Tehtap noh hicok khavun bolum kolo Kristus
2
Ihkam muhat tului ihkam uwas hicok mbak Kristus. Ihkam ngomok tohibur tului Kristus mongasihi ihkam. Ihkam was hicok mbak Roh Hotalak kak, kotului erih noh ihkam mongasihi khavun masik icok mbak jok bohkon. 2 Ahkuk nyavot supayak ihkam tuꞌuk-tuꞌuk mongasihi havoi arop mik, korejak hicok ahtoi pihkir khavun hicok ponyalan mik. Ngindoi ihkam nguan paring ah erih ahkuk ahkan tuꞌuk-tuꞌuk ngandah. 3 Inon pun jok konguam muk arak nguai ah ahkan kopoduluk emuk bongom, khavun arak nguai ah supayak ngehtek arop muk holovik pios tahkan ulun bohkon. Ihkam arak noh sahkah tahpik alah nguan ulun bohkon holovik peting mbak arop mik. 4 Ihkam alah mihkir ah kak kopoduluk ulun bohkon, arak noh cumak mihkir kopoduluk arop mik kiyak. 5 Ihkam alah tepun tobiat jok kolo tobiat Kristus Yesus:6 Holuk poh Iyok tepun tobiat khavun kuasak kolo Hotalak,
totahpik Iyok iyam pujik mahpak arop-Ah alah tehtap arok nuk ponuot jok konolehkak erih.
7 Totahpik Iyok molahpas paring ah erih.
Iyok konganak noku duniak jadik kolunon khavun havoi kolo mbak jihpon.
8 Beteng Iyok jadik kolunon Iyok ngopindak arop Ah khavun ngohasuk inon jok kokanin Hotalak nyiring mahtoi,
yok erih mahtoi nuk salib.
9 Kotului erih noh Hotalak was nongak Iyok unuk jok punak konolehkak,
khavun nongak Yesus kuasak jok punak isung tahkan paring kuasak jok bohkon.
10 Hotalak nguan aꞌang erih supayak paring ulun ahkan nyuhkuk nyembah Yesus,
ulun jok nuk surga, nuk duniak,
khavun ulun jok nuk lovuk lio. a
11 Khavun paring doh ahkan ngahkuk: “Yesus Kristus erih arok noh Tuhan!”
Mbak koderih Hotalak Amai kongolehkak doh.
Bolum noh sosuai mbak kokanin Hotalak
12 Dolang bari-basak jok kongasih kuk, ihkam nulo pahtuh mbak ajar barak kuk beteng ahkuk hicok humbak mbak ihkam, holovik hinok huntuh beteng ahkuk iyam humbak mbak ihkam, ihkam alah mahi-mahik pahtuh hinok. Kotului erih bolum noh ngolehkak khavun mihkoh mbak Hotalak mbak tobiat jok pahtut sobagai ulun jok was sonyolamat. 13 Kotului Hotalak bongoi noh jok uwas ngavat ihkam. Iyok korejak nuk luvang ahtoi mik supayak ihkam kanik khavun duon mik nguan inon jok tumbas umbak kokanin-Ah.
14 Nguai ah noh paring aꞌang arak tahtup ngomumut khavun hobatah. 15 Supayak ihkam iyam salak khavun borasih ahtoi mik tahkan jok jaek, bolum noh sobagai anak-anak Hotalak jok iyam pujik buah kouh tahkih nuk tohun-tohun dolang ulun jok jaek ahtoi ah khavun ulun-ulun jok lajat ihtuh, sohinggak ihkam jadik tarang nuk holang idoh kolo motion-motion narang duniak jok pindong. b 16 Ihkam alah namit Auh Hotalak jok nongak komolum. Supayak ahkuk touk ngehtek ihkam nuk husuk Kristus beteng Iyok lombut hinok, ngindoi kojorak kuk khavun ngotiak molayan ihkam iyam siak-siak.
17 Ihkam was pocayak khavun molayan Tuhan, aꞌang erih kolo surung noku Hotalak. Ngindoi ahkuk mahtoi, aꞌang erih ahkan nguan surung mik erih jadik yarok tahpas kokurang ah. Kotului erih ahkuk jolik ngandah hicok mbak ihkam. 18 Jadik ihkam alah ngandah kak khavun ihtok havo-havoi ngandah.
Timotius khavun Epaproditus
19 Ahkuk bodoa nihak ndoi Tuhan Yesus ahkan pohos nguvat jalan sohinggak ahkuk touk nguhtus Timotius noku ihkam. Kotihkak Timotius hulik nain iyok ahkan ngesah mongenai ihkam khavun ahkuk ngomok somangat kotului aꞌang erih. 20 Nuk holang paring ulun nuk ohtoi, Timotius noh jok hicok pihkir mbak ahkuk. Iyok tuꞌuk-tuꞌuk kanik ngurus dolang kopoduluk mik. 21 Ulun-ulun jok bohkon mihkir kopoduluk arop doh, iyam kopoduluk Yesus Kristus. 22 Ihkam taꞌai Timotius uwas motohtok arop ah tuꞌuk-tuꞌuk sotia. Iyok was hicok humbak mbak ahkuk, ihkai korejak mahtoi-mahtoi narung Tarung Pios, iyok ngavat ahkuk kolo anak ngavat amai ah. 23 Ahkuk iyam taak inon jok ahkan torjadik mbak arop kuk, inon leh ahkuk ahkan ponolahpas. Ngindoi paring ah uwas jelas, mahkak ahkuk ahkan pohos nguhtus Timotius hulik noku ihkam. 24 Ahkuk pocayak ngindoi Tuhan ahkan ngavat ahkuk supayak pohos bohavung mbak ihkam.
25 Ihkam uwas nguhtus Epaproditus bari-basak tok, iyok jolahak kuk korejak khavun ihkai havo-havoi ngotiak nguan polayanan Tuhan. Iyok was ngurus dolang kopoduluk kuk nuk ohtoi. Huntuh, ahkuk ngomok ah poduluk nyuhuk iyok hulik noku ihkam. 26 Kotului iyok kanik nohtok ihkam paring ah. Iyok halik nyangit liduk mbak ihkam kotului iyok taꞌai ihkam uwas nyonih kesah ngindoi iyok poros. 27 Epaproditus pujik poros tehen khavun manyo mahtoi, totahpik Hotalak masik mbak iyok khavun nyahkang iyok. Hotalak masik kak mbak ahkuk, Iyok nyahkang Epaproditus supayak ahkuk iyam atak liduk. 28 Kotului erih noh ahkuk nyuhuk iyok ngimos bulik, supayak kotihkak ihkam nohtok iyok ihkam ahkan ngandah, khavun ahkuk linuh kotului iyok hicok humbak mbak ihkam. 29 Mahkak ihkam alah punak ngandah norimak iyok kolo jolaham mik harik jok havoi pocayak mbak Tuhan. Ihkam alah ngolehkak paring ulun jok kolo iyok. 30 Kotului molayan Kristus iyok manyo mahtoi, khavun iyok iyam mihkir arop ah bongoi kotihkak iyok luvang bohayak beteng iyok ngatik ihkam dohop ahkuk.