Epesus 4

Dolang ulun pocayak numun kolo behtin Kristus

Kotului erih noh, ahkuk ulun jok pomonjara kotului molayan Tuhan Yesus, ahkuk ngajar marak ihkam dolang ulun pocayak supayak kam bolum pahtuh mbak poletah Hotalak jok naꞌah ihkam jadik ulun jok iyok tepui. 2 Ihkam alah bolum iyam sahkah, pios tuhtui auh mik, khavun arak pohos birat. Mokarah ah noh kopion muk mbak ngavat ulun khavun hopasik icok mbak jok bohkon. 3 Ihtok uwas konohicok Roh Hotalak, jadik ngotiak ah noh jagak ah inon jok was konguan Hotalak erih mbak bolum hokopios havo-havoi ulun pocayak jok bohkon. 4 Paring tok jok pocayak mbak Yesus tepun roh jok havoi yok erih Roh Hotalak, mahkak ihtok paring ah jadik icok kolo behtik Kristus. Ihtok tepun pongharapan jok havoi kak, yok erih ngoharap mbak Iyok jok uwas naꞌah tok jadik ulun pocayak. 5 Tihkas icok kiyak Tuhan jok havo-havoi sonyembah tok, tihkas icok kiyak ajar barak jok tok pocayak, khavun tok kongombaptis tihkas luvang icok kiyak ngarai. 6 Tihkas icok kiyak Hotalak yok erih Amai tahkan paring tok. Iyok bokuasak ahkan paring aꞌang. Iyok korejak nyihing paring tok khavun Iyok bolum nuk luvang ahtoi tok. 7 Kristus nongak karunia jok havoi aiu ahkan sinong ulun, numun inon jok kokaniu-Ah. 8 Luvang Alkitab tonulih:

“Beteng Iyok nuhkat noku nuk jok paling isung,

Iyok ngomin dolang musuh-Ah jok uwas kongalah-Ah.

Khavun Iyok ahkan nongak aꞌang jok pios noku dolang ulun jok hilak Iyok.”

9 Jadik ngindoi pomarak: “Iyok nuhkat noku nuk jok punak isung,” mahkak rehti ah Iyok uwas pujik mosuluh noku nuk jok punak pindak nuk duniak. 10 Iyok jok pujik mosuluh erih noh Kristus, Kristus kak jok alik nuhkat noku nuk jok punak isung tahkan paring aꞌang, supayak iyok arok nuk amo-amoh. 11 Kristus kak jok uwas ngahtur supayak arok ulun jadik rasul, arok jok jadik nabik, arok ulun jok konguhtus ahkan ngesah Tarung Pios noku amo-amoh, arok ulun momipin khavun ngajar dolang ulun pocayak. 12 Iyok nguan aꞌang erih supayak dolang ulun pocayak siap nguan korejak Hotalak, khavun dolang ulun jok pocayak mbak Iyok, yok erih behtiu ah, idoh touk borohon. 13 Korejak erih konguan nulo nyiring paring tok jadik icok luvang kopocayak tok khavun pengetahuan tok ahkan Anak Hotalak. Khavun nyiring tok jadik ulun jok mahik horahtik, tehtap borohon luvang kopocayak tok, khavun tobiat tok mahik pios kolo tobiat Yesus. 14 Mahkak ihtok iyam nai kolo anak iyam koik jok murah tonihpuk, kolo alut koik jok omin lujak kohtoi kanai iyam netu. Jadik ngindoi arok ulun licik ngajar ajar barak jok lajat salai ah jaek, ihtok was taꞌai khavun ihtok iyam ahkan ngohasuk ah. 15 Totahpik ihtok alah nulo pahtuh mbak ajar barak jok hinut khavun bolum hopasik. Sohinggak tobiat tok mahi-mahik havoi mbak tobiat Yesus, kotului Iyok noh Kuhung tahkan paring tok jok pocayak. 16 Nyihing kuasak Kristus paring tok ulun pocayak uwas konohicok, numun kolo behtin arok anggota-anggota ah tahpik icok. Ihtok arok noh behtin Kristus, ngindoi ihtok havoi aiu nguan korejak jok tonongak tahkan Iyok mbak pios khavun hopasik, mahkak behtiu erih jadik muhat.

