Komolum jok ngosenang ahtoi Hotalak
4
Dolang barih basak, ihkai was ngajar ihkam bohkolo bolum jok ngosenang ahtoi Hotalak. Ihkam was bolum numun erih. Totahpik huntuh luvang kuasak Tuhan Yesus, ihkai pun tuꞌuk-tuꞌuk nyavot khavun ngajar marak ihkam supayak ihkam mahi-mahik ngotiak ah hinok ahkan aꞌang erih. 2 Kotului ihkam was taꞌai poletah-poletah jok was tonongak kai ahkan mik, mbak kuasak jok tahkan Tuhan Yesus. 3 Hotalak kanik ihkam bolum borasih iyam nguan dosa, khavun arak sapai ihkam tiruh mbak ulun jok iyam bosai khavun ulun jok iyam oruh mik. 4 Dolang bahkas nuk holang ihkam alah taꞌai bokolo jagak behtiu aha supayak ngosenang ahtoi Hotalak khavun kolunon. 5 Arak bolum ngohasuk kokanik arop mik bongom, numun ulun jok iyam nyembah Hotalak. 6 Nuk luvang paring aꞌang ihtuh arak sapai icok behtik pun ngorugik ngindoi iyam nihpuk bari-basak basak ah. Lomoi ihkai was tuꞌuk-tuꞌuk marak ah ahkan mik, ngindoi Hotalak ahkan ngohukum ulun-ulun jok koderih. 7 Hotalak naꞌah tok supayak tok bolum suci, Iyok iyam kanik ihtok bolum luvang dosa. 8 Ulun jok ngomelek ajar barak erih, iyok iyam ngomelek kolunon totahpik iyok ngomelek Hotalak jok was nongak Roh Kudus-Ah ahkam muk.9 Iyam poduluk nai ihkai nulih ahkam mik mongenai bohkolo ihkam alah mongasihi dolang bari-basak basak jok havoi kopocayak tok. Ihkam bongon mik was kongajar Hotalak supayak mongasihi icok mbak jok bohkon. 10 Khavun aꞌang ihtuh was konguan mik noku paring ulun jok pocayak mbak Yesus nuk paring Makedonia. Totahpik, dolang barih basak, ihkai tuꞌuk-tuꞌuk nyavot supayak ihkam nulo mokarah kasih mik holovik hinok. 11 Ngotiak ah noh bolum linuh mbak ulun bohkon khavun arak ngurus komolum doh. Punak pios ihkam korejak bogavik ngurah ukun ponguman mik, numun jok was pomarak kai ahkam mik. 12 Ngindoi ihkam bolum koderih, ihkam bolum iyam ngoharap ulun bohkon, khavun ulun-ulun jok iyam pocayak mbak Kristus, ahkan ngolehkak ihkam.
Polombut Tuhan
13 Dolang bari-basak, ihkai jolik ihkam taꞌai jok sobenar ah mongenai ulun-ulun jok was palus. Supayak ahtoi mik iyam liduk pahuk kolo ulun-ulun bohkon jok iyam tepun pengharapan mocon hicok mbak Hotalak. 14 Ihtok pocayak ngindoi Yesus mahtoi totahpik hulik bolum hinok. Kotului erih noh ihtok pocayak ngindoi Hotalak ahkan ngomolum paring ulun pocayak mbak Yesus khavun jok was palus, supayak doh bolum hicok mbak Iyok.
15 Ihtuh noh Auh Hotalak jok kongesah kai ahkam muk: ihtok jok honong bolum beteng Yesus lombut, ihtok iyam ahkan noseluk idoh jok was palus ahkan bohavung mbak Iyok. b 16 Tuhan Yesus bongoi ah noh jok ahkan mosuluh tahkan surga mbak poletah jok mohing, mbak auh tahkan kopalak molekat, khavun sangkakalac Hotalak konomusik ahkan tandak. Beteng erih noh ulun-ulun pocayak jok was palus idoh noh topahtuk ah jok ahkan hulik bolum. 17 Umbot erih ihtok jok honong bolum beteng erih ahkan kongahtang hombo-homboh mbak idoh jok was konomolum erih noku luvang havun ahkan bohavung mbak Tuhan. Khavun ihtok ahkan mocon mbak Tuhan nyiring yarok tihkas nyamah ah. 18 Kotului erih noh ihkam havo-havoi alah ngorohon ahtoi icok mbak jok bohkon mbak ajar barak tuh.