Pilipi 1

SURAT PAULUS

AHKAN JOMAAT NUK

PILIPI

Salam tahkan Paulus khavun Timotius ahkan jomaat nuk Pilipi

Surat ihtuh tahkan ahkuk, Paulus, khavun Timotius, ihkai jihpon Kristus Yesus.

Ihkai motiang surat ihtuh noku paring ulun suci jok Kristus tepui nuk kota Pilipi, noku dolang pomipin jomaat, khavun dolang polayan jomaat jok arok nuk anai.

2 Ihkai bodoa nihak ndoi Hotalak Amai tok khavun Tuhan Yesus Kristus nongak noku ihkam kopion ahtoi Ah khavun damai sojahtera.

Paulus bosukur khavun bodoa ahkan jomaat Pilipi

3 Ahkuk bosukur noku Hotalak, nyinong ahkuk nohouk ihkok. 4 Beteng ahkuk bodoa ahkan paring mik, ahkuk nulo bodoa mbak ahtoi jok ngandah. 5 Ahkuk botorima kasih noku Hotalak kotului tahkan hondo topahtuk ah nyiring huntuh, ihkam uwas dohop ahkuk ngesah Tarung Pios tahkan Hotalak. 6 Ahkuk yakin Hotalak jok uwas nopahtuk korejak jok pios nuk holang ihkam, Iyok ahkan nguai ah nyiring umbot uras, yok erih beteng Kristus Yesus lombut hinok. 7 Tuꞌuk noh ngindoi ahkuk pahtut ngomok kolo erih kotului ahkuk punak mongasihi ihkam. Kotului ihkam was korejak havo-havoi mbak ahkuk beteng ahkuk nguan korejak jok tonongak Hotalak mbak kopion ahtoi-Ah ahkak kuk. Ihkam ngavat ahkuk iyam cumak beteng ahkuk nyolong ponjara huntuh, totahpik nuk luar ponjara kak, beteng ahkuk hilak Tarung Pios erih khavun mokarah ah ngindoi Tarung Pios erih hinut. 8 Hotalak taꞌai ngindoi ahkuk punak bolinguk umbak ihkam mbak kasih jok tahkan Kristus Yesus.

9 Ahkuk bodoa supayak kasih mik mahik holovik holeak, ihkam halik mahi-mahik horahtik khavun ngorehti paring aꞌang mbak hinut. 10 Mahkak ihkam touk milik inon jok pios, supayak komolum mik borasih khavun iyam arok kosalak mik nyiring ondo Kristus lombut hinok. 11 Ahkuk bodoa kak supayak ihkam nulo nguan aꞌang jok hinut, tului Yesus Kristus noh jok ahkan ngavat ihkam supayak duon mik nguan paring aꞌang erih. Jadik kotihkak ulun nohtok tobiat mik jok pios erih, idoh ahkan ngolehkak khavun momuji Hotalak.

Paulus kanik supayak Tarung pios tehtap kongesah

12 Dolang bari-basak kuk, ahkuk kanik ihkam taꞌai ngindoi inon jok uwas torjadik mbak ahkuk nuk ohtoi mahi-mahik nguan Tarung Pios jadik konihan ulun arok khavun idoh pocayak. 13 Sohinggak paring ulun nuk ohtoi tormasuk paring pongawal Romawi idoh taꞌai ngindoi ahkuk pomonjara tului Kristus. 14 Kotului ahkuk nuk ponjara mahkak tumbuk bari-basak tok jok uwas pocayak idoh mahi-mahik pocayak hinok, sohinggak idoh mahik bohanyik khavun iyam mihkoh narung Tarung Pios tahkan Hotalak.

15 Arok pirak behtik ulun jok ngesah mongenai Kristus kotului idoh ngomeluk khavun hobatah mbak ahkuk, totahpik arok kak jok ngesah ah mbak salai jok pios. 16 Idoh ngesah mongenai Kristus kotului kasih, idoh taꞌai ngindoi ahkuk pomonjara nuk ohtoi kotului ahkuk marak ah Tarung Pios erih hinut. 17 Tahpik idoh jok bohkon ngesah mongenai Kristus kotului ngomeluk khavun ahkan kopoduluk bongoi doh. Mbak koderih davak doh ahkuk mahik jorak nuk ponjara.