Komolum jok bohuak nuk luvang Kristus

17 Mbak kuasak Tuhan ahkuk ngajar marak ihkam, supayak ihkam iyam nai bolum kolo ulun-ulun jok iyam ngenal Hotalak. Idoh mihkir paring aꞌang jok yarok gunai ah. 18 Iyam taan doh inon-inon tului pihkir ah uwas pindong, khavun iyam taan idoh ngomok bolum bohuak tahkan Hotalak. Kotului mahang jaan doh mahkak idoh iyam ngorehti inon pun mongenai Hotalak khavun iyam kanik ngenal Iyok. 19 Iyam taan doh miak hinok, oluk poh nulo doh nguan jok jaek. Idoh nulo atak nguan paring aꞌang jok iyam sonunuh khavun iyam alik puas nguan paring aꞌang jok iyam pahtut.

20 Totahpik Tarung Pios mongenai Kristus iyam ngajar kam bolum kolo erih! 21 Ihkam was nyonih mongenai Yesus Kristus tahkan ulun-ulun jok ngajar mik. Khavun sobagai ulun jok ngohasuk Iyok, ihkam was kongajar kak ajar barak jok hinut tahkan Hotalak jok arok nuk luvang Yesus. 22 Jadik arak hinok bolum mbak tobiat jok holuk sojaham ihkam ngenal Kristus, bolum kolo erih ahkan nguan kam mahi-mahik jaek. Khavun nguan kam lajat tului kam ngohasuk dolang kojolik mik jok jaek. 23 Mosuah ah noh Roh Hotalak ngaluh ahtoi pihkir muk. 24 Ihkam alah jadik kolunon jok mokarah tobiat-tobiat Hotalak, sohinggak dolang ulun ahkan nohtok komolum mik tuꞌuk-tuꞌuk pios khavun kudus kolo kokanin Hotalak.

25 Kotului erih tondok nai bobalik, ihkam alah nuhtui jok hinut icok mbak jok bohkon. Kotului paring tok jok pocayak mbak Yesus was jadik anggota tahkan icok behtiu Ah. 26 Kotihkak ihkam birat, arak noh nguan dosa. Tondok nai sangit sojaham mahtan ondo tonyop. 27 Lacak paring otuk ahkan manang tahkan ihkam, ngindoi ihkam birat yamios kotahin. 28 Ulun jok bojoin nahko, arak nai iyok nahko hinok. Iyok alah tuhkoi korejak supayak ngonduon uhpah ah, khavun tahkan uhpah ah erih iyok touk ngavat ulun jok arok kopoduluk ah. 29 Ngindoi ihkam bokesah, arak noh hatin auh jok jaek. Hatiu ah noh auh jok pios khavun jok touk ngavat ulun bohkon sosuai kopoduluk doh. Auh kolo erih ahkan ngorohon ahtoi dolang ulun jok nyonih ah. 30 Arak noh nguan Roh Hotalak jok kudus jadik liduk tului auh muk jok jaek. Kotului Roh Hotalak jok arok luvang tok jadik tandak ngindoi ihtok Iyok tepui Ah, nyiring uwas ohkot ah Iyok ahkan ngolahpas tok tahkan duniak jok jaek. 31 Ngindou ah noh poros ahtoi muk, kanik malos kojaek ulun khavun birat, arak nai hotuhui khavun motenah. Tondok noh nguan paring aꞌang jok jaek. 32 Totahpik alah pios noh ahtoi mik khavun hopasik noh icok umbak jok bohkon. Havoi mbak Hotalak jok was ngapun kam nyihing Kristus, mahkak ihkam ngapun ah noh icok mbak jok bohkon.