SURAT PAULUS JOK TOPAHTUK
AHKAN JOMAAT NUK
TESALONIKA
Nopahtuk Kesah
Tesalonika arok noh ibukota Makedonia, jok arok nuk provinsi korajaan Roma. Jomaat nuk Tesalonika ponotombok Paulus, uwas umbot iyok nohtah Pilipi. Totahpik iyam tahik umbot erih, ulun-ulun Yahudi jok ngomeluk mbak Paulus. Idoh pahtuk ngolavan Paulus kotihkak iyok ngotiak marak Tarung Pios ahkan ulun-ulun jok iyam ulun Yahudi, jok uwas mokarah kokanik doh ahkan ngohasuk ajar barak agamak Yahudi. Kotului erih noh Paulus mahpak ah noh nohtah Tesalonika khavun tulak noku Berea. Khavun beteng Paulus was dahpot nuk Korintus, iyok norimak surat tahkan Timotius, iyok arok noh jolahan Paulus korejak, Timotius bokesah nuk surat ah mongenai komolum jomaat nuk Tesalonika.
Jadik, Surat Paulus Jok Topahtuk noku Jomaat nuk Tesalonika ihtuh tonulih supayak nongak somangat khavun koborohon ahkan jemaat jok arok nuk anai. Paulus bosukur umbak tarung jok tonorimak ah mongenai kopocayak khavun kasih idoh. Jomaat tonohouk mongenai komolum Paulus beteng iyok honong arok unuk tohun-tohun idoh. Umbot mokarah paring aꞌang erih, Paulus mutah kiso-kisok idoh mongenai kolombut Kristus jok koduok kali ah. Ngindoi ulun Kristen palus sojaham Kristus lombut hinok, touk leh ulun erih norimak bolum jok hinut khavun yarok tihkas nyamah ah tahkan Kristus? Mirak Kristus lombut? Paulus ngajar marak supayak idoh nulo korejak umbak linuh khavun somangat nyihing idoh ngindoi Kristus lombut hinok.