Polayanan Paulus nuk Tesalonika
2
Dolang bari-basak! Ihkam was taꞌai ngindoi ihkai lombut noku ihkam iyam sia-siak. 2 Tului ihkam was taꞌai sojaham kai lombut noku Tesalonika bohavung mbak ihkam, ihkai was pononyorak khavun konohina nuk Pilipi. Tahpik oluk poh tumbuk ulun ngolavan kai, Hotalak tok was nongak ahkan kai kobohanyik, supayak ihkai ngesah ahkam muk Tarung Pios tahkan Iyok. a 3 Ihkai iyam ngihit ihkam ngohasuk ajar barak jok nguan ihkam lajat, khavun salan kai tuh iyam jaek. 4 Ihkai iyam bokesah supayak ahtoi kolunon ngandah, totahpik ihkai ngajar supayak ahtoi Hotalak noh jok ngandah, Hotalak noh jok noliti ahtoi kai. Kotului ihkai pahtut nuk mahtai-Ah ahkan ngesah mongenai Tarung Pios erih. 5 Ihkam was taꞌai ngindoi ihkai yam pujik bokesah mbak auh jok momih nyoling, ngindoi iyam ngomalik kam supayak nyuhuk tobiat kai jok bokahuk tului kai kanik ngonduon duit mik. Hotalak noh saksi ah! 6 Ihkai iyam nyavot supayak ihkam ngindoi iyam ulun bohkon ngehtek kai pios. Jok kotuꞌui ah ihkai rasul Kristus touk kiyak nyavot paring aꞌang tahkan ihkam. 7 Totahpik beteng kai arok nuk holang ihkam, ihkai bosemu mbak ihkam, havoi kolo inai ngurus anak kinyam lengak ah. 8 Ihkai mongasihi ihkam, kotului erih kai kanik nongak Tarung Pios tahkan Hotalak khavun nongak komolum kai hinok. Tului ihkai punak mongasihi ihkam! 9 Dolang bari-basak basak, ihkam honong nohouk ah yamios kobahat ah ihkai ngotiak. Ihkai korejak hondo ngolomik supayak iyam ngorepot icok behtik pun nuk holang ihkam, beteng kai ngesah Tarung Pios tahkan Hotalak erih ahkan mik.10 Ihkai bolum suci, hinut khavun iyam pujik buah kouh tahkih nuk holang kam jok pocayak mbak Kristus. Ihkam khavun Hotalak noh saksi-saksi kai. 11 Ihkam taꞌai ngindoi ihkai nguan ihkam kolo amai ngajar anak ah. 12 Ihkai ngajar marak kam, supayak ngorohon ahtoi mik, khavun nulo nyuhuk kam pohos numun komolum jok pios erih supayak ihkam bolum ngosenang ahtoi Hotalak. Kotului Hotalak uwas naꞌah kam ahkan jadik umat Korajaan-Ah jok mulia.
13 Arok icok hinok aꞌang jok nguan ihkai nulo botorima kasih mbak Hotalak. Yok erih, kotului beteng kai ngesah Auh Hotalak ahkam mik, ihkam ngorehti Auh erih iyam tahkan kolunon kiyak, totahpik ihkam norimak ah kolo Auh tahkan Hotalak khavun tuꞌuk noh koderih. Auh Hotalak erih noh jok borkuasak luvang arop muk jok pocayak mbak Kristus. 14 Dolang bari-basak basak inon jok was konomok mik was konomok jomaat Hotalak jok arok nuk Yudea yok erih jomaat jok Kristus Yesus tepui. Ihkam pononyorak bangsak emik noh, havoi mbak inon jok torjadik mbak jomaat Hotalak jok arok nuk Yudea idoh pononyorak ulun Yahudi. b 15 Dolang ulun Yahudi erih noh jok munuk Tuhan Yesus khavun munuk dolang nabik, khavun monyorak ihkai. Idoh becik mbak paring ulun, khavun Hotalak punak iyam ngandah mbak idoh. c 16 Idoh halik majak ihkai ngesah ahkan paring ulun jok iyam ulun Yahudi bokolo idoh touk sonyolamat. Erih noh jok nguan ulun Yahudi nulo nguan dosa sohinggak dosa doh punak arok, paring dolang dosa was umbot doh nguai ah. Khavun pongopah ah doh kongadil Hotalak khavun konohukum jok punak bahat!
Paulus kanik tobarung mbak ulun Tesalonika sinok hinok
17 Dolang bari-basak huntuh ihkai hobomilang nyohuluk mbak ihkam, ihtok hobomilang nuk mahtak totahpik iyam nuk ahtoi. Ihkai punak bolinguk mbak ihkam, tului erih kai tuꞌuk-tuꞌuk ngotiak supayak bohavung nok mbak ihkam! 18 Ihkai jolik tobarung mbak ihkam hinok, ahkuk was nikos duok toluk kali, totahpik Lacak paring otuk erih nguan kai iyam taꞌai tulak noku anai. 19 Ihkai yakin ihkam ahkan nulo sotia. Ihkam noh jok nguan ahtoi kai ngandah, tului beteng Tuhan Yesus lombut, ihtok ahkan noharep Iyok mahkak ihkam noh jok ahkan nguan kai bangga! 20 Punak tuꞌuk ihkam noh jok nguan kai bangga khavun nguan kai ngandah!