ahkan ngolindung arop ah ngindoi musuh nyarang iyok. f 15 Ihkam alah nulo siap narung Tarung Pios mongenai Yesus, jok ngomin damai sojahtera tahkan Hotalak. Aꞌang erih kolo prajurit jok nulo hatin sopahtuk jok borohon supayak touk tombok mbak muhat kotihkak idoh perang. g 16 Ihkam alah tuꞌuk-tuꞌuk pocayak mbak Hotalak, kolo prajurit jok nulo namit tolavang nuk husuk ah supayak ngolindung behtiu ah iyam buah panah musuh. Kopocayak mik mbak Hotalak kolo tolavang jok touk ngomalop panah ahpui jok tonosahkah Lacak paring otuk ahkam mik. 17 Ihkam uwas norimak kosolamatan tahkan Hotalak. Iyok ngolahpas ihkam tahkan hukuman dosa. Hatiu noh kosolamatan erih havoi mbak koluhkup umat muk, numun kolo jok hatin prajurit ahkan ngolindung kuhung ah. Khavun namit ah noh nulo Auh Hotalak tahkan Roh Kudus erih. Havoi kolo prajurit jok nulo namit pedang ah kotikak iyok siap ngolavan musuh. h 18 Ihkam alah nulo bodoa. Nyavot mbak Hotalak ahkan paring aꞌang, khavun pohiyoi ah noh Roh Kudus jok ngavat ihkam bodoa. Sia-siap noh nulo khavun tehtap somangat, arak tondok bodoa ahkan paring ulun jok pocayak mbak Hotalak. 19 Khavun bodoa noh ahkan ahkuk kak, supayak beteng ahkuk marak, Hotalak nongak ahkak kuk tuhtui auh jok tumbas. Khavun supayak ahkuk bohanyik narung Tarung Pios mongenai Yesus jok holuk iyam ulun taꞌai ah. 20 Ahkuk was konguhtus ahkan bokesah mongenai Tarung Pios, kotului erih noh mahkak ahkuk pomonjara. Bodoa noh ahkak kuk noku Hotalak supayak ahkuk bohanyik marak mongenai Tarung Pios erih, kolo jok sopahtut ah kuk marak ahkan paring ulun.
Salam pongopah
21 Bari-basak, ahkuk kanik ihkam taꞌai bohkolo koadaan kuk khavun korejak kuk nuk ohtoi. Mahkak ahkuk nguhtus Tikhikus supayak iyok marak paring aꞌang erih ahkan mik. Iyok jolahan tok harik jok uwas pocayak jok pomasik tok khavun tuꞌuk-tuꞌuk pahtuh nguan korejak Tuhan. i j 22 Kotului erih noh ahkuk nyuhuk iyok lombut noku ihkam, supayak ihkam taan bohkolo komolum kai nuk ohtoi khavun supayak iyok nongak somangat ahkan mik.
23 Nihak ngindoi Hotalak Amai khavun Tuhan Yesus Kristus nongak ihkam damai sojahtera, khavun nguan ihkam mongasihi icok mbak jok bohkon khavun tehtap pocayak mbak Tuhan Yesus Kristus. 24 Ahkuk bodoa noku Hotalak supayak Hotalak nongak kopion ahtoi Ah ahkan kam paring ah jok mongasihi Tuhan Yesus Kristus mbak kasih jok yarok tihkas nyamah ah.
Tahkan ahkuk, Paulus