Bolum mbak aꞌang jok bohuak
2
Holuk sojaham ihkam pocayak mbak Yesus Kristus ihkam bolum nuk luvang dolang dosa mik, khavun iyam pahtuh mbak dolang poletah Hotalak. Beteng erih komolum mik numun kolo ulun jok uwas mahtoi. a 2 Beteng hun erih ihkam ngohasuk kojolik jok jaek tahkan ulun-ulun nuk duniak tuh, ihkam ngohasuk kokanin Lacak paring otuk. Iyok noh jok nguasak komolum dolang ulun jok iyam pahtuh mbak Hotalak. 3 Sojaham ihtok pocayak mbak Yesus komolum paring tok havoi mbak idoh. Tobiat tok iyok noh kojolik kolunon jok punak ngandah nguan dosa khavun ngohasuk pihkir jok jaek. Tului erih, ihtok pahtut norimak kobirat Hotalak havoi mbak dolang ulun bohkon nuk duniak jok bolum luvang dosa.4 Totahpik yamios hajoi ah kopion ahtoi Hotalak! Iyok punak mongasihi ihtok. 5 Kotului erih beteng ihtok honong konganggap mahtoi tului ngolavan poletah Hotalak, Iyok nongak tok komolum jok bohuak hicok mbak Kristus. Nohouk ah noh! Ihkam sonyolamat tului kopion ahtoi Hotalak! 6 Tului ihtok icok umbak Kristus Yesus, Hotalak ngomolum tok hinok havo-havoi mbak Kristus, supayak ihtok mocon hicok mbak Kristus kak nuk luvang surga. 7 Paring aꞌang erih konguan Hotalak supayak beteng jaman jok ahkan lombut, kolunon nohtok asin Hotalak punak hajok khavun kopios Ah ahkan tok kotului Yesus Kristus. 8 Ihtok sonyolamat tahkan kobirat Hotalak iyam kotului tok ngotiak ah, totahpik tongak tahkan Hotalak kiak, tului kopion ahtoi Ah jok punak hajok nyihing kopocayak mbak Yesus Kristus. 9 Ihkam iyam norimak kosolamatan tului kam nguan paring aꞌang jok pios. Jadik arak noh arok ulun jok ngisung arop ah mongenai kosolamatan erih. 10 Nyihing pocayak mbak Yesus Kristus, Hotalak nguan komolum tok jadik bohuak, mbak salai ah huntuh ihtok touk nguan paring korejak jok pios. Korejak erih uwas sonyodiak Hotalak ahkan paring ulun jok pocayak.
Ihtok jadik hicok tului Yesus
11 Bari-basak jok iyam ulun Yahudi! Nohouk ah noh ngindoi lomoi ihkam yam kongarok sobagai ulun Yahudi. Ihkam pomarak “Ulun jok iyam pomalax” mbak ulun Yahudi jok “pomalax” (Jok kotuui ah, malax iyok noh aꞌang jok konguan mbak longon kolunon ahkan behtin doh kiak). 12 Beteng erih ihkam jaham pocayak mbak Yesus, ihkam iyam ulun jok konopilik Hotalak sohinggak iyam duon mik norimak janjik-janjik Hotalak. Ihkam kak holuk bolum nuk duniak tuh iyam taan mik inon aꞌang jok pios jok anggar ah ahkan torjadik ahkan mik khavun ihkam bolum iyam mongenal Hotalak. 13 Totahpik huntuh, ihkam uwas hicok umbak Yesus Kristus, mahkak komolum mik iyam kolo holuk hinok jok macuk umbak Hotalak. Huntuh ihkam donik mbak Hotalak kotului Yesus uwas mahtoi ahkan mik. 14 Lomoi ulun jok Yahudi khavun jok iyam ulun Yahudi idoh hobomusuh, kolo arok pahkot bahtuk nuk holang doh. Tahpik Kristus uwas ngolohpung pahkot erih sohinggak ihtok touk bolum hokopios icok mbak jok bohkon, Iyok nguan ihtok jadik icok koluarga. 15 Hukum agamak Yahudi mbak porahturan-porahturan ah was umbot kongahpus Kristus nyihing pahtoi-Ah nuk salib. Mahkak ulun Yahudi khavun jok iyam ulun Yahudi jadik icok bangsak jok bohuak. Idoh iyam nai hobomusuh tahpik hokopios tului Kristus. b 16 Jadik, nyihing pahtoi-Ah nuk kajuk salib, Kristus ngohicok duok bangsak erih khavun nguan idoh iyam nai hobomusuh mbak Hotalak. Sohinggak idoh hokopios icok mbak jok bohkon ah. c 17 Yesus lombut ngomin Tarung Pios mongenai damai sojahtera ahkan ihkam jok iyam ulun Yahudi, jok holuk ah macuk mbak Hotalak. Iyok kak jok ngomin tarung erih noku doh jok donik mbak Hotalak. d 18 Jadik paring tok, jok ulun Yahudi khavun jok iyam Yahudi, tok touk lombut noku Hotalak Amai tok nuk luvang doa kotului jok konguan Yesus. Ihtok touk lombut noku Iyok tului pongavat Roh Kudus Ah jok havoi.
19 Mahkak ihkam jok iyam ulun Yahudi, holuk ihkam arok noh ulun luar. Totahpik huntuh ihkam uwas jadik ulun jok Hotalak tepui Ah, ihkam arok noh anak-anak Hotalak. 20 Paring tok ulun jok pocayak mbak Kristus kolo lohpo. Lohpo jok ponotombok nuk isung bahtuk jok borohon, bahtuk erih kolo ajar barak dolang rasul khavun nabik. Totahpik bahtuk jok paling peting jok nguan lohpo erih tombok mbak borohon iyok noh Yesus. 21 Numun kolo lohpo jok pomoninding mbak kajuk mico-micok, koderih kak mbak ihtok ulun jok pocayak mbak Yesus, tok kolo kajuk-kajuk erih jok pomoninding pios-pios sohinggak lohpo erih hajok khavui borohon, jadik lohpo jok pahtut ahkan Hotalak. 22 Jadik paring ulun pocayak tahkan ulun Yahudi khavun iyam Yahudi Kristus uwas nguan tok icok, nyihing Roh Hotalak tok havo-havoi jadik unuk Ah mocon.