18 Aꞌang erih iyam mosalah ahkak kuk. Inon leh Kristus kongesah mbak salai jok salak ngindoi iyam salai jok tulin. Ahkak kuk jok poduluk Kristus kongesah, tului erih ahkuk ahkan ngandah, khavun nulo ngandah. 19 Kotului ahkuk taꞌai pongopah ah ahkuk ahkan ponolahpas nyihing dolang doa mik khavun pongavat tahkan Roh Yesus Kristus. 20 Tului ahkuk punak jolik khavun boharap supayak ahkuk iyam pujik miak nuk husuk Hotalak kotului paring jok konguan kuk. Totahpik kolo sojaham ah, ahkuk ahkan tehtap bohanyik nulo ahkan Kristus. Mbak koderih Kristus ahkan konolehkak nuk luvang arop kuk, kotihkak ahkuk bolum khavun ngindoi ahkuk mahtoi. 21 Kotului salak kuk bolum ahkan ngosenang ahtoi Kristus, khavun ngindoi ahkuk mahtoi ahkuk utung kotului ahkuk ahkan hicok mbak Kristus. 22 Jadik ngindoi ahkuk alah bolum nuk duniak ihtuh, erih noh hocok kuk korejak ahkan Tuhan. Mahkak ngindoi sonyuhuk ngopilik, iyam taak kuk ngopilik jok amoh inon ahkuk ngopilik bolum ngindoi iyam mahtoi. 23 Ahkuk kongahut duok kojolik: Topahtuk ah ahkuk jolik pohos nohtah duniak tuh tulak mocon mbak Kristus, erih noh jok punak pios ahkak kuk. 24 Jok koduok ah ahkuk ngomok holovik pios hinok ngindoi ahkuk tehtap mocon mbak ihkam nuk duniak tuh, tului ihkam honong poduluk mbak ahkuk. 25 Ahkuk yakin mongenai aꞌang ihtuh, mahkak ahkuk taꞌai ahkuk ahkan tehtap mocon nuk duniak mbak ihkam, aꞌang erih supayak ahkuk touk ngavat ihkam mahik borohon khavun mahik ngandah luvang kopocayak mik. 26 Sohinggak nain ngindoi ahkuk lombut hinok noku ihkam, nyihing polombut kuk erih nguan ihkam mahi-mahik momuji Yesus Kristus kotului inon jok konguai-Ah ahkak kuk.

Ngajar marak supayak tehtap bolum sosuai mbak Tarung Pios

27 Jok punak poduluk ihkam alah bolum ngohasuk Tarung Pios Yesus Kristus, supayak ngindoi ahkuk lombut ahkuk nohtok, khavun ngindoi ahkuk iyam lombut, ahkuk touk nyonih ngindoi ihkam borohon, hicok ahtoi hicok kokanin mik. Khavun ihkam ngotiak ah havo-havoi jagak kopocayak mik monurut Tarung Pios tahkan Yesus Kristus erih. 28 Ihkam alah bohanyik, arak mihkoh mbak ulun jok ngolavan ihkam. Kobohanyik mik erih ahkan motohtok ah ngindoi idoh ahkan konolohpung. Tahpik ahkan emik arok noh tandak kosolamatan tahkan Hotalak. 29 Tului Hotalak pios mbak ihkam, Iyok milik ihkam iyam cumak pocayak mbak Kristus kiyak, tahpik jorak kak ahkan Kristus. 30 Ihkam huntuh jorak havoi mbak kojorak jok kongomok kuk holuk, kojorak kuk jok pujik kam nohtok ah. Khavun nyiring huntuh ihkam nyonih ah ngindoi ahkuk honong jorak.