Kesah jok pios mongenai ulun Tesalonika
3
Pongohpah ah iyam duon kai nahan linguk. Mahkak ihkai tehtap mocon nuk Atena, a 2 khavun ihkai nyuhuk Timotius noku ihkam. Iyok korejak mbak ihkai ngesah Tarung Pios mongenai Kristus. Ihkai nyuhuk iyok noku ihkam supayak nguan kam muhat khavun notucuk kam supayak mahi-mahik pocayak mbak Kristus. 3 Ihkai motiang iyok supayak yarok icok behtik pun tahkan holang ihkam jok nohtah kopocayak ah mbak Hotalak tului kojorak tok. Ihkam taꞌai ngindoi ihtok alah ngomok dolang kojorak erih, kotului erih noh icok tahkan holang paring evak Hotalak ahkan tok. 4 Beteng kai honong hicok mbak ihkam, ihkai was marak ahkam muk ngindoi ihtok ahkan jorak. Khavun aꞌang erih was tuꞌuk-tuꞌuk torjadik, ihkam was taꞌai ah. 5 Kotului erih noh, kotihkak ahkuk uwas iyam duok kuk nai nahan ah, ahkuk nyuhuk Timotius kotului ahkuk jolik taꞌai inon leh ihkam honong pocayak mbak Kristus. Ahkuk mihkoh Lacak paring otuk was duon nikos kam sohinggak dolang korejak kai jok bahat tuh mahpah noh.6 Totahpik huntuh Timotius was hulik noku ohtoi khavun iyok was ngesah paring ah ahkan kai, kesah jok nguan kai ngandah mongenai kopocayak mik mbak Kristus, khavun ihkam mongasih havoi arop mik. Iyok marak ah ahkan kai ngindoi ihkam nohouk aꞌang jok pios tahkan kai nuk luvang ahtoi mik. Khavun ihkam jolik bohavung mbak ihkai, havoi noh mbak ihkai pun jolik bohavung mbak ihkam. b 7 Kotului erih noh, dolang bari-basak nuk luvang paring kojorak kai, tarung mongenai ihkam khavun kopocayak mik mbak Kristus ngohanyok ahtoi kai. 8 Huntuh ihkai ngomok tuꞌuk-tuꞌuk bolum, ngindoi ihkam muhat nuk luvang kopocayak mik mbak Tuhan Yesus. 9 Ihkai pun tuꞌuk-tuꞌuk bosukur noku Hotalak tului paring kandah jok konomok kai nuk husuk-Ah kotului ihkam. 10 Hondo ngolomik ihkai tuꞌuk-tuꞌuk nyavot mbak Hotalak, supayak ihkai touk bohavung mbak ihkam khavun touk dohop ihkam supayak iyam arok aꞌang jok tahpas luvang kopocayak mik mbak Kristus.
11 Ihkai bodoa supayak Hotalak Amai tok, khavun Yesus Tuhan tok, ahkan nongak jalan ahkan kai, supayak ihkai pohos tobarung mbak ihkam. 12 Nihak ngindoi Tuhan Yesus nguan kasih mik mahik monahang icok mbak jok bohkon khavun ahkan paring ulun, havoi numun mbak kasih kai ahkam mik. 13 Mbak koderih Tuhan Yesus ahkan nguan ahtoi mik mahi-mahik muhat, sohinggak ihkam borasih khavun yarok nguan aꞌang jok salak nuk husuk Hotalak Amai tok, kotihkak Tuhan Yesus lombut mbak paring ulun jok Iyok tepui.