Epesus 1

SURAT PAULUS

AHKAN JOMAAT NUK

EPESUS

Salam

Salam tahkan ahkuk Paulus, jok jadik rasul Kristus Yesus tului kojolik Hotalak, ahkan paring ulun jok pahtuh mbak poletah Hotalak khavun sotia mbak Yesus Kristus nuk kota Epesus.

2 Ahkuk bodoa nihak ndoi Hotalak Amai khavun Tuhan tok Yesus Kristus nongak kopion ahtoi-Ah khavun damai sojahtera ahkan mik!

Tuhan motohtok kopion ahtoi-Ah ahkan tok

3 Has tok momuji Hotalak, jok tonaꞌah Yesus Amai Ah. Hotalak jok was nongak ahkan tok berkat rohani tahkan surga holovik holeak tului ihtok Yesus Kristus tepui Ah. 4 Sojaham duniak tuh tonaoi Hotalak uwas ngopilik ihtok nyihing Yesus Kristus. Ihtok konopilik ahkan bolum kudus khavun iyam arok kosolaꞌan tok nuk husuk Ah. 5 Kotului Hotalak masik mbak ihtok, mahkak tahkan topahtuk ah Iyok was netu ahkan ngonin tok jadik anak-anak-Ah. Ihtok jadik anak Hotalak nyihing Yesus Kristus, numun mbak kokanik khavun kosenang ahtoi-Ah. 6 Ihtok alah ngehtek Hotalak tului Iyok was masik mbak ihtok holovik holeak. Masik jok yamios erih tonorimak tok tului ihtok was pocayak mbak Yesus Kristus yok erih Anak-Ah jok kongasih-Ah.

7 Yesus Kristus mahtoi dahak-Ah botusuh. Nyihing dahak Yesus erih Hotalak molahpas ihtok tahkan kongohukum tului tok bodosa. Jadik ihtok konapun tahkan paring dosa kotului kopion ahtoi Hotalak jok punak hajok ahkan tok. 8 Kopion ahtoi Hotalak iyam arok tihkas nyamah ah, Iyok nongak aꞌang erih tului kohorahtik ah nuk luvang paring aꞌang khavun ngorehti paring ah. 9 Lomoi ulun iyam pomarak inon jok ahkan Hotalak nguai ah, tahpik huntuh Hotalak was marak ahkan tok mongenai inon jok was Iyok ngevak ah. Khavun Hotalak was nehtap ngindoi Yesus noh jok ahkan nguan evak erih torjadik. 10 Salan evak erih iyok noh Hotalak kanik nguan jadik icok paring jok nuk surga khavun paring jok nuk duniak nuk pindak kuasak Kristus, Iyok jok ahkan jadik Kopalak. Paring erih ahkan torjadik tumbas mbak ohkot jok was tonetu Hotalak.

11 Hotalak ngorejak paring aꞌang numun kojolik Ah khavun numun inon jok tonetu Ah bongoi. Tahkan lomoi Iyok was ngopilik ihtok jadik ulun-ulun jok nyembah Iyok, tului tok konohicok mbak Yesus Kristus. 12 Mbak koderih ihtok jok paling holuk boharap mbak Kristus, ihtok touk momuji Iyok kotului kuasak Ah jok hajok.

13 Koderih kak mbak ihkam, umbot ihkam nyonih tarung jok hinut tahkan Hotalak, yok erih Tarung Pios jok nongak kosolamatan ahkam mik, mahkak kam jadik pocayak mbak Kristus. Kotului erih Hotalak nongak tandak ngindoi ihkam Iyok tepui ah. Tandak erih iyok noh Roh Kudus jok konojanjik Hotalak. 14 Kotului Hotalak nongak Roh Kudus ahkan tok, mahkak ihtok yakin ngindoi ihtok ahkan norimak berkat jok holovik holeak tahkan Hotalak ahkan ulun-ulun jok pocayak. Ihtok jadik Hotalak tepui khavun ihtok yakin ahkan ponolahpas-Ah sohinggak iyam jadik jihpon dosa hinok. Kotului erih ihtok alah momuji Hotalak jok punak konolehkak.

Doa Paulus

15 Ahkuk nyonih ngindoi ihkam was jadik ulun pocayak mbak Tuhan Yesus. Khavun ahkuk nyonih kak bohkolo ihkam mongasihi ulun bohkon jok pocayak mbak Kristus. 16 Mahkak ahkuk nulo bosukur mbak Hotalak tului ihkam. Khavun nulo bodoa ahkan mik nuk luvang paring doa kuk. 17 Ahkuk nyavot mbak Amai jok konolehkak, jok sonyembah mbak Tuhan tok Yesus Kristus, supayak Iyok nongak Roh Ah ahkam mik. Roh erih ahkan nguan kam horahtik khavun taꞌai mongenai Hotalak jok hinut, sohinggak ihkam taan Iyok holovik hinok. 18 Ahkuk nyavot supayak Hotalak nguan ahtoi kam tarang sohinggak ngorehti tuꞌuk-tuꞌuk inon jok ihkam touk ngoharap ah tahkan Hotalak jok naꞌah kam. Khavun supayak Ihkam ahkan ngorehti kak bokolo janjik Ah jok holovik holeak tonongak ahkan tok ulun jok pocayak. 19 Khavun ihkam taꞌai kak punak hajok kuasak Hotalak jok tonongak ahkan tok ulun pocayak. Kuasak Hotalak jok punak yamios erih havoi mbak kuasak 20 jok hatin Ah kotihkak hulik ngomolum Kristus tahkan pomalus Ah. Khavun nongak ahkai Ah pocon nuk surga jok punak bolehkak nuk silak kotouk Hotalak.

21 Nuk anai Kristus moretah mbak kuasak jok punak hajok holovik tahkan paring kuasak molekat khavun roh jaek. Kristus holovik bokuasak tahkan paring ngarak, iyam huntuh kiak totahpik nyiring yarok tihkas nyamah ah. 22 Hotalak nongak hak noku Kristus ahkan nguasak dolang paring aꞌang. Khavun Iyok nongak Kristus noku jomaat supayak jadik Kopalak jok momipin ihtok nuk luvang paring aꞌang. 23 Jomaat iyok noh behtin Kristus nuk duniak tuh. Iyok nguan dolang paring aꞌang yarok tahpas ah.