Ngajar marak supayak icok ahtoi khavun icok pihkir
4
Kotului erih, dolang bari-basak jok kongasih kuk, ahkuk punak jolik bohavung mbak ihkam! Ihkam alah nulo pocayak khavun pahtuh mbak Tuhan. Ihkam noh jok nguan ahkuk ngandah, khavun ahkuk ngehtek ihkam.2 Eyodia khavun Sintikhe, ahkuk tuꞌuk-tuꞌuk nyavot supayak borok hicok ahtoi pihkir kotului borok arok noh ulun-ulun jok Tuhan Yesus tepui. 3 Ahkan jolahak kuk korejak jok sotia, ahkuk nyavot supayak ihkok, Sunsugos, dohop ah noh duok behtik bavik erih hokopios. Idoh was tuꞌuk-tuꞌuk ngotiak ngesah Tarung Pios hicok humbak mbak ahkuk, havoi kolo Klemen khavun paring ulun bohkon jok korejak hicok mbak ahkuk. Dolang ngaran doh was tonulih nuk luvang buhkuk jok suang ah dolang ngaran ulun jok ngonduon komolum jok yarok tihkas nyamah ah.
4 Ngandah nulo noh ihkam tului ihkam uwas bolum hicok mbak Tuhan. Sinok hinok ahkuk marak ah ahkan mik, ngandah noh!
5 Mokarah ah noh kopion ahtoi muk ahkan paring ulun. Nohouk ah, iyam tahik nai Tuhan ahkan lombut hinok! 6 Arak noh ihkam liduk mongenai paring aꞌang, totahpik luvang paring koadaan bodoa noh noku Hotalak, marak ah inon kopoduluk mik, khavun nyavot Iyok dohop ihkam. Bodoa noh nahtup nulo bosukur mbak paring jok konguai-Ah ahkan mik. 7 Ngindoi ihkam nguai ah, mahkak damai sojahtra tahkan Hotalak ahkan jagak ahtoi khavun pihkir mik jok was hicok mbak Kristus Yesus. Damai sojahtera erih iyam duon kolunon mihkir ah.
8 Jadik dolang bari-basak ihkam alah mihkir paring ah ihtuh: paring jok hinut, jok pahtut kongolehkak, jok adil, jok suci, jok nguan tok ngandah, jok tamam tok nyonih ah, jok pios khavun jok pahtut tok ngehtek ah. 9 Nguai noh inon jok uwas kongajar kuk ahkan mik, inon jok uwas sonyonih khavun tonorimak mik tahkan ahkuk. Koderih kak inon jok uwas umbot ihkam nohtok ah tahkan ahkuk, nguai noh kolo erih. Mbak koderih, Hotalak jok nongak damai sojahtera hicok humbak mbak ihkam.
Paulus botorima kasih mbak jomaat nuk Pilipi
10 Ahkuk punak ngandah khavun bosukur mbak Tuhan, kotului ihkam touk hinok dohop nongak inon jok kopoduluk kuk. Jok kotuui ah ihkam nulo nohouk ahkuk, totahpik kotului ihtok hokomacuk mahkak jaham hocok mik nguai ah. 11 Ahkuk marak naing erih iyam kotului ahkuk kanik nyavot kavat. Ahkuk was umbot bolajar ngomok cuhkup mbak inon jok arok nuk ahkuk. 12 Ahkuk taꞌai bohkolo bolum nuk luvang kotahpas kokurang khavun bolum holovik holeak. Ahkuk was bolajar ngomok puas mbak inon jok ahkuk tepui, inon leh ahkuk bosuh khavun bolouk, inon leh ahkuk tahto khavun ahkuk malak. 13 Ahkuk duok noharep inon kiyak jok torjadik kotului Kristus nongak komuhat ahkak kuk.
14 Totahpik jok konguan mik erih pios, tului ihkam ngavat ahkuk beteng ahkuk jorak. 15 Ahkuk yakin ihkam ulun Pilipi tohoun mik kotihkak topahtuk kuk ngesah mongenai Tarung Pios nuk Makedonia. Beteng kuk was tulak tahkan anai, ihkam noh ico-icok ah jomaat jok motiang duit ahkan kopoduluk kuk molayan nuk daerah bohkon. a 16 Kotihkak ahkuk arok nuk kota Tesalonika, holovik tahkan icok kali ihkam motiang inon jok kopoduluk kuk. b 17 Ahkuk marak kolihtuh iyam tului ahkuk nyavot ihkam dohop ahkuk hinok. Totahpik ahkuk kanik supayak ihkam paring ah konomerkat Hotalak holovik holeak sobagai palos ah tului ihkam uwas dohop motiang paring kopoduluk kuk. 18 Huntuh paring kopoduluk kuk uwas cuhkup noh, malah holovik holeak, tului Epaporoditus uwas ngonin inon jok ponotiang mik noku ahkuk. Inon jok pomotiang mik erih kolo surung jok tonongak noku Hotalak jok kobuai ah tamam, Iyok norimak ah khavun surung erih nguan Iyok ngandah. c 19 Hotalak kuk ahkan nongak paring kopoduluk mik nyihing koponahto Ah jok holovik holeak, kotului ihkam uwas hicok mbak Yesus Kristus. 20 Has tok momuji Hotalak Amai tok nyiring yarok tihkas nyamah ah Amin.
Salam pongohpah ah
21 Ahkuk motiang salam ahkan paring ulun jok pocayak mbak Yesus Kristus. Bari-basak jok hicok humbak mbak ahkuk nuk ohtoi idoh halik motiang salam kak ahkan mik. 22 Paring ulun pocayak jok mocon nuk kota ihtuh, khavun paring ulun pocayak nuk lovun lacak Roma, idoh halik motiang salam ahkan mik.
23 Ahkuk bodoa supayak kopion ahtoi Tuhan Yesus Kristus hicok humbak mbak ihkam paring ah.
Tahkan ihkai, Paulus khavun Timotius