Yesus Kristus noh jok punak peting
3
Pongopah ah, bari-basak kuk, ngandah noh kotului ihkam was hicok mbak Tuhan. Ahkuk iyam bokah marak ihkam hinok kolo inon jok sojaham ah pujik kuk nulih ah, supayak ahkuk touk jagak ihkam tahkan dolang ulun jok kanik ngolanyat ihkam. 2 Touk-touk noh jagak arop mik tahkan dolang ulun jok jaek, paring kojaek doh kolo tobiat asuk. Kotului idoh mahpak ulun jok pocayak mbak Kristus alah pomalax. 3 Jok kotuui ah ihtok arok noh ulun jok tulin was pomalax. Tului malax jok kotuui ah iyam kolo elah doh, totahpik arok noh bolum tok jok nyembah Hotalak ngohasuk kokanin Roh Hotalak erih. Ihtok ngandah kotului inon jok konguan Kristus ahkan tok sohinggak ihtok iyam nai namit adat turan jok tonapak kolunon supayak ihtok sonyolamat. 4 Ngindoi idoh ngomok arop doh hinut nuk husuk Hotalak tului nguan dolang porahturan erih, ahkuk holovik hinok tahkan idoh tului ahkuk tepun buhkui jok holovik borohon tahkan idoh, yok erih: 5 ahkuk pomalax beteng umur kuk jaluk ondo, ahkuk ulun Israel tahkan suku Banyamin, ahkuk tulin ulun Ibrani, ahkuk punak pahtuh mbak Hukum Taurat sohingga ahkuk tormasuk kolompok ulun Parisi. a 6 Ahkuk tuꞌuk-tuꞌuk ngotiak nyenang ahtoi Hotalak sohinggak ahkuk monyorak dolang ulun jok pocayak mbak Yesus. Khavun yarok icok behtik ulun pun jok touk ngonduon kosalak kuk kotului kopahtuh kuk mbak Hukum Taurat. b 7 Punak tuꞌuk lomoi ahkuk ngehtek khavun ngomok borutung tului paring ah erih. Tahpik huntuh paring aꞌang erih iyam arok gunai ah ahkak kuk, tului ahkuk uwas pocayak mbak Kristus. 8 Mohtos paring aꞌang kongomok kuk rugik, kotihkak ahkuk uwas nyokonok Kristus Yesus, Tuhan kuk. Kotului nyokonok Iyok holovik peting tahkan paring ah erih. Tului Kristus noh ahkuk molahpas paring ah erih khavun nohtok ah yarok gunai ah kolo poruhuk, supayak ahkuk touk nyokonok Kristus. 9 Jadik ahkuk cumak kanik hicok mbak Iyok. Ahkuk jadik hinut nuk husuk Hotalak iyam tului ahkuk ngotiak pahtuh mbak porahturan Hukum Taurat, totahpik tului pocayak mbak Kristus Yesus nyihing inon jok konguai-Ah nuk luvang ahkuk! Hotalak was nguan ahkuk hinut nuk husuk-Ah kotului ahkuk pocayak mbak Kristus. 10 Mahkak huntuh, kojolik kuk arok noh nyokonok Kristus holovik hinok, khavun mbak ngomok kuasak jok ngomolum Yok tahkan pomalus-Ah. Ahkuk kanik jorak molayan Kristus kolo Iyok lomoi was jorak. Khavun ahkuk siap mahtoi kolo Iyok mahtoi lomoi. 11 Ahkuk kanik paring ah nyolung, supayak nain Hotalak nguan ahkuk hulik bolum tahkan pomalus kuk.Ngotiak supayak bolum hinut nuk husuk Hotalak
12 Ahkuk iyam marak ah ngindoi ahkuk was tuꞌuk-tuꞌuk jadik ulun numun jok kokanin Hotalak, totahpik ahkuk nulo ngotiak supayak ahkuk mahi-mahik havoi kolo Yesus Kristus. Kotului erih noh jok kokanin Iyok beteng naꞌah ahkuk jadik ulun jok Iyok tepui. 13 Dolang bari-basak, ahkuk iyam ngomok komolum kuk was havoi mbak Kristus. Totahpik arok icok aꞌang jok konguak kuk, yok erih ahkuk nolingau inon jok arok nuk lihkut kuk khavun ngotiak tihkas uhat kuk ngonduon inon jok arok nuk husuk kuk. 14 Kolo lomba nokoruk ahkuk nohtok noku husuk kuk supayak pohos dahpot khavun manang ngonduon hadiah. Hadiah erih iyok noh bolum bohuak jok was konojanjik Hotalak nuk surga nyihing pocayak mbak Yesus Kristus.
15 Ihtok paring ah jok was muhat nuk luvang kopocayak tok, alah bopihkir numun kolo jok was pomarak kuk. Ngindoi arok nuk holang ihkam jok iyam hicok pahkat mbak inon jok uwas tonulih kuk tuh, aꞌang erih ahkan nyahtak konguan Hotalak ahkan mik. 16 Jok punak poduluk huntuh, ihtok alah nulo bolum hinut sosuai mbak ajar barak jok was umbot Hotalak mokarah ah ahkan tok nyiring huntuh.
Ngajar marak ahkan paring ulun pocayak
17 Bari-basak, ihkam alah ngohasuk cara komolum kuk, khavun numui ah noh idoh jok bolum havoi mbak kolo komolum ekai. c 18 Tului tumbuk ulun jok marak ah pocayak mbak Yesus tahpik tobiat doh mokarah ngindoi idoh ngolavan ajar barak mongenai Yesus mahtoi nuk salib novus dosa. Mahkak holuk poh ahkuk uwas bojoin marak ahkam mik mongenai idoh, huntuh nahtup nangih ahkuk marak ah hinok ahkan mik supayak ihkam touk-touk mbak ajar barak doh. 19 Pongopah ah komolum ulun-ulun jok kolo erih ahkan lohpung. Kotului idoh cumak nguan kojolik jok nguan arop doh puas. Khavun idoh ngehtek mokarah paring tobiat jok mokiak arop doh, erih noh jok punak nguan doh ngandah. Idoh cumak mihkir inon jok ulun iyam pocayak mihkir ah. 20 Totahpik ihtok iyam bolum kolo idoh, kotului ihtok Hotalak tepui khavun arok hak tok nuk surga. Mbak kobolinguk ihtok ngindoi Tuhan Yesus Kristus lombut hinok tahkan anai sobagai Lacak Ponyolamat tok. 21 Behtin tok jok huntuh arok noh behtin jok touk mahtoi. Tahpik nain Yesus ahkan ngaluh behtin tok ihtuh jadik behtin jok yamios kotamam ah, kolo behtiu-Ah bongoi. Iyok nguan erih mbak kuasak-Ah jok touk nguan paring aꞌang pahtuh mbak poletah-Ah.