Komolum anak-anak Hotalak
5
Ihkam ihtuh anak-anak Hotalak jok punak kongasih Ah, kotului erih noh ihkam alah ngotiak bolum mbak tobiat Hotalak. 2 Ihkam alah bolum mongasihi icok mbak jok bohkon, numun kolo Kristus mongasihi ihtok sohinggak Iyok was nyerah arop Ah mahtoi ahkan tok. Yesus nyerah arop Ah sobagai surung jok tamam kobuai ah, jok nguan ahtoi Hotalak ngandah. a3 Kotului ihkam uwas pocayak Hotalak, mahkak iyam pahtut ngindoi kam tiruh mbak bavik bahkas jok iyam bahkas bosai mik, nguan tobiat jok iyam sorunuh khavun tobiat jok bokahuk. Mongenai tobiat kolo erih arak sapai ulun bohkon tepun alasan ahkan ngohavot ngindoi ihkam nguan dolang aꞌang jok kolo erih. 4 Auh jok kohtor, borangai irah, khavun jok iyam pahtut, paring erih yam pahtut kak ihkam marak ah. Totahpik marak ah noh tuhtui auh jok bosukur mbak Hotalak. 5 Nohouk ah noh pios-pios: Paring ulun jok tiruh mbak bahkas bavik jok iyam avui humai ah, jok tobiat ah jaek ngindoi iyam bokahuk, aꞌang erih havoi kolo nyembah topahtung. Mahkak idoh iyam ngonduon bagiu ah beteng Hotalak khavun Kristus momoretah jadik Lacak.
6 Arak noh ihkam tonihpuk ahkan auh ulun jok ngolanyat. Tului paring tobiat jok uwas kuk marak ah erih ngolopung kobirat Hotalak ahkan ulun jok iyam pahtuh ahkan Iyok. 7 Jadik, arak noh ihkam jolahan mbak ulun jok kolo erih. 8 Holuk ahtoi pihkir kam was pindong tului jaham pocayak mbak Hotalak. Tahpik huntuh, ihkam was Yesus jok tepui Ah khavun konohicok mbak Iyok sohinggak kam bolum luvang tarang. Jadik tobiat mik alah kolo anak-anak Hotalak jok bolum nuk luvang tarang. 9 Kotului tarang jok tahkan Hotalak, mahkak dolang ulun pocayak touk nguan paring tobiat jok pios, tobiat jok adil khavun tobiat jok hinut. 10 Ihkam alah ngotiak ngurah inon jok touk nguan ahtoi Hotalak ngandah khavun bolum mbak tobiat jok numun kokaniw Ah. 11 Arak nguan aꞌang jok yarok gunai ah numun kolo dolang ulun jok bolum luvang pindong. Totahpik sopahtut ah noh ihkam marak ahkan doh, ngindoi inon jok konguai doh salak. 12 Tobiat jaek jok konguan doh mocuhuk-mocuhuk, ngesah ah kiyak nguan tok miak nyangit. 13 Kotihkak arok tarang mahkak paring aꞌang ahkan botatuk kihtan. 14 Kotului tarang erih noh mahkak paring tobiat jaek doh jadik botatuk. Tului erih noh uwas pomarak:
“Monyun nai ihkok jok tiruh!
Kuat nai tahkan pomalus muk,
Kristus ahkan nguan ihkok arok luvang tarang Ah.”
15 Kotului erih, nohtok ah noh tuꞌuk-tuꞌuk bokolo komolum muk. Arak bolum kolo dolang ulun jok iyam ngorehti bokolo bolum jok pios. Totahpik bolum noh mbak horahtik taꞌai inon jok hinut. 16 Sinong kotihkak ihkam alah nulo nguan aꞌang jok pios, kotului huntuh tumbuk ulun nguan aꞌang jok jaek. b 17 Arak baleh, totahpik ngotiak ah noh ngorehti inon jok konganin Hotalak.
18 Arak noh ihkam buso kotului ngorih danum anggur, tului erih ahkan nguan ihkam iyam taꞌai nguasak arop mik. Holovik pios ngindoi ihkam nongak arop mik konguasak Roh Hotalak. 19 Ihkam alah ngorohon ahtoi icok mbak jok bohkon hatin nyanyi tahkan Mazmur, nyanyi tahkan Auh Hotalak khavun lagu-lagu jok bohkon mongenai Tuhan. Tuꞌuk-tu'uk noh nyanyi mbak ahtoi jok ngandah hun tok momuji Tuhan. c 20 Bosukur noh nulo ahkan paring aꞌang noku Hotalak, Amai tok kotului inon jok uwas konguan Tuhan tok Yesus Kristus.
Poletah mongenai avui-humai dolang ulun pocayak
21 Ngindoi ihkam ngolehkak Kristus, mahkak ihkam alah pahtuh icok mbak jok bohkon ah.
22 Dolang oruh ngolehkak ah noh bosai mik, kolo ihkam ngolehkak Hotalak. d 23 Kotului bosai iyok noh kuhung, jok momipin oruh ah. Havoi kolo Kristus arok noh Kuhung tahkan jomaat, ihtok arok noh behtiu Ah. Iyok jok nyolamat behtiu-Ah tahkan konohukum dosa. 24 Kolo jomaat pahtuh mbak Kristus, koderih kak oruh alah pahtuh mbak bosai ah luvang paring aꞌang.
25 Dolang bosai alah mongasihi oruh ah kolo Kristus mongasihi ihtok, holovik hinok Iyok kanik pomunuk ahkan tok jok pocayak mbak Iyok. e 26 Kristus nguan erih supayak paring ulun pocayak jadik kudus, Iyok morasih tok tahkan dosa mbak danum baptis khavun mbak ajar barak nyihing Auh-Ah. 27 Mbak koderih Iyok nguan jomaat erih jadik suci sohingga duon doh tombok yamios kotamam ah nuk husuk Kristus, jadik Iyok tepui ah jok tuꞌuk-tuꞌuk borasih, jok iyam arok tahpas kokurang ah ngindoi iyam kosolai ah samak sinok. 28 Koderih kak dolang bosai alah mongasihi oruh ah kolo arop ah. Bosai jok mongasihi oruh ah rehti ah iyok mongasihi kak mbak arop ah bongoi. 29 Iyam pujik arok ulun jok becik mbak behtin arop ah bongoi, totahpik iyok ahkan nongak ah kuman khavun nyorunuh ah. Kolo jok konguan Kristus ahkan dolang ulun pocayak. 30 Iyok jagak khavun nyorunuh tok kotului ihtok anggota behtin Aiu. 31 Nuk luvang Alkitab tonulih: “Kotului erih noh bahkas ahkan nohtah amai inai ah khavun konohicok umbak oruh ah, sohinggak dorok jadik icok.” f 32 Auh tuh bohalik ahkan kongorehti, khavun monurut kuk rehti auh erih arok noh ajar barak mongenai Kristus khavun ulun-ulun pocayak jok hicok mbak Iyok. 33 Holuk poh koderih, auh ihtuh halik ajar barak ahkan mik supayak dolang bosai mongasihi oruh ah, kolo arop ah khavun dolang oruh alah ngolehkak bosai ah.