Rasul Paulus konguhtus ahkan ulun jok iyam Yahudi
3
Kotului erih ahkuk Paulus kongipos luvang ponjara, tului ahkuk ngesah Tarung Pios mongenai Yesus Kristus ahkan ihkam jok iyam Yahudi. 2 Ihkam umbot nyonih ngindoi Hotalak punak pios mbak ahkuk, sohinggak Iyok nyuhuk ahkuk ngesah Tarung Pios ahkan mik jok iyam ulun Yahudi. 3 Hotalak marak ah kak ahkak kuk mongenai evak-Ah jok kotahin tuh jaham alik pomarak ahkan iyai-iyai. Ahkuk was nulih nyohiot mongenai evak erih luvang surat ihtuh. 4 Ngindoi ihkam ngomasak ah, mahkak ihkam ahkan taꞌai bohkolo ahkuk ngorehti rahasiak Kristus. a 5 Evak erih holuk sonyuhuk, yarok kolunon jok taꞌai. Totahpik huntuh Roh Hotalak was mokarah ah ahkan dolang rasul khavun dolang nabik jok konopilik Ah. 6 Evak Hotalak jok holuk sonyuhuk erih iyok noh: ngindoi ulun jok iyam Yahudi norimak Tarung Pios mongenai Yesus mahkak idoh ahkan norimak berkat Hotalak jok havoi mbak ulun Yahudi. Ulun Yahudi khavun iyam Yahudi, paring doh ahkan jadik hicok behtiu luvang Yesus khavun ahkan norimak janjik kosolamatan Hotalak jok konguan nyihing Yesus Kristus.7 Hotalak mokarah kopion ahtoi-Ah ahkak kuk, Iyok ngopilik ahkuk jadik jihpoi-Ah ahkan ngesah Tarung Pios. Tului kuasak Hotalak luvang ahtoi kuk mahkak ahkuk touk norimak korejak tuh. 8 Tahkan holang paring ulun jok pocayak mbak Hotalak, ahkuk noh jok punak hinak. Totahpik Hotalak punak pios ahtoi mbak ahkuk mahkak ahkuk konguhtus Ah ngesah Tarung Pios ahkan ulun jok iyam Yahudi. Ahkuk ngesah ahkan doh mongenai kopios ahtoi Yesus Kristus jok punak hajok khavun iyam taan tok ngorehti ah. 9 Ahkuk konguhtus kak Molehte ahkan paring ulun mongenai evak Hotalak, jok napak paring aꞌang. Evak erih uwas konguai Ah tahkan lomoi, totahpik iyam arok icok behtik pun jok pomarak Ah. 10 Supayak nyihing dolang ulun pocayak, huntuh paring ponguasak jok momorintah jok tepun kuasak nuk langit taꞌai ngindoi Hotalak erih punak horahtik luvang paring aꞌang. 11 Hotalak nguan erih tumbas mbak evak-Ah jok uwas tonetu tahkan topahtuk ah, khavun tehtap nyiring yarok tihkas nyamah ah. Yesus Kristus, Tuhan tok noh jok nguan evak Hotalak erih touk nyolung. 12 Ihtok touk lombut noku Hotalak mirak kiyak khavun iyam mihkoh, tului tok uwas tuꞌuk-tuꞌuk pocayak mbak Kristus khavun konohicok mbak Iyok. 13 Mahkak ahkuk nyavot umbak ihkam supayak arak liduk kotihkak nohtok kojorak kuk tului ngavat ihkam. Ahkuk jorak ahkan kopios mik.
Paulus bodoa ahkan dolang ulun pocayak nuk kota Epesus
14 Kotihkak ahkuk nohouk evak Hotalak erih, ahkuk nyuhkuk bodoa noharep Hotalak Amai. 15 Iyok noh jok nongak komolum ahkan paring jok mocon nuk surga khavun jok mocon nuk duniak. 16 Ahkuk bodoa noku Iyok jok punak konolehkak supayak Iyok nongak Roh-Ah jok bokuasak ahkan ngorohon ahtoi mik. 17 Nihak ngindoi Kristus mocon nuk luvang ahtoi mik kotului ihkam was pocayak mbak Iyok. Ahkuk bodoa, supayak inon pun jok konguan mik erih tului asin mik mbak Hotalak khavun kolunon. 18 Ahkuk bodoa ahkan ihkam khavun paring ulun jok pocayak mbak Hotalak, supayak ihkam ngorehti asin Kristus jok iyam taꞌai konguhkur, jok yamios hajoi ahkan ihtok. 19 Asin Kristus erih holovik hajok tahkan paring pihkir tok. Totahpik ahkuk tehtap bodoa supayak ihkam tuꞌuk-tuꞌuk ngomok usiu-Ah erih. Sohinggak tobiat Hotalak kihtan nuk luvang komolum mik.