SURAT PAULUS
AHKAN JOMAAT NUK
KOLOSE
Nopahtuk kesah
Kolose arok noh icok kota nuk Asia Koik, nuk silak timur kota Epesus. Iyam Paulus jok motombok jomaat kolose totahpik iyok ngomok ngindoi iyok arok tanggung jawab ah mbak dolang jomaat jok arok nuk anai, kotului iyok jok was nguhtus tahkan Epesus dolang polayan erih supayak noku Kolose. Paulus halik was nyonih kesah ngindoi nuk luvang jomaat Kolose arok dolang guruk agamak palsu jok ngajar ajar barak jok salak. Tahtup kolapak doh dolang guruk agamak erih marak ah ngindoi kanik nyokonok Hotalak khavun kanik sonyolamat, ulun alah nyembah dolang roh-roh jok bokuasak khavun jok momorintah nuk duniak ihtuh. Hiyon dolang guruk agamak palsu erih hinok, ulun alah pahtuh nguan dolang porahturan mongenai malax, palik inus khavun porahturan jok bohkon ah hinok.
Surat Paulus ahkan jomaat nuk Kolose tonulih supayak mokarah ah ajar barak agamak Kristen jok hinut khavun ngolavan dolang ajar barak guruk agamak palsu jok salak. Jok punak peting tahkan surat ihtuh iyok noh Yesus Kristus touk nongak kosolamatan jok yarok tahpas kokurang ah. Hiyon Paulus nok ajar barak jok bohkon nguan ulun macuk mbak Kristus kiyak. Nyihing Kristus, Hotalak naoi duniak ihtuh, khavun nyihing Kristus kak Hotalak nyolamat ah. Kotului hicok humbak mbak Kristus kiyak duniak touk sonyolamat. Umbot erih Paulus halik molehte ah bohkolo supayak ajar barak erih arok gunai ah nuk komolum ulun Kristen.
Jok ngonin surat Paulus erih noku Kolose arok noh Tikhikus dorok Onesimus. Onesimus iyok noh jihpon Pilemon. Paulus nyuhuk Onesimus bulik noku tuan ah Pilemon, Pilemon erih arok noh jomaat Kolose.