SURAT PAULUS JOK TOPAHTUK
AHKAN JOMAAT NUK
TESALONIKA
Salam
1
Surat ihtuh tahkan Paulus, Silwanus khavun Timotius, ahkan ulun-ulun pocayak nuk Tesalonika jok hicok mbak Hotalak Amai khavun Tuhan Yesus Kristus.Ihkai bodoa nihak ndoi Hotalak mokarah kopion ahtoi-Ah jok punak hajok khavun nongak damai sejahtra ahkan paring mik. a
Komolum khavun kopocayak ulun-ulun Tesalonika
2 Ihkai bosukur noku Hotalak kotului kam paring ah, khavun ihkai nulo nohouk ihkam nuk luvang doa kai. 3 Kotihkak ihkai bodoa noku Hotalak Amai tok, ihkai nohouk ah bokolo kam korejak punak pios kotului ihkam pocayak mbak Yesus Kristus. Ihkai nohouk bohkolo kam was mongasihi ulun bohkon sohinggak korejak mahtoi-mahtoi ahkan idoh. Khavun ihkai halik nohouk ah kak ihkam tuꞌuk-tuꞌuk ngindoi Yesus Kristus ahkan lombut hinok. 4 Ihkai taꞌai dolang barih basak ngindoi Hotalak mongasihi kam paring ah, khavun Iyok was ngopilik ihkam jadik umat-Ah. 5 Kotului Tarung Pios jok pomarak kai ahkan mik, iyam cumak pomarak mbak auh kiyak totahpik pomarak mbak kuasak Roh Kudus. Khavun kai pocayak Tarung Pios erih tuꞌuk-tuꞌuk hinut. Ihkam taꞌai ngindoi ihkai bolum ahkan ngavat ihkam kotihkak ihkai mocon hicok humbak mbak ihkam. 6 Ihkam was numun komolum kai khavun komolum Tuhan Yesus. Holuk poh ihkam jorak nyangit totahpik ihkam norimak ajar barak erih tahtup kandah ahtoi kam kotului Roh Kudus noh jok nguan kam touk ngandah. b 7 Kotului erih noh ihkam motohtok tobiat mik jok pios supayak paring ulun jok pocayak nuk daerah-daerah Makedonia khavun Akhaya numui ah. 8 Kotului tahkan ihkam noh topahtuk ah, kesah mongenai Tuhan was konihan nuk Makedonia khavun Akhaya. Iyam erih kiyak kesah mongenai ihkam pocayak mbak Hotalak was konihan nuk amo-amoh, sohinggak ihkai yam poduluk hinok marak inon-inon mongenai ihkam. 9 Paring ulun erih idoh ngesah kopion mik tului ihkam norimak ihkai beteng kai hicok humbak mbak ihkam. Idoh halik ngesah ah ngindoi ihkam was iyam nai nyembah dolang topahtung jok tonapak mik, tahpik ihkam nongak komolum mik molayan Hotalak jok hinut khavun bolum. 10 Idoh bokesah hinok ngindoi huntuh ihkam honong ngindoi polombut Anak-Ah tahkan surga, jok was hulik konomolum Hotalak tahkan pahtoi-Ah, Iyok ihtuh noh Yesus, jok nyolamat tok tahkan kobirat Hotalak jok ahkan ngohukum ulun-ulun jok bodosa